¹ Kã Jezi desan dji mõtãi, boku mun suiv li. ² Un on te gãië bobo (lepra),vini ãjunü djivã Jezi, li dji: suple Sëie, djiehi mo si u puve. ³ Jezi lõje so lãmë, li tuxe li dji: ui mo le djiehi'u. Lãdã men lokasiõ li hete phop dji so bobo. ⁴ Ëbe Jezi dji: kute! pa hakõte sa pu pies mun, më ale dumãde dji sasedotxi pu ësãmine zot. Aphue, ãfë pu tonë laphuev pu tut mun ki zot djiehi, zot ale ofui sakhifis ki Moisés dji. ⁵ Kã Jezi ãthe la pei dji Kafahnaum vini kote li un xef dji sã soda, ⁶ Li dji: Sëie mo siavito la kaz malad i pahalize, li ka sufui boku ke dulo. ⁷ I Jezi dji: Mo ka ale djiehi'l. ⁸ I xef-la dji: Sëie mo pa mehite pu u ãthe la mo kaz, më sel dji un pahol mo siavito ke hete djiehi. ⁹ Mo osi ãba zod dji otohite dji soda-iela ki pi hot-iela i mo gãië soda ki ka obei mo zod-iela. Kã mo ka dji pu un: ale li k'ale. Kã mo ka dji pu uot la vini li ka vini. I osi mo ka dji pu mo siavito: fe sa, li ka fe. ¹⁰ Kã tãde sa li hete kõtã boku li dji pu sa ki te ka suiv li: Ã lavehite mo ka dji esi la, la Ishael mo pa thuve un mun ke boku espua. ¹¹ Më mo ka dji pu zot ki boku ke vini dji Levã i dji Kuxã ie ke asi obo tab ke Abhaão, Isaque i Jaco la lasosiete dji lahosiel. ¹² Më mun ki te djivet la lasosiete dji lahosiel ie ke jite ie deho lãdã, ghã suku. Laba ie ke khie i mode ie dã dji duló. ¹³ Ëbe Jezi dji pu xef dji sã soda-iela: ale pu u kaz, akõsa men kumã u ka khe mo ke fe i lãdã mem lokasiõ siavito-la hete djiehi. ¹⁴ I Kã Jezi ale la kaz dji Pie, li ue so belmë kuxe lãdã so bukã ke lafiev. ¹⁵ Jezi tuxe la so lãmë i lafiev sotxi dji li.Ëbe li leve djibut i kumase siavi Jezi. ¹⁶ Kã hive nãnuit, pov-la pote kote Jezi boku mun ki te gãië move lesphui. I Jezi sel ke un pahol li tihe tut move lesphui i djiehi tut mun ki te malad-iela. ¹⁷ Jezi fe sa pu kõphui sa ki Phofet Isaías te dji: "li ale ke tut no maladji-iela i xaie tut no ïfehmite-iela. ¹⁸ Jezi ue ban mun-iela kõhõne'l li voie so djisip-iela ale uot bo dji lag-la. ¹⁹ Un met dji lalua hive phox dji li: Met, no ke suiv u kote u k'ale! ²⁰ Jezi hepon: hapoz-iela gãië ie thu, i txisoso-iela gãië ie nik. Më, Pitxit dji Om pa gãië kote pu li pose so tet. ²¹ I uot ki ate djisip dji Jezi dji: _Sëie, phõmië lese mo tone ale ãtehe mo papa. ²² Jezi hepon: vini ke mo lese mun muhi ãtehe ie mun muhi-iela. ²³ Jezi ãthe lãdã bato-la i so djisip-iela ale ke li. ²⁴ Leve un vilë lapli ke gho vã, ki lag fe gho lãme dji un mãië ki gho lame te ka khuvui bato-la. Jezi te ka dhõmi. ²⁵ Djisip-iela ale leve Jezi ie dji: Sëie sove no! no ke muhi. ²⁶ Jezi hepon: pukisa zot pe, om dji pitxi espua? Ëbe li leve le babie vã-la i lãme-la i tut hete this. ²⁷ Ëbe ie tut hete susphan i ie dji: a ki om sa ki ka kumãde juk vã i lãme? ²⁸ Kã Jezi hive la hegiõ dji Gadaha, la bo Levã dji lag dji Galileia, ale kõthe ke li dë om ki te ke Lesphui dji demuë. Ie te ka vini dji semitxe, kote ie te ka hete. Ie te boku move ki pies mun pa te ka pase laba lãdã sa hegiõ-la. ²⁹ Ie kumase hele: Pitxit dji Bõdje akisa u le ke no? U vini esi pu bai pinitãs ãvã tã-la? ³⁰ Phox dji laba te gãië boku koxõ te ka mãje. ³¹ I demuë-iela dji pu Jezi si u tihe no voie no ãthe lãdã sa ban koxõ-iela. ³² Jezi dji: zot ale. Demuë-iela ale ie ãthe lãdã koxõ-iela ie kuhi djihet pu lag-la i ie neie. ³³ I om-iela ki te ka ëtxupe dji koxõ-iela mahõ pu pei-la. Laba ie hakõte tut sa i osi sa ki fet ke dê om-iela ki te ke lesphui demuë. ³⁴ Ëbe tut mun-iela dji pei-la sotxi pu kõthe ke Jezi, i, kã ie kõthe ke li ,ie dji pu li ale dji ie late .