¹ Zot hete ka veie pu zot pa fe zot bõ volõte dji thavai djivã mun-iela ãfë dji ue zot pahet djivã mun-iela; dji uot mãië ki pa ke gãië hekõpãs dji zot Papa dji Lahosiel . ² kã zot bai un kek bagaj pu un mun ki nesesite, pa hakõte kisa u fe, kuma vakabõ-iela ka fe la "Kaz dji Adohasiõ" i la lahi, pu ie pahet djivã mum-iela; Ã lavehite mo ka dji pu zot ki ie deha husuve ie hekõpãs. ³ Me kã zot fe xahite, zot lãmë agox pa save akisa zot lãmë adhet ka fe. ⁴ Pu fe xahite ãseghe, i zot papa, ki ue ãseghe, ke hekõpãse zot. ⁵ I Kã zot ke phuie, pa fe kumã vakabõ-iela; pase ie kõtã phuie dji djibut la "kaz dji Adohasiõ", i la lahi pu ie pahet djivã mun-iela. A lavehite mo ka dji pu zot ki ie deha husuve ie hekõpãs. ⁶ Ëbe u, kã u ke phuie, ãthe la u xã, fõmë lapot, i phuie pu u Papa, ki la ãseghe, li ke hekõpãse-u . ⁷ I Kã u ke phuie, pa numê mem pahol boku fue, kumã sa uot mun-iela ki pa batxize, ie ka majinë pi ie phuie lõg Bõdje ke kute ie. ⁸ Pa fe sãble ie, pase ãvã zot dumãde zot Papa deha save akisa zot buëzë. ⁹ Ëbe zot phuie kõsa: no papa ki lahosiel, u nõ a hespek tupatu. ¹⁰ Vini u Lasosiete . Pu fe u volõte, kõsa lasu late, i kõsa lahosiel. ¹¹ Bai no jodla no djipë dji xak ju . ¹² I padõnë dji no pexe, kumã no osi padõnë sa ki te fe pexe kõt no. ¹³ I pa lese no tobe lãdã tëtasiõ, me delivue no dji tut djimal. ¹⁴ Pase si zot padõnë mun-iela dji ie pexe, zot Papa ki Lahosiel osi ke padõnë zot. ¹⁵ Më si zot pa padõnë mun-iela, osi zot Papa ki Lahosiel pa ke padõnë dji zot pexe. ¹⁶ I kã zot ka fe jënë, zot pa mõthe ki zot this, sãble vakabõ-iela; pase ie ka mõthe ie vijaz, pu ie pahet djivã uot mun-iela ki ie ka fe jënë . Ã lavehite mo ka dji pu zot ki ie deha husuve ie hekõpãs. ¹⁷ Me u, kã u ka fe Jënë, thãpe u tet i lave u vijaz, ¹⁸ pu pa pahet djivã mun-iela ki u ka fe jënë, me ui pu u Papa, ki la ãseghe; i u Papa ki ue ãseghe ke hekõpãs u. ¹⁹ Pa hamase pu zot hixez lasu late, kote mit i lahuj ke huie li, i kote vole ka xakaia i ka volo. ²⁰ Më hamase pu zot hixez dji lahosiel, kote mit i lahuj pa ka huie i kote volé pa ka xakaia i volo . ²¹ Pase kote gãië u hixez, laba osi ka hete u txo. ²² Klehite dji u ko a uei; Ëbe, si u uei "phop", tut u ko ke hete plë ke lime. ²³ Me si u uei mal, tut u ko ke hete la suku. kõsa si Klehite ki lasu u vihe suku. A txi gho vilë suku. ²⁴ Pies mun pa puve siavi dê pathõ; li ke lese un, i li ke kõtã un; pu un li ke fe bië pu uot la li pa ke fe bië . u pa puve siavi Bõdje i hixez. ²⁵ Apusa mo ka dji pu zot: pa thakase ke u lavi, suje akisa u gãië pu mãje, akisa u gãië pu bue, në pu u phop kó, a ki lëj u gãië pu ise. A pa lavi ki plis Bõ pase mãje, i u ko pase lëj ? ²⁶ Gade txizozo-iela ki Ka vole lahosiel, ie pa ka sõmë ,ie pa ka hamase, në hamase pu sehe, i ke tut sa zot Papa ki Lahosiel ka suen dji ie ke mãje. A pa zot ki pi boku ïpohtã pase ie ? ²⁷ Ki mun dji zot puve, fe so lavi pi lõg, ki Ka pi thakase ke sa? ²⁸ I pukisa u ka maxe thakase ke lëj? Gade butxie dji savã kumã ie ka puse, ie pa në ka thavai në nate. ²⁹ I mo ka dji pu zot ki në Salomão, ke tut so fos. Li ise lëj kumã un dji ie. ³⁰ Si Bõdje ka mete lëj dji sa mãië la sa plã dji savã, ki jodla li ka ise, i djimë li ka jite li la djife. Ëbe, osi Bõdje ke mete lëj lasu zot osi ki gãië tximoso espua. ³¹ Pa maxe, ka majinë , ki u ka dji: akisa no ke mãje? " akisa no ke bue?" "ki lëj no ke ise? ³² Pukisa mun ki pa batxize ka sase tut sa bagaj-iela, i zot Papa ki Lahosiel save ki zot nesesite dji tut sa bagaj-iela. ³³ Me sase phõmië Lasosiete i so hespek i tut sa bagaj-iela li ke bai pu zot . ³⁴ Pa maxe ka majinë , pu ju dji djimë, ju dji djimë ke ëtxupe dji li phop. Li bõ xak ju ke so djimal.