¹ 1 Kã Jezi ue sa ghã mutxidõ, li mõte la un mõtãi li asi. So djisip-iela hive obo li, ² I Li kumase mõthe ie. Jezi dji: ³ Bië kõtã sa mun ki pov dji lesphui, pase Lasosiete dji Lahosiel a ie pa. ⁴ Bië kõtã sa mun ki ka khie, pase Bõdje ke kõsole ie. ⁵ Bië kõtã sa mun ki pa gãië ãië, pase ie ke husuve late-la. ⁶ Bië kõtã sa ki gãië fë i suef dji fe volõte dji Bõdje,li ke ie kõpletmã kõtã. ⁷ Bië kõtã sa mun ki gãië lapen dji uot mun-iela, Bõdje ke gãië lapen dji ie. ⁸ Bië kõtã sa mun ki gãië un bõ txo, ie ke ue Bõdje. ⁹ Bië kõtã sa mun ki ka thavai pu kõtãtmã, Bõdje ke ëtxupe kumã so pitxit-iela. ¹⁰ Bië kõtã sa mun ki ka sufui pehseguisiõ, pu fe Bõdje so volõte, Lasosiete dji Lahosiel a ie pa. ¹¹ Bië kõtã a zot, ka ie ka juhe zot, plede, i Kã ie ka dji tut kalite mãto kõt zot, pase zot sa mo siavitó-iela. ¹² Zot hete kõtã, pase un ghã hekõpãs sehe lahosiel pu zot. Pase akõsa men ie fe ke Phofeta ki vini ãvã zot. ¹³ Zot sa djisel dji late- la, më se djisel piad so gu, pukisa li ke siavi? li posib pu li hete salê ãko? Ie ke jite'l deho mun ke djibut lasu'l, pase li pa ka siavi pu ãië. ¹⁴ Zot sa klehite pu tã-la, ïposib sehe un pei ki ie edjifike ãle un mõtãi. ¹⁵ Pies mun pa puve limë un lalãp i mete'l ãba un pãië, okothe, ie ke mete'l un kote phop pu klehê tut sa ki lãdã kaz-la. ¹⁶ Akõsa osi zot klehite djivet klehe pu uot mun-iela ue bagaj ki bõ ki zot ka fe, i pu ie osi lue i adohe zot Papa ki ka hete Lahosiel . ¹⁷ Zot pa majinë ki mo vini pu fini ke lalua dji Moisés o ke pahol dji uot Phofeta-iela. Nõ, mo pa vini pu fini ke ie, mo vini pu kõphui ie. ¹⁸ Mo ka asihe zot ki sa a lavehite: Ëkãt siel i late duhe, ãië pa ke sotxi dji laluá-la në pipitxi let-la i akõsa ke hete juk finisiõ de tut bagaj-iela. ¹⁹ Mun ki pa obei un dji sa lalua-la, i mõthe uot mun fe mem bagaj, ie ke kõsidehe li kumã pipitxi dji Lasosiete dji Lahosiel. I mun ki obei lalua-la i mõthe uot mun fe mem bagaj, ie ke kõsidehe li kumã ki pi gho la Lasosiete dji Lahosiel. ²⁰ Mo ka asihe zot, ki u ke sel ãthe la Lasosiete dji Lahosiel si u hete fiam pu fe volõte dji Bodje,plis ki met dji lalua i fahiseu-iela ²¹ Zot tãde akisa ie dji pu zot ãtepase-iela :" pa txue, mun ki txue ke kõdãnë". ²² Më mo ka dji mun ki hete kole ke so fue ke kõdãnë. Mun ki dji pu so fue u pa vu ãië ke kõdãnë pu thibunal, mun ki aple so fue dji kuiõ, ke kõdãnë pu djife dji lãfe. ²³ Kã u ka ofui pu Bõdje u sakhifis la djivã leglis, i laba u xõje ki u fue gãië un kek bagaj kõt u, ²⁴ lese u sakhifis djivã leglis i ale phõmië dumãde padõ dji u fue, i aphue vini phuesãte u sakhifis pu Bõdje. ²⁵ Ãthe vit lãdã hekosiliasiõ ke u fue i u elmi, ëkãt u ke li lãdã ximë dji thibunal, pu li pa pote u pu xef-la, i xef-la pu soda-la, ie ke jite u lãdã phuisiõ. ²⁶ Mo ka asihe u ki sa a lavehite, u pa ke sotxi dji laba ëkãt u pa peie tut u kõt. ²⁷ Zot tãde sa ki ie dji: pa hete ke uot fam i uot om. ²⁸ Më mo ka dji pu zot: mun ki gade pu un fam ke mal ïtësiõ , i lide pu hete ke li, deha fe pexe lãdã u txo. ²⁹ Si u uei adhet ka fe u fe pexe, haxe'l i jite'l deho, pase pi bõ u piad un pedas dji u ko dji ki tut u ko ale pu lãfe. ³⁰ Si u lãmë adhet ka fe u fe pexe, kupe'l i jite'l deho, pase pi bõ u piad un pedas dji u ko , dji ki tut u ko ãtxe ale pu lãfe. ³¹ Ie dji osi: "mun ki voie so fam ale li djivet bai pu li un papie dji sepahasiõ." ³² Më mo ka dji pu zot: tut om ki voie so fam ale, sã li pa hete ke uot om, om-la ke hete ke fot dji fe fam-la fe pexe, i si fam-la maie ãko. I om ki maie li osi ka fe pexe. ³³ Zot tãde akisa ie dji pu zot ãtepase-iela: pa kase u phomes, më kõphui, sa ki u phomet pu Bõdje ki u ke fe. ³⁴ Më mo ka dji pu zot, pa phomet dji pies mãië . Pa phomet pu siel, pase a kote Bõdje ka hete, ³⁵ pa phomet pu late, pase a kote Bõdje ka pose so pie, pa phomet pu Jehusalém, pase a pei dji no ghã Vue . ³⁶ I osi pa phomet pu u tet, pase zot pa puve fe ki un dji zot fil xive hete blã o nue . ³⁷ A pu zot dji: "ui" "ui", o "nõ" "nõ "; sa ki pase dji sa ka vini dji elmi. ³⁸ Zot tãde akisa ie dji pu zot : "uei pu uei i dã pu dã". ³⁹ Më mo ka dji pu zot: pa hãde lasu sa ki Ka fe djimal pu zot. Si un kek mun fut la u vijaz vihe uot bo-la pu li fut osi. ⁴⁰ Si un kek mun plede ke u pu phã u *lëj , lese li ale ke u *kap osi. ⁴¹ Si un soda ëthãje fose u xaie un xaj un kilomet, xaie'l dê kilomet . ⁴² Si un kek mun dumãde un kek bagaj, bai; i, si un kek mun dumãde pu phuete, phuete'l. ⁴³ Zot tãde akisa ie dji: "kõtã zot kamahad-iela i pa kõtã zot elmi-iela." ⁴⁴ Më mo ka dji pu zot: kõtã zot elmi-iela i phuie pu sa ki Ka kose mal dji zot. ⁴⁵ Pu zot puve tonë pitxit dji zot Papa ki ka hete Lahosiel . Pase li ka fe solei klehe lasu mun ki bõ i lasu sa ki mixã-iela i li ka bai lapli pu sa ki Ka fe ddjibië kumã osi pu sa ki ka fe djimal. ⁴⁶ Si zot kõtã selmã sa ki kõtã zot, pukisa zot ka ãtan ki Bõdje bai zot un kek hekõpãs? publikan-iela osi pa ka fe mem la? ⁴⁷ Si zot pale selmã ke zot kamahad-iela,akisa zot ka fe dji ïpohtã ? publikan-iela osi pa ka fe mem la? ⁴⁸ Zot hete jis kumã no Papa, ki Ka hete Lahosiel jis.