¹ Kã ie phoxe Jehusalem, Jezi i so sjisip-iela hive la (Betfage), la mõtãi dji (Oliveira). Jezi voie djivã dê djisip. ² Jezi dji pu ie:"zot ale lãdã vilaj ki djivã dji zot i zot ke thuve un fimel xuval mahe i un txixuval ke li; demahe ie i pote animal-iela pu mo". ³ Si un kek mun dumãde dji zot akisa zot ka fe; hepon kõsa no met buëzë dji ie, kõsa ie ke lese zot pote animal-iela. ⁴ Sa hive pu kõphui sa ki phofet-la te dji: ⁵ "Pale pu pov dji Jehusalem: zot, gade ato zot Vue ka vini. Li onet i sëp, li ka vini ãle un xuval i un txixuval, pitxit dji fimel xuval". ⁶ Dê djisip-iela fe kumã Jezi dji pu ie. ⁷ Ie pote fimel xuval-la i txixuval-la, ie mete ie kap-iela lasu do xuval-iela i Jezi mõte ãle xuval-la. ⁸ I ban mun-iela luvui ie lej-iela lãdã ximë-la djivã Jezi, i uot mun kupe fei dji bhãx-bua ie jite lãdã ximë-la. ⁹ I sa mun-iela ki te k'ale djivã i ki te ka vini deie Jezi, ie te ka hele: "hosana, pu Pitxit dji Davi! ki Bõdje bëni sa ki ka vini la nõ dji Sëie! Hosana pu Bõdje lãdã plis hot dji siel-la". ¹⁰ Kã Jezi ãthe la Jehusalem, i tut mun-iela dji pei-la hete thakase i susphan, mun-iela dji: "akimun li sa?" ¹¹ ban mun-iela hepon: "A Jezi, Phofet dji Nazahe, dji Galileia". ¹² Ëbe Jezi ãthe lãdã Kaz dji Adohasiõ, li kumase babie tut ki te laba ka axte i vãde animal-iela pu sakhifis. Li xavihe tut tab-iela dji mun ki te ka xãje lajã, i xavihe bã-iela dji mun ki te ka vãde hãmië. ¹³ Jezi dji pu ie: Lãdã "Pahol Së" la ekhi ki Bõdje dji kõsa: " Mo kaz ie ke aple Kaz dji Phuie, më zot thãsfõmë li lãdã kaz dji vole". ¹⁴ I mun ki pa ka ue, i mun ïvalid vini kote Jezi lãdã Kaz dji Adohasiõ-la, i li djiehi ie. ¹⁵ Kã sasedotxi, i met dji lalua-iela ue sa mihak-iela i ie tãde tximun-iela ka hele "Hosana,Pitxit dji Davi, ie hete ãhaj. ¹⁶ Ie dji pu Jezi: U ka tãde sa ki tximun-iela ka dji? Jezi hepon: zot pa jë li Pahol Së-la? li dji: mõthe tximun-iela ofui bõ adohasiõ? ¹⁷ Ëbe Jezi lese ie, i sotxi dji pei-la li ale pu pov dji Betãnia. Li pase nuit laba. ¹⁸ Bõmãtë, ëkãt li te ka hutonë pu Jehusalem, Jezi hete fë. ¹⁹ Li ue un pie-figo obo ximë-la, li ale gade si li te gãië fui, më li thuve selmã fei. Ëbe, Jezi dji pu pie-figo:"u pa jë ke bai fui", i lãdã mem lokasiõ pie-figo-la hete sek. ²⁰ Kã djisip-iela ue sa, ie hete susphan ie dumãde:"kumã pie-figo-la hete sek thop vit? ²¹ Jezi hepon: Ã lavehite mo ka dji pu zot: si zot gãië espua, i pa lese dji khe, zot puve fe mem bagaj kumã mo fe ke txipie-figo-la. I pa selmã sa, më zot puve dji pu sa motai: "leve i ale pu ghã- lãme", i sa ka hive. ²² "Si zot khe, zot ke husuve nëpot bagaj ki zot dumãde lãdã phuie". ²³ Kã Jezi hutonë pu Kaz dji Adohasiõ li kumase mõthe i esplike, un dê sasedotxi i lidehãs dji judeu-iela ie phoxe Jezi i dumãde: ke ki povua u ka fe sa bagaj-iela? ki mun ki bai u sa povua-la? ²⁴ Jezi hepon: mo osi ke dumãde dji zot. si zot bai mo lahepõs la jis, mo ke dji pu zot ke ki povua mo ka fe sa bagaj-iela. ²⁵ Zot hepon mo: akimun ki bai povua pu Jã batxize? a Bõdje o mun-iela? Ie kumase kose un ke uot: si no dji ki a Bõdje, li ke dji. " Ëbe, pukisa zot pa khe lasu Jã"? ²⁶ Më, si nõ dji ki a mun-iela, no pe dji pov-la, pase ki tut pov-la ka kõsidehe Jã kumã un Phofet. ²⁷ Pu sa ie hepon: no pa save. Jezi dji: Mo osi pa ka pale ke ki povua mo ka fe sa bagaj-iela. ²⁸ Jezi kõtxinë dji: akisa zot ka thuve dji sa? un om te gãië dê pitxit on. Li ale kose ke pitxit ki plis vie-la li dji:" pitxit jodla u k'ale thavai la no plãtasiõ dji (uva)." ²⁹ Pitxit-la hepon: Mo pa k'ale. më aphue li xãje dji lide li ale. ³⁰ papa-la ale kote uot pitxit-la li bai mem zod. I pitxit-la hepon "ui". Më aphue pitxit-la pa ale. ³¹ Jezi dumãde: dji ie dê, a ki pitxit ki fe volõte dji papa-la? Ie hepon: A pitxit ki plis vie-la. Ëbe, Jezi dji pu ie: Mo ka dji pu zot ki sa a lavehite: publikan-iela i fam-iela dji lahi, ka ãthe la lasosiete dji lahosiel ãvã zot. ³² Jã Batxist vini pu mõthe zot ximë ki jis, i zot pa khe lasu'l; më publikan-iela i fam-iela dji lahi khe. I mem Aphue dji ue tut sa, zot pa hepãtxi i zot pa khe lasu'l. ³³ Jezi dji kute uot Kopahasiõ: un om fe un plãtasiõ dji (uva) i edjifike un bahaj pu kõhõnë plãtasiõ-la, un tãk pu phuese uva-iela, li edjifike un kaz hot pu so soda suveie; i aphue li lese so plãtasiõ la lãmë dji un dê aghikuto, i li voiaje. ³⁴ Kã hive sesõ pu hamase fui-iela, met-la voie un dê thavaio, pu husuve so pa kãtxite dji fui-iela. ³⁵ Aghikuto-iela txëbe thavaio-iela, ie fut un, ie txue uot-la i ie jite hox lasu thoazem-la. ³⁶ Ëbe met-la voie un patxizã ki plis boku dji thavaio, pu husuve so pa kãtxite dji fui-iela, më aghikuto-iela fe ke patxizã-la mem bagaj. ³⁷ Aphue dji tut sa, met-la voie so pitxit, li majinë: djivet ie ke hespete mo pitxit. ³⁸ Më, Kã aghikuto-iela ue pitxit-la, ie kose un ke uot: "Sa a pitxit dji met-la; li ke phã tut so plãtasiõ, ãnu txue'l, pu no hete ke plãtasiõ-la. ³⁹ Ëbe, ie txëbe pitxit-la, ie jite'l deho dji plãtasiõ- la i ie txue'l. ⁴⁰ Jezi dumãde: I ato, Kã met dji plãtasiõ-la hutonë, akisa li ke fe ke aghikuto-iela? ⁴¹ Ie hepon: asihe li ke txue sa aghikuto mixã-iela, li ke bai plãtasiõ-la pu uot mun. Ie ke bai met-la so pa kãtxite dji fui, lãdã lokasiõ jis. ⁴² Jezi ëbe dumãde, zot pa jë li Pahol Së-iela: " hox, ki mun ki edjifike, jite vini tonë plis ïpohtã dji tut hox-iela. Bõdje fe sa a un bagaj thop joli". ⁴³ Mo ka dji pu zot, ki Lasosiete dji Bõdje, ke sotxi dji zot, i mo ke bai pu sa mun-iela ki ka bai fui ki bõ. ⁴⁴ Mun ki tõbe ale sa hox-la, ka hete ã pedas, i si hox-la tõbe ãle kek mun, sa mun-la ka vihe san. ⁴⁵ Xef dji sasedotxi-iela i fahiseu-iela ie tãde sa Kopahasiõ ki Jezi hakõte i ie te save ki li te ka pale a hespek dji ie. ⁴⁶ Apusa ie te le phui Jezi, më ie te pe dji mun-iela, pase ki pov-la te ka khe ki Jezi ate Phofet.