¹ Ëbe Jezi hutonë ise Kopahasiõ pu pale ke mun-iela, Li dji: ² Lasosiete dji Lahosiel a kumã un vue ki phuepahe un lafet dji lamaiaz pu so pitxit. ³ Aphue li voie so siavito-iela aple mun ki li te ëvite, më ie pa te le vini. ⁴ Ëbe li voie uot siavito, pu ie dji kõsa:"dji pu mun-iela ki mo ëvite ki tut deha phuepahe pu lafet-la. Mo deha txue bef ki plis gha-iela, i tut phuepahe, ki ie vini lãdã lafet-la!" ⁵ Më mun-iela ki li ëvite pa bai atësiõ, ie ale pu ie fazen, uot ale pu ie magazë. ⁶ Uot-iela txëbe siavito-iela ie fut ie i ie txue ie. ⁷ Vue-la hete ãhaj boku, ki li voie txue sa mun-la i bule ie pei kote ie ka hete. ⁸ Aphue li aple so siavito-iela li dji: "mo lafet dji lamaiaz, phuepahe, më mun ki mo ëvite pa mehite vini, ⁹ ato zot ale lãdã lahi-iela i ëvite tut mun ki zot ue". ¹⁰ Ëbe, siavito-iela sotxi lãdã lahi-iela ie hasãble tut sa ki ie thuve, kumã mun ki bõ, kõsa ki mixã. I lasal dji lafet-la hete plë ke mun. ¹¹ Kã vue-la ãthe pu gade mun ki so siavito-iela ëvite, li ue un om ki pa te ka ise lëj espesial pu lafet-la. ¹² Vue la dji: kamahad, kumã u ãthe esi sã lëj espesial dji lafet-la? më om-la pa hepon ãië. ¹³ Ëbe, vue-la dji pu so siavito-iela: mahe pie i lãmë dji sa om-la i jite'l deho, lãdã suku. Laba li ke khie i mode so dã dji dulo. ¹⁴ I Jezi dji: boku mun ie ke ëvite, më tximoso ie ke xuesi. ¹⁵ Fahiseu-iela hasãble pu fe thap, pu Jezi puve pale un kek bagaj kõt ie, pu ie puve phui'l. ¹⁶ Ëbe ie voie un dê dji so djisip-iela, i un dê mun dji Herodes, pu dji pu Jezi: _met, no save ki u onet, u ka mõthe lavehite, pu viv dji mãië ki Bõdje le, u pa ka bai ïpohtã pu opiniõ dji uot-iela, u pa ka kõdãnë pu vijaz. ¹⁷ Ato dji pu no akisa u ka majinë dji sa: li jis peie xahite pu cezar: ui o nõ. ¹⁸ Më Jezi te save dji ie ïtësiõ, li hepon: Hipokhita! pukisa zot ka sase un laphuev kõt mo? ¹⁹ Zot pote ãghënë ki zot ka peie xahite ie pote ãghënë-la. ²⁰ I li dumãde: A dji ki mun nõ i vijaz ki lãdã sa ãghënë-la? ²¹ Ie hepon: A dji Cezar: Ëbe Jezi dji, zot bai pu Cezar sa ki a dji Cezar, i bai pu Bõdje sa ki a dji Bõdje. ²² Ie hete susphan kã ie tãdë sa. Ëbe ie lese Jezi i ie ale . ²³ Lãdã sa mem ju-la hive obo Jezi un dê "saduseus", ie afihmë ki pies mun pa ka hesusite. ²⁴ Ie dji pu Jezi: Met, Moisés mõthe kõsa, si un om muhi, i li lese so fam sã pitxit, so fue djivet maie ke fam-la, pu ie gãië pitxit, ki ke kõsidehe pitxit-iela dji om ki muhi la. ²⁵ Te gãië ãt no set fue, plis vie-la maie i aphue li muhi sã gãië pitxit. Kõsa, li lese fam-la pu dezem fue-la. ²⁶ Mem bagaj hive ke dezem-la i osi ke thoazem-la, i finalmã ke tut set fue-iela. ²⁷ Aphue dji ie fam-la osi muhi. ²⁸ Lãdã ju dji hesuheisiõ, dji ki fue li ke tonë fam? Pase ie tut te maie ke li! ²⁹ Jezi hepon: kumã zot sot, zot pa konet Pahol Së-la, në povua dji Bõdje! ³⁰ Pase, kã mun muhi-iela ke hesusite, ie ke sãble zãj-iela dji Lahosiel, pies mun pa ke maie. ³¹ I suje hesuheisiõ dji mun ki muhi-iela, zot pa li sa ki Bõdje dji pu zot, Li dji: ³² " Mo sa Bõdje dji Abhaão, Bõdje dji Isaque, i Bõdje dji Jacó". I Bõdje pa sa Bõdje dji mun muhi, më ui dji mun vivã. ³³ Kã mun-iela tãde sa, ie hete susphan ke so mãië dji mõthe. ³⁴ Fahiseu-iela hasãble, kã ie tãdë ki Jezi fe saduseu-iela fõmë ie bux. ³⁵ Un dji ie, ki ate met dji lalua, te le thuve un kek laphuev kõt Jezi, li dji: ³⁶ Met, akiles ki plis ïpohtã dji tut zod dji lalua-iela. ³⁷ Jezi hepon:"kõtã Sëie, u Bõdje, ke tut u txo, ke tut u nam i ke tut u mëmua". ³⁸ Sa a ki plis gho zod-la i ki plis ïpohtã. ³⁹ I desem ki plis ïpohtã sãble phõmië-la:"kõtã uot-iela kumã u kõtã u phop ko. ⁴⁰ Tut sa lalua dji Moises, i tut sa ki phofet mõthe, ie ka fini lãdã sa dê zod-iela. ⁴¹ Kã fahiseu-iela te hasãble, Jezi dumãde dji ie: ⁴² Akisa zot ka majinë dji Messias? dji ki mun li sa pitxit? Ie hepon: dji Davi. ⁴³ Jezi dumãde ie ãko: Ëbe pukisa, Davi pu lesphui Së, li aple Messias dji Sëie: ⁴⁴ "Sëie Bõdje dji pu mo Sëie: asi la mo bo adhet, juk kã mo mete u elmi-iela ãba u pie-iela". ⁴⁵ Si Davi ka aple "Messias" dji Sëie, ëbe kumã li puve sa so pitxit. ⁴⁶ Pies mun pa te puve hepon ãië, i dji sa ju-la pu djivã ie pa te gãië kohaje pu dumãde ãië dji Jezi.