¹ Lasosiete dji Lahosiel, a kumã un om met dji un ghã plãtasiõ dji (uva) ki sotxi bõmãtë bono pu sase thavaio pu thavai la so plãtasiõ. ² Li kõbinë ke thavaio-iela un ãghënë dji (prata) pa jone, i li voie ie pu so plãtasiõ. ³ Kã li sotxi, phox neve dji bõmãtë, li ue un dê om ki pa te ka fe ãië lãdã plas dji magazë. ⁴ Li dji pu ie "zot ale thavai lãdã mo plãtasiõ mo ke bai pu zot sa ki zot mehite ie ale" ⁵ Li sotxi ãko phox midji i thoaze, li fe mem bagaj ke uot thavaio-iela. ⁶ Kã li hu sotxi phox sëke, li thuve uot om laba, li dumãde dji ie: Pukisa zot la sã fe ãië? ⁷ ie hepon: pase pies mun pa bai no thavai. Ëbe li dji: "zot ale osi thavai la mo plãtasiõ". ⁸ Lãdã finisiõ dji jonë-la met dji plãtasiõ-la li aple so adjiministhate li dji: aple thavaio-iela pu peie ie kumase dji djiãië-iela pu phõmië-iela. ⁹ om-iela ki kumase thavai sëke dji asue ie husuve un ãghënë dji (prata) xak un. ¹⁰ Kã sa phõmië-iela hive ie majinë ki ie te husuve plis. Më ie osi husuve un ãghënë dji (prata) xak un. ¹¹ Kã ie husuve ie kumase heklãmë kõt Pathõ-la, ¹² ie dji: Sa thavaio-iela ie thavai selmã un le dji tã, më no sipote jonë-la ãtxe ãba sa solei ki xo-la. Më, ie husuve mem-la ke no! ¹³ Më xef-la dji pu un dji ie: kamahad mo pa ka fe ãië ki pa his ke u. U pa te dako pu thavai jonë-la ãtxe pu un ãghënë selmã? ¹⁴ Phã sa ki a u pa i ale. Mo ke bai pu sa ki thavai djiãië-la mem kãtxite ki mo bai pu u. ¹⁵ U khe mo pa gãië dhue fe ke mo lajã sa ki mo le. O u thuve mal selmã kumã mo fe bõ ke li? ¹⁶ Jezi fini dji: Akõsa sa ki a phõmië-iela ie ke sa djiãië, i sa ki a djiãië-iela ie ke sa phõmië. ¹⁷ Kã Jezi te ka mõte pu Jehusalem, li aple so djisip-iela pu un bo, lamitã ximë li dji pu ie: ¹⁸ Zot kute! No k'ale pu Jehusalem, kote Pitxit dji Om-la, ie ke hãde'l pu "xef dji sasedotxi-iela" i pu "met dji lalua-iela", ie ke kõdãnë'l pu lamo. ¹⁹ Ie ke hãde'l la lãmë dji nõ-judeu-iela. Ie ke solãte'l, ie ke fut li, i ie ke klue'l; më lãdã thoazem ju li ke hu leve dji lamo. ²⁰ Ëbe phoxe dji Jezi zebedeu so pitxit-iela ke ie mãmã. Mãmã-la adohel pu li dumãde dji li un suple. ²¹ Jezi dumãde: akisa u le?. Li hepon: phomet ki, kã u te tonë Vue, sa no dê pitxit-iela ie ke asi un la u adhet i un la u agox. ²² Jezi dji pu dê pitxit dji mãmã-la. Zot pa save akisa zot ka dumãde. Zot puve bue mem djivë ki mo ke bue? Ie hepon: ui no puve. ²³ Ëbe Jezi dji: vuemã, zot ke bue mem djivë ke mo. Më mo pa gãië dhue xuezi akimun ke asi la mo adhet i la mo agox. Pase a mo Papa ki phuepahe sa plas-iela i li ke bai pu mun ki li le. ²⁴ Kã uot djis djisip-iela tãde sa, ie hete kole ke dê fue-iela. ²⁵ Jezi aple ie tut li dji: zot save ki guvelmã-iela dji sa tã-la gãië otohite lasu pov-la, i ofisial-iela gãië otohite lasu mun-iela. ²⁶ Më zot pa puve fe Kõsa ãt zot. Mun ki le hete ïpohtã, pu li siavi uot-iela, ²⁷ i mun ki le sa phõmië, ki ie tonë zot esklav. ²⁸ Pase ki, juk Pitxit dji Om-la pa vini pu ie siavi'l, më pu li siavi i bai so lavi pu sove boku mun. ²⁹ Kã Jezi i so djisip-iela sotxi dji Jehiko, un ghã kãtxite mun te ka siuv Jezi. ³⁰ Dê mun ki pa te ka ue, ie te asi obo ximë, ie tãde ki Jezi te ka pase ie kumase hele: Sëie, Pitxit dji Davi, gãië lapen dji no! ³¹ Më ban mun-iela te ka babie pu ie pa te hele, më ie kõtxinë hele plis fo: _Sëie, Pitxit dji Davi, gãië lapen dji no! ³² Ëbe Jezi hete li aple ie, i li dumãde: akisa zot le ki mo fe? ³³ Ie hepon: Sëie ki no uei-iela hete luvui. ³⁴ Jezi hete ke lapen dji dê mun ki pa ka ue-iela, Jezi tuxe lãdã ie ue-iela. Lãdã mem lokasiõ ie hete ue i ëbe ie suiv Jezi.