¹ Aphue ki Jezi fini kose sa pahol-iela, li sotxi dji Galileia, li ale pu hegiõ dji Judeia ki ka hete bo Levã dji lahivie Johdão. ² I ban mun-iela suiv Li, i laba li djiehi tut ki te malad-iela. ³ Ëbe un dê fahiseu phoxel ie te le hesi un kek laphuev kõt Li, ie dumãde'l: li bõ djivohsie dji u fam palakos nëpot bagaj? ⁴ Jezi hepon: zot pãko li sa ki Pahol Së dji: "lãdã kumasmã Bõdje fe ie om i fam?" ⁵ I Bõdje dji: "pu sa om-la ke lese papa i mãmã pu hasãble ke so fam, i ie dê ke fõmë selmã un ko." ⁶ Kõsa ie pa ke sa dê ãko, më un sel laxe; pase sa ki Bõdje hasãble, om-la pa ka sepahe. ⁷ Fahiseu-iela dumãde: Ëbe pukisa Moises dji lãdã lalua-la ki om-la puve bai un papie dji djivohsie pu so fam i pu li voie'l ale. ⁸ Jezi hepon: Moises bai sa piami-la palakos dji zot txo du; më lãdã kumasmã a pa te Kõsa. ⁹ Më mo ka dji: si kek mun djivohsie dji so fam, si a pa palakos dji pexe dji hete ke uot om, i om-la maie ke uot fam li ka fe pexe osi. ¹⁰ Djisip-iela dji: Si akõsa situasiõ ãt om-la i so fam, ëbe mio ie pa maie. ¹¹ Jezi hepon: Sa pahol-la a pa pu tut, më selmã pu sa ki Bõdje ke bai. ¹² pase li gãië hezõ djifehã ki ka tonë un dê om ïkapab pu maie: un, pase ie fet kõsa; uot pase ie xathe; i uot osi pãko maie palakos dji Lasosiete dji Lahosiel. Mun ki puve, asekte sa pahol-la. ¹³ Aphue dji sa, un dê mun pote ie tximun-iela pu Jezi mete so lãmë lasu ie i phuie, më djisip-iela babie sa mun-iela ki fe sa. ¹⁴ Jezi dji: lese ki tximun-iela vini kote mo i pa ïteãdji ki ie fe sa, pase Lasosiete dji Lahosiel a dji sa mun-iela ki sãble sa tximun-iela. ¹⁵ Ëbe Jezi mete so lãmë lasu ie i aphue li ale. ¹⁶ Un om hive phox dji Jezi li dumãde: Bõ Met, akisa mo puve fe pu gãië lavi ëtehnel? ¹⁷ Jezi hepon: Pukisa u ka dumãde mo a hespek dji sa ki bõ? Bõ gãië sel un; Bõdje. Si u le ãthe lãdã lavi ëtehnel, sehe sa zod-iela. ¹⁸ li dumãde : ki zod? Jezi hepon: "pa txue, pa deie uot fam, pa volo, pa fe mãto kõt pies mun, ¹⁹ hespete u papa i u mãmã kõtã uot-iela kumã u kõtã u phop ko". ²⁰ jon om-la hepon: mo ka obei tut sa zod-iela! akisa ka mãke mo fe? ²¹ Jezi hepon: u le hete jis, ale vãde tut sa ki u gãië, bai lajã pu mum ki pov-iela, i kõsa u ke gãië hixez laba lahosiel. Djila vini I suiv mo. ²² Kã Jon om-la tãde sa, li ale this, pase li te boku hix. ²³ Ëbe Jezi dji pu so djisip-iela: Ã lavehite mo ka dji pu zot. boku difisil un hix ãthe la Lasosiete dji Lahosiel. ²⁴ I mo ka dji ãko ki plis difisil un hix ãthe la Lasosiete dji Bõdje dji ki un xãmu pase lãdã thu dji un zedjui. ²⁵ Kã ie tãde sa, djisip-iela hete susphan ie dumãde: Ëbe, kimun ki puve sove? ²⁶ Jezi gade kote ie li hepon: pu mun-iela sa pa posib; më, pu Bõdje tut sa posib. ²⁷ Djila Pie dji: gade! No lese tut i no suiv u. Akisa no ke gãië? ²⁸ Jezi hepon: Ã lavehite mo ka dji pu zot: Kã ke hive mumã ki Bõdje ke fe tut nov i Pitxit dji Om-la ke asi la so xez "glorioso", zot , mo djisip-iela ke asi osi lãdã duz xez pu kõdãnë duz "pei(tribo) dji Ishael". ²⁹ I tut mun ki lese palakos dji mo: kaz, fue-iela, so-iela, papa, mãmã, pitxit o late, ke husuve sã fue pi boku i osi lavi ëtehnel. ³⁰ Boku ato ki sa phõmië ie ke sa djiãië, i boku ki sa djiãië ie ke sa phõmië.