¹ Un dê fahiseu i saduseu ale kose ke Jezi. Ie te le un kek laphuev kõt Jezi a pu sa ie dumãde pu li fe un mihak pu mõthe ki so povua ka vini mem dji Bõdje. ² Më Jezi hepon: Kã ke hive asue, zot ka dji:" Nõ ke gãië bõ tã, pase ki siel-la huj. ³ I bõmãte, zot ka dji: "ke tõbe lapli pase ki siel-la huj-suku".zot bië konet fe djifehãs dji siel-la, më sin dji tã-la zot pa konet. ⁴ Kumã pov dji jodla mixã i sã espua! zot ka dumãde dji mo un mihak, më mihak ki mo ke mõthe a mihak dji Jonas . Ëbe li sotxi i ale. ⁵ Kã djisip-iela pase pu bo Levã dji lag-la, ie blie pote djipë. ⁶ Jezi dji: zot hete veie i ãtãsiõ ke fehmëto dji fahiseu-iela i dji saduseu-iela. ⁷ Djisip-iela kumase kose un pu uot: Li ka kose sa pase no pa pote djipë. ⁸ Jezi tãde sa ki ie te Ka kose li dumãde: Pukisa, zot ka kose kumã li pa gãië djipë? kumã li pitxi espua ki zot gãië! ⁹ Zot pãko kõphan? zot pa ka xõje dji sëk djipë ki mo pataje pu sëk mil om? Kõbie pãië zot plë? ¹⁰ I sa set djipë-iela pu Kat mil om-iela? kõbie pãië zot plë? ¹¹ Zot pa ka kõphan ki mo pa ka kose a hespek dji djipë. Ãtãsio ke fehmëto dji fahiseu i saduseu-iela! ¹² Ëbe djisip-iela kõphan ki Li pa te ka kose pu ie te ãtãsiõ ke fehmëto ki te ka ise lãdã djipë, më ui ke sa ki ie te ka mõthe. ¹³ Jezi ale pu hegiõ ki ka hete phox dji Cesareia dji Felip. Laba li dumãde dji so djisip-iela: Akimun pov-la ka dji ki Pitxit dji Om sa? ¹⁴ Ie hepon: un dê ka dji Ki a Jã Batxist, uot ka dji ki a Elias, uot ka dji ki a Jehemias o un kek phofet. ¹⁵ Jezi dumade: I zot? akimun zot ka dji ki mo sa? ¹⁶ Simõ Pie hepon: Sëie u sa Khi, Pitxit dji Bõdje vivã. ¹⁷ Jezi dji:Simõ, pitxit dji Jã,u kõtã pase ki sa lavehite-la a pa pies mun dji late ki mõthe pu u, më vini djihekmã dji mo Papa ki lahosiel. ¹⁸ Ëbe, no ka dji: u sa Pie, i lasu sa hox-la Mo ka edjifike mo leglis i në lamo-la pa puve gãië ¹⁹ Mo ke bai pu u lakle-iela dji lasosiete dji lahosiel; kisa u ïtëãdji lasu late mo ke ïtëãdji lahosiel, akisa u asekte lasu late mo ke asekte lahosiel. ²⁰ Ëbe Jezi bai zod pu so djisip-iela pa hakõte pu pies mun ki li te sa Messias. ²¹ djila pu djivã, Jezi kumase dji pu so djisip-iela : Mo buëzë ale pu Jehusalém, i laba lidehãs dji judeu-iela, xef dji sasedotxi-iela i met-iela dji lalua ke fue mo sufui boku. Mo ke muhi, i lãdã thoasen ju, mo ke hesusite. ²² Ëbe Pie ale ke Li un khã i li kumase babie'L, li dji: -Li Bõdje pa ke fe sa hive! sa pa jë ke hive ke u Sëie! ²³ Jezi vihe li dji pu Pie: sotxi dji obo mo, Satã! u sãble un hox lãdã mo ximë pu fe mo tõb, u ka majinë kumã un om ka majinë i nõ kumã Bõdje ka majinë. ²⁴ I Jezi dji pu so djisip-iela: "si un kek dji zot, le tone mo siavito kuiënë u phop ko, phã u lakhue i suiv mo. ²⁵ Si nëpot ki le sove so lavi li ke piad li, më nëpot ki pu mo piad so lavi, sa ke thuve so lavi. ²⁶ ki vale si un kek mun gãië tã-la ãtxe, më li piad vuemã lavi-la? Pa gãië ãië ki puve peie pu li gãië lavi-la ãko. ²⁷ Pitxit dji Om ke vini lãdã (gloria) dji so Papa ke so zãj-iela i ëbe li ke bai hekõpãs pu thavai ki xak un fe. ²⁸ Ã lavehite mo ka dji pu zot: Esi la gãië un dê mun ki pa ke muhi ãvã dji ie ue Pitxit dji Om kumã un Vue.