¹ Ëbe un dê fahiseu i met-iela dji lalua phoxe Jezi pu ie dumãde: ² pukisa u djisip-iela pa ka obei mias dji ghã-mun lõtã-iela? Ie pa ka lave ie lãmë ãvã ie mãje. ³ Jezi hepon: i zot pukisa ka desobei zod dji Bõdje ke zot thadjisiõ? ⁴ Pase Bõdje dji: kõtã u papa ke u mãmã; mun ki madjixonë ie papa o ie mãmã ie mehite muhi! ⁵ Më zot dji: "mo ke ofui pu Bõdje, sa ki mo te puve bai pu zot, sa pa buëzë kõtã so papa i so mãmã. ⁶ Kõsa zot ka anule pahol dji Bõdje palakos dji zot thadjisiõ. ⁷ Hipokhita! phofet Isaías bië phofetxize suje zot, kã li dji: ⁸ Sa pov-la ka adohe mo selmã dji lapo bux; më so txo luë dji mo. ⁹ Bõtxo zot ka adohe mo, zot ka mõthe konetmã dji zot phop lide, kumã si a zod dji Bõdje. ¹⁰ Jezi aple ban mun-iela obo'l li dji: zot kute i zot kõphan. ¹¹ A pa sa ki ka ãthe pu bux ki ka kõtãmine om-la; më ui sa ki ka sotxi dji no bux, sa la ka kõtãmine om-la. ¹² Ëbe djisip-iela hive obo Jezi ie dji: u save ki pa bai ke fahiseu-iela ie gu kã ie tãdë sa pahol-iela? ¹³ Më li hepon: tut plã ki mo Papa ki lahosiel pa plãte Li ke haxe'l pa so hasin. ¹⁴ Lese ie, a mun ki pa ka ue ka kõdji uot ki pa ka ue. Si sa ki pa ka ue-la ka kõdji un uot ki pa ka ue, ie dê ke tõbe lãdã mem thu. ¹⁵ Pie dji pu li: esplike no sa Kopahasiõ-la! ¹⁶ Jezi hepon: juk zot mem, pa ãko kõphan? ¹⁷ Zot pa save sa ki ka ãthe pa bux ka pase pu lestomak i aphue li ka sotxi dji no ko. ¹⁸ Më bagaj ki ka sotxi dji bux li ka vini dji no txo. A sa-iela ka kõtãmine mun. ¹⁹ Pase a dji li ka vini mal majinasiõ, lamo, (adulterio), fohnikasiõ, volo, mãto, fo akuzasiõ. ²⁰ Sa bagaj-iela ka kõtãmine mun; më mãje sã lave lãmë pa ka kõtãmine mun. ²¹ Jezi sotxi dji laba, li ale pu hegiõ ki ka hete phox dji pei dji Tiho i Sidõ. ²² Un fam kananeia, ki vini dji sa hegiõ-iela, li te ka klãmë; Sëie Pitxit dji Davi, gãië lapen dji mo pitxit, un demuë ka thumãte'l boku. ²³ Më Jezi pa hepon ãië. Ëbe djisip-iela phoxe Jezi ie dji: voie sa fam-la ale, pase li ka vini deie no ka fe boku thë. ²⁴ Jezi hepon: Mo vini selmã pu sa mutõ ki pedji dji kaz dji Ishael. ²⁵ Ëbe li vini ãjunü djivã Jezi, li dji: Sëie, ide mo! ²⁶ Më Jezi hepon pa jis phã djipë dji pitxit-iela i voie pu txixë-iela.