¹ Lãdã sa tã-la Herodes guvelmã-la tãde nuvel a hespek dji Jezi. ² Ëbe li dji pu so siavito-iela: sa om-la a Jã Batxist, ki hesusite dji lamo, Apusa li gãië povua pu fe mihak. ³ Pase Herodes te phui Jã, li ãxënë'l, pu li voie'l la phuiziõ, li te fe palakos dji Herodias fam dji so fue Felip. ⁴ Pase Jã Batxist te dji boku fue pu Herodes" la no lua u pa te puve maie ke Herodias! ⁵ Herodes te le txue'l, më li te hete pe dji pov-la, pase ie te ka kõsidehe'l kumã un Phofet. ⁶ Më ju dji anivehse dji Herodes, pitxit dji Herodias dãse djivã mun-iela i Herodes hete kõtã boku. ⁷ Apusa li phomet bai tut sa ki txifam-la dumãde dji li. ⁸ Li suiv kõsei dji so mãmã, li dumãde: Mo le tet dji Jã Batxist ato mem lãdã un asiet. ⁹ Vue Hehodes hete boku this, më palakos phomes ki li fe djivã mun-iela ki te la so phuezãs, ëbe li bai zod pu ie fe sa ki txifam-la dumãde. ¹⁰ Ëbe li voie hõie tet dji Jã Batxist la phuiziõ. ¹¹ Ëbe ie pote so tet lãdã un asiet, ie bai pu txifam-la, i li ale pote'l pu so mãmã. ¹² Ëbe so djisip-iela vini sase so ko pu ie ãtehe'l. Aphue ie ale viatxi Jezi. ¹³ Aphue ki Jezi hete save dji ki te hive, li sotxi lãdã un bato, li ale un kote luë, ãfe dji hete li tu sel. Më kã mun-iela hete save kote li te fika, ie sotxi dji ie pei-iela pu ie suiv li ka maxe. ¹⁴ Më Kã sotxi dji bato-la, li ue mun-iela, li hete ke lapen dji ie, li djiehi boku ki te malad ki te laba osi. ¹⁵ Te asue deha djisip-iela hive phox dji Jezi ie dji:" li deha asue, sa kote la pa gãië ãië, voie sa mun-iela ale pu ie vil-iela, pu ie axte mãje pu ie mãje". ¹⁶ Më Jezi hepon: ie pa buëzë ale. A zot mem pu bai mãje pu ie. ¹⁷ Më ie dji: nõ pa gãië ãië esi selmã sëk djipë i dê puasõ. ¹⁸ Jezi dji: zot pote ie esi pu mo. ¹⁹ Ëbe li voie mun-iela asi ale txihadje-iela. Ëbe li phã sëk djipë-iela i dê puasõ-iela, li gade pu lahosiel li humiasi Bõdje. Phue li pataje sëk-iela ke dê puasõ-iela i li bai pu so djisip-iela, pataje pu mun-iela. ²⁰ I tut mun-iela mãje ke plezi i so djisip-iela hamase duz pãië plë dji sa ki te hete. ²¹ I sa ki mãje-iela ale phox sëk mil om, sã kõte fam i tximum-iela. ²² Aphue dji sa, Jezi voie so djisip-iela ãthe lãdã bato-la, pu ie ale djivã, Pu uot bo lahivie-la, ëkãt li ka voie mun-iela ale. ²³ Aphue ki li voie mun-iela ale, li mõte ãle un mõtãi pu li phuie. Kã hive nuit-la li te laba tuju selmã li tu sel. ²⁴ Ëkãt sa, djisip-iela te luë dji late,ie te ka bhuiga kõt gho lãme, pase un gho vã te leve. ²⁵ Më deha ãvã ju, ãt thoa ze i i six ze, Jezi ale laba kote ie, ka maxe lasu djilo. ²⁶ Kã djisip-iela ue Jezi ka maxe lasu djilo-la, ie hete boku pe, ie dji: a un bet! ie hele dji pe. ²⁷ Më lãdã sa lokasiõ Jezi kose li dji pu ie: kohaj! a mo! zot pa buëzë hete pe! ²⁸ Ëbe Pie dji: "Sëie, si a u mem, fe mo ale ka maxe lasu djilo juk kote u fika". ²⁹ Jezi hepon: "vini".Ëbe Pie sotxi dji bato-la li kumase maxe lasu djilo-la li ale la djihesiõ dji Jezi. ³⁰ Më, kã li ue fos dji vã-la, li hete pe, li kumase ale pu ofõ, li hele: Sëie, sove mo! ³¹ la mem lokasiõ Jezi lõje so lãmë li txëbe'l li dji: om u espua pitxi, pukisa u khe un moso? ³² Kã ie dê ãthe ãdjidã bato-la vã-la kalmë. ³³ Ëbe so djisip-iela ki te lãdã bato-la, ie hive phox dji li pu ie adohe'l, ie dji vuemã u sa Pitxit dji Bõdje. ³⁴ Kã ie pase pu uot bo lahivie-la, ie hive la hegiõ dji Genesahe . ³⁵ Kã mun-iela dji sa kote-la hukonet li ie kate so nuvel pu tut hegiõ-la ãtxe. Ëbe ie pote tut sa mum ki te malad-iela pu li djiehi. ³⁶ Ie te ka dumãde pu li lese tut ki te malad-iela tuxe selmã obo so lëj. I tut ki te ka tuxe ie te ka djiehi.