¹ Lãdã sa mem ju-la Jezi, sotxi dji so kaz li ale obo lag dji Galileia, li asi, laba li kumase mõthe. ² mun-iela ki te asi obo li, te boku ki li ãthe lãdã un bato li asi; i mun-iela hete djibut. ³ Jezi hakõte boku Kopahasiõ, li mõthe boku bagaj. Li dji zot kute! un om sotxi sõmë. ⁴ Kã li te ka sõmë ghen-fui, un dê tõbe obo ximë, i txisoso mãje tut, ⁵ uot ghen-fui tõbe kote gãië hox, i pitxi late, ghen-fui-iela puse vit, pase late-la pa te fõ. ⁶ Më, kã solei-la pahet, li bule i txue plã-iela, ie hete sek, pase ie pa te gãië hasin, ⁷ uot ghen-fui tõbe lamitã pikã, ie puse më ie tufe. ⁸ Më ghen-fui ki tõbe lãdã bõ late, li puse li bai fui, un ghen-fui bai uot sã,uot soasãt djix, i uot thãt. ⁹ Mun ki gãië zohe, kute. ¹⁰ Ëbe so djisip-iela hive obo li ie dji: pukisa u ka ise Kopahasiõ pu kose ke mun-iela? ¹¹ Jezi hepon: pu zot Bõdje ka mõthe seghe dji lasosiete dji lahosiel, më pu ie, nõ. ¹² Mun ki gãië husuve plis, pu li gãië boku. Më mun ki pa gãië, juk txisoso ki ie gãië ie ke piad. ¹³ A pu sa mo ka ise Kopahasiõ pu kose ke sa mun-iela, pase ki ie ka gade më ie pa ka ue; ie ka tãde më ie pa ka kute i kõphan. ¹⁴ Akõsa ka hive ke sa mun-iela sa ki "phofet Isaías dji: zot ke tãde, më zot pa ke kõphan, zot ke gade, më zot pa ke ue ãië. ¹⁵ Pase mëmua dji sa mun-iela fõmë: ie buxe ie zohe i fõmë ie uei, si ie pa te fe sa, ie te puve ue, i ie te puve tãde ke zohe ie te ke kõphan ke ie mëmua, ie te hutonë pu mo, mo te ke djiehi ie! Bõdje dji. ¹⁶ Jezi kõtxinë kose: Më zot, kumã zot kõtã! Pase zot uei ka ue, i zot zohe ka tãde. ¹⁷ Ã lavehite mo ka dji pu zot: boku phofet i boku uot mun-iela dji pov dji Bõdje te ãvi ue sa ki zot ue, më ie pa puve; ie te ãvi tãde sa ki zot tãde, më ie pa tãde. ¹⁸ Ëbe zot kute i ãphan sa Kopahasiõ dji "om ki sotxi pu sõmë " akisa li le dji . ¹⁹ Tut ki ka kute pahol dji Bõdje, i pa ka kõphan, ie kumã ghen-fui ki tõbe obo ximë, elmi-la ka vini li ka txihe tut sa ki sõmë lãdã so txo. ²⁰ Sa ghen-fui ki tõbe kote ki pa gãië hox, a mun ki ka tãde pahol dji Bõdje ie ka asekte vit ke kõtãtmã, ²¹ më li pa ka duhe boku, pase li pa gãië hasin. I, kã palakos dji pahol dji Bõdje ka hive sufãs, thibulasiõ, ie ka ãbãdõnë ie espua. ²² Uot mun-iela sãble sa ghen-fui ki tõbe lamitã pikã, ie ka kute pahol dji Bõdje, më pheokupasiõ dji tã-la i ilusiõ dji hixez-iela ka tufe pahol-la, i sa mun-iela pa ka bai fui. ²³ I ghen-fui ki sõmë lãdã bõ late, a sa mun-iela ki ka kute i kõphan pahol dji Bõdje i ie ka bai fui, un ka bai sã, uot ka bai soasãt djix i uot thãt. ²⁴ Jezi hakõte uot Kopahasiõ, li dji pu mun-iela: lasosiete dji lahosiel akumã un om ki sõmë bõ ghen-fui lãdã so late. ²⁵ Më, ëkãt om-la te ka dhomi, vini un elmi, i sõmë lamitã dji fahin fãs u plã ki pa bõ(joio), i dji-la li ale. ²⁶ Kã plã-iela puse,i ie bai fui i plã ki pa bõ(joio)-la pahet osi. ²⁷ Kã thavaio-iela dji pathõ la hive ie dji: "Pathõ, u sõmë ghen-fui ki bõ lãdã u late. dji kote sa plã ki pa bõ-la (joio) vini"? ²⁸ li hepon."a un kek elmi ki fe sa". Ie dumãde dji pathõ-la: Pathõ u le ki no haxe plã ki pa bõ-la(joio)"? ²⁹ Li hepon: nõ, pase Kã zot ke haxe plã ki pa bõ-la (joio), veie zot haxe osi fahin fãs-la. ³⁰ Zot lese fahin fãs-la i plã ki pa bõ-la(joio), puse ãsam, lãdã sesõ pu haxe plã-iela. Ëbe mo ke dji pu thavaio ki ke haxe plã-iela:"haxe phomet plã ki pa bõ-la(joio), i mahe ie ã patxe pu bule ie. Aphue pu haxe fahin-fãs la, pu mete la so depos". ³¹ Jezi hakõte uot Kopahasiõ. Li dji pu mun-iela: lasosiete dji lahosiel, akumã un ghen dji Mostarda, ki un om, sõmë lãdã so late. ³² Li pipitxi dji tut ghen-fui-iela; Më, kã li puse, li ka hete pi gho pase uot plã-iela. Li ka tonë un piebua, dji mãië ki txisoso-iela ka vini, ie ka fe ie nik lasu so bhãx-iela. ³³ Jezi hakõte uot Kopahasiõ pu mun-iela: lasosiete dji lahosiel akumã un(fehmëto), ki un fam phã pu fe djipë, li mete um tximoso (fehmeto), lãdã thoa kilo dji fahin-fãs, tut fahin-la hete ke (fehmëto). ³⁴ Jezi te ka ise Kopahasiõ pu pale pu mun-iela. Li pa te pale ãië pu ie sã a pa te ã Kopahasiõ. ³⁵ Sa hive pu kõphui ki phofet te dji: "mo ke ise Kopahasiõ kã mo ke pale ke sa mun-iela i mo ke esplike bagaj ki pa konet, dji kumasmã dji tã-la". ³⁶ Ëbe Jezi lese mun-iela i li ale pu so kaz. Djisip-iela hive obo li ie dji: hakõte pu no akisa ki a Kopahasiõ dji plã ki pa bõ-la(joio). ³⁷ Jezi hepon: mun ki sõmë bõ ghen-fui a Pitxit dji Om. ³⁸ Savan-la a tã-la, ghen-fui ki bõ, a mun-iela dji lasosiete dji lahosiel; i plã ki pa bõ-la(joio), a mun-iela dji elmi-la. ³⁹ elmi ki ka sõmë plã ki pa bõ(joio), a phop djiab-la. I haxe, Hamase a finisiõ dji tã-la, sa ki ka haxe i hamase a zãj-iela. ⁴⁰ Kõsa kumã "plã ki pa bõ" ie ke hamase i jite lãdã djife, kõsa osi lãdã finisiõ dji tã-la. ⁴¹ Pitxit dji Om ke voie so zãj-la, ie ke hasãble, i tihe dji lasosiete dji lahosiel tut sa ki ka fe uot-iela fe pexe, i osi tut ki kõtã fe djimal. ⁴² I aphue zãj-iela ke jite sa mun-iela lãdã ghã djife, kote ie ke khie i mode ie dã dji Dulo. ⁴³ Ëbe, pov dji Bõdje ke klehe kumã solei-la lãdã lasosiete dji so Papa, si zot gãië zohe pu kute, ëbe kute. ⁴⁴ lasosiete dji lahosiel akumã un hixez dji ghã vale ki sehe lãdã un ghã Savan, ki un om thuve i li sehe ãko. Li hete boku kõtã, li vãde tut kisa li te gãië i axte savan-la. ⁴⁵ lasosiete dji lahosiel osi kumã un om ki ka maxe deie hox dji ghã vale, ⁴⁶ kã li thuve hox dji ghã vale, li ale vãde tut ki sa li gãië i li axte hox dji vale-la. ⁴⁷ lasosiete dji lahosiel, akumã un thamaj ki ie jite lãdã un lag. Li txëbe tut kalite puasõ. ⁴⁸ I, kã li hete plë, pexo-iela, hale'l obo lag-la i asi pu ie sepahe puasõ-iela. Sa puasõ ki bõ ie mete lãdã ie pãië, i sa puasõ ki pa bõ ie jite deho. ⁴⁹ ke kõsa osi lãdã finisiõ dji tã-la. Zãj-iela ke sotxi, ie ke sepahe mun ki mixã dji mun ki bõ, ⁵⁰ ie ke jite mun ki mixã lãdã ghã djife. I laba ie ke khie i mode ie dã dji dulo. ⁵¹ Ëbe Jezi dumãde dji so djisip-iela: zot kõphan sa bagaj-iela? Ie hepon ui. ⁵² Jezi tut met dji lalua ke tone djisip lãdã lasosiete dji lahosiel, sãble un met dji un kaz, ki tihe dji so depos bagaj ki nov i bagaj ki veie. ⁵³ Kã Jezi fini dji hakõte sa Kopahasiõ-iela, li sotxi dji laba. ⁵⁴ Li hutonë pu pei dji Nazahe, kote li te ka hete. Li te ka mõthe lãdã sinagog-iela, i sa ki te ka kute ie hete susphan i ie dumãde. dji kote vini so konetmã i povua ki li gãië pu fe mihak? ⁵⁵ a pa pitxit dji José, sa ki ka thavai kaz? so mãmã a pa Mahi? li a pa fue dji Txiago, José, Simõ i Judas? ⁵⁶ Tut so so-iela pa ka hete esi? dji kote li hesi gãië tut sa? ⁵⁷ Ie hete boku kole, ke li: Më Jezi dji: un Phofet ie ka hespete tut kote li ale, selmã la so late i so kaz ki ie pa ka hespete li. ⁵⁸ Jezi pa fe boku mihak laba, pase ie pa te gãië espua.