¹ Sis ju aphue Jezi ale pu un mõtãi hot, ale ke li selmã Pie, Txiago i so fue Jã. ² Ëbe laba li mudjifike djivã ie, so vijaz klehe kumã solei-la, so lëj hete blã kumã un klehite. ³ Lãdã sa mem mumã-la pahet djivã ie Moises ke Elias ka kose ke Jezi. ⁴ Ëbe Pie dji pu Jezi: Sëie kumã li bõ ki no esi la. Si u le mo ka fe thoa bahak lãdã sa kote-la: un pu U, un pu Moises, I un pu Elias. ⁵ Ëkãt Pie te ka kose tuju, un nuaj dji klehite khuvui ie sotxi un vue dji nuaj-la: Sa la a mo Pitxit ki ka pote pu mo boku kõtãtmã. Zot kute akisa li ka dji. ⁶ Kã so djisip-iela tãde, ie hete ãjunü ke ie vijaz lasu late-la, ie hete boku pe. ⁷ Jezi phoxe ie, li tuxe ie li dji: zot leve pa buëzë hete pe! ⁸ Kã ie leve, ie gade, ie pa ue pies mum, a te selmã Jezi. ⁹ Ëkãt ie te ka desan dji mõtãi-la Jezi dji sa zod-la pu ie: zot pa hakõte pu pies mum sa ki zot ue, juk tã "Pitxit dji Om-la ke hesusite dji lamo. ¹⁰ So djisip-iela dumade'l: Pukisa,ëbe met dji lalua-iela ka dji Elias gãië pu vini phõmië? ¹¹ Jezi hepon ie: A lavehite Elias ke vini pu phuepahe tut bagaj. ¹² Mo ka dji pu zot ki Elias deha vini, më ie pa hukonet li. Më ie malthete'l kumã ie te le. Kõsa osi ie ke malthete Pitxit dji Om-la. ¹³ Ëbe so djisip-iela kõphan ki Jezi te ka pale a hespek dji Jã Batxist. ¹⁴ Kã ie hive phox dji ban mun-iela, un om phoxe jezi li ãjunü djivã'l I li dji: ¹⁵ Sëie gãië lapen dji mo pitxit, khis ka phã li boku fo, ki boku fue li ka tõbe lãdã djife, i lãdã djilo. ¹⁶ Mo pote'l pu u djisip-iela më ie pa hesi djiehi'l. ¹⁷ Jezi hepon: gehasiõ ki mixã i sã espua juk ki tã mo ke hete ke zot? juk ki tã mo ke sipote zot? zot pote tximun-la esi la pu mo. ¹⁸ Ëbe jezi bai zod pu demuë-la sotxi li sotxi, i lãdã mem lokasiõ tximun-la hete djiehi. ¹⁹ Aphue so djisip-la phoxe selmã Jezi i ie dumãde'l: Pukisa no pa hesi txihe demuë-la? ²⁰ Jezi hepon ie: pase zot espua pitxi, ã lavehite mo ka dji zot, si zot espua te gãië ghoso dji un ghen dji mustahd, zot te puve dji pu sa mõtãi-la,"sotxi dji esi la, ale pu laba li te k'ale. I ãië pa te ïposib. ²¹ (më sa kalite demuë-la u ka sel txihe ke boku phuie I jënë). ²² Ëkãt ie te ka hasãble la Galileia, Jezi dji pu ie: ie ke hãde Pitxit dji Om-la la lãmë dji om-iela. ²³ I ie ke txue'l, më lãdã thoazen ju-la li ke hesusite. I djisip-iela hete boku this. ²⁴ Kã Jezi ke so djisip-iela hive la pei dji Kafahnaum, mun ki ka hamase xahite-iela, ale kote Pie ie dumãde: zot Sëie pa ka peie kõt dji kaz dji adohasiõ? ²⁵ Pie hepon: Li ka peie ui. Aphue Pie ãthe ãdjidã kaz-la, më ãvã Pie kose un kek bagaj, Jezi dji: akisa u ka thuve Simõ ? akimum ka peie xahite i kõt pu vue-iela dji tã-la? a phop mun dji pei-la o ëthãje-iela. ²⁶ Pie hepon: A ëthãje-iela! Jezi dji pu li: Ëbe ie phop mun-iela pa buëzë peie. ²⁷ Më no pa le demãtxi ie. Pusa ale obo lahivie voie u zë phõmië puasõ ki u ke txëbe, luvui so bux u ke thuve un ãghënë. Ëbe ale i peie ke li mo kõt i u pa.