¹ Kã Jezi fini dji bai sa zod-iela pu so djisip-iela, Li sotxi pu mõthe i ãnüsie so pahol lãdã pei-la. ² I Jã Batxist, ki te la phuisiõ, li save dji tut sa bagaj, ki Jezi te ka fe. Pu sa li voie so djisip-iela pu dumãde dji Jezi: ³ U sa ki djivet vini, o no ke ãtan uot? ⁴ Jezi hepon:"zot tonë kote Jã i pale pu li sa ki zot tãde i zot ue. ⁵ Mun ki pa ka ue, ka ue, Mun ki ëvalid ka maxe, Mun ki gãië bobo ie hete phop, mun ki pa ka tãde ie ka tãde, i mun ki muhi ka hesusite ãko, i bõ nuvel ka ãnüsie pu mun-iela ki pov. ⁶ Bië kõtã sa mun ki pa lese dji khe lasu mo. ⁷ Ëkãt djisip-iela dji Jã ale, Jezi kumase pale a hespek dji pu mun-iela:"ki kalite om zot ale gade la kote pa gãië ãië(deserto)? un txipiebua ki vã ka sukuie? ⁸ Akisa zot te ãtan ue? un om ki ka ise lëj xe? nõ, mun ki ka sie lëj xe ka hete lãdã kaz dji vue-iela. ⁹ Zot te ka sase un Phofet? ui, li sa plis ki un Phofet. ¹⁰ Jã a on ki pahol së-la te dji: Mo voie un om pu pase mo mësaj, djivã dji u i li phuepahe u ximë ¹¹ Ã lavehite mo ka dji: dji tut om, ki fet dji fam, pa gãië ki ïpohtã pase Jã. Pipitxi dji lasosiete dji lahosiel pi ïpohtã pase li. ¹² I dji pi ju dji Jã Batxist, lasosiete dji lahosiel ie ka phã li pa fos, i sa ki ka ise dji fos ka phã li. ¹³ Pase, ãvã Jã vini, tut phofet-iela i lalua dji Moisés te ka pale a hespek dji Jã. ¹⁴ I, si zot le khe lãdã ie pahol, ki Jã a Elias, ki te ke vini. ¹⁵ Si zot gãië zohe pu kute, ëbe kute. ¹⁶ Më ke kisa mo puve kõpahe sa jehasiõ? li sãble tximun-iela ki ka jue la plas, un ka hele pu uot: ¹⁷ "no jue lamisik dji lamaiaz, më zot pa dãse! no xãte lamisik dji lamo, më zot pa khie". ¹⁸ Kã, Jã pahet li pa te abitue mãje i bue lamitã mun, i zot dji: li ke demuë. ¹⁹ I Pitxit dji Om, ki ka mãje i bue ,zot dji: Li ghumã i li ka bue boku, li sa kamahad dji publikan-iela i mun ki gãië pexe. Më konetmã-la a laphuev dji thavai ki u ka fe. ²⁰ Ëbe Jezi kumase denüsie pei-iela kote li fe boku mihak, pase mun-iela pa hepãtxi dji ie pexe. Jezi dji: ²¹ Dulo i aflisiõ, pu zot, pei dji Kohazim, i Betsaida! Pase sa mihak-iela ki mo fe pu zot, si mo te fe lãdã pei dji Tiho i dji Sidõ, ie mun-iela te deha hepãtxi dji ie pexe-iela kõtã. I pu mõthe ki ie te hepãtxi ie te ke fuhe lëj dji sak i jite san lasu ie tet. ²² Mo ka dji pu zot, ki lãdã ju dji kõdënasiõ, Bõdje ke gãië boku lapen dji Tiho i Sidõ, pase dji zot, Kohazim i Betsaida. ²³ u, pei dji Kafahnaum, u ka majinë ki u ke mõte pu lahosiel? Ie ke jite u lãdã pei dji mun ki muhi-iela. Pase si te fe mihak-iela lãdã Sodoma, kumã ie fe lãdã u, li te djibut juk jodla. ²⁴ Mo ka dji ki lãdã ju dji kõdënasiõ, Bõdje ke gãië lapen dji Sodoma, pase dji u, Kafahnaum. ²⁵ Lãdã sa lokasiõ, Jezi phuie dji sa mãië:"Papa, Sëie dji siel i late, mo ka humiasi u, pase u sehe sa bagaj-iela dji mun ki ïtelijã i u mõthe pu sa mun ki pa gãië boku ïtelijã. ²⁶ Ui, Papa a te u plesi fe sa. ²⁷ Mo Papa bai mo tut bagaj, pies mun pa save akimun pitxit-la, si nõ papa-la; pies mun pase akimun papa-la, si nõ pitxit-la i osi mun ki Pitxit-la le mõthe, akimun Papa sa. ²⁸ Vini kote mo, zot tut ki fatxige dji xaie zot xaj ki pesã, mo ke fe zot pose. ²⁹ Zot suiv mo i ãphan ke mo, pase mo bõ, i mo gãië un txo ke ghã kõtãtmã, i zot ke thuve salvasiõ pu zot nam. ³⁰ Thavai ki mo ka dumãde dji zot fasil, i xaj ki mo ka mete lasu zot leje.