¹ Jezi aple so duz djisip-iela, li bai povua pu ie txihe lesphui demuë, i pu djiehi tut kalite maladji. ² I nõ dji so duz djisip-iela: phõmië, Simõ, ki ie aple Pie, i so fue Ãdhe; Txiago, Pitxit dji Zebedeu, i so fue Jã; ³ Filip i Bartolomeu; Tomé, i Matxie publikan-la; Txiago, pitxit dji Alfeu; i Tadeu; ⁴ Simõ kananeu-la, i Judas Iskahiote, ki kuiënë Jezi. ⁵ Jezi voie sa diz on-iela, li bai un zod pu ie: zot pa ale kote nõ-judeu-iela ka viv, pa ãthe lãdã pie dji "samahitan-iela". ⁶ Zot ale kote mutõ ki pedji-iela dji kaz dji Ishael. ⁷ Zot ale ãnüsie sa :" ki lasosiete dji lahosiel phox". ⁸ Zot djiehi mun ki malad, hesusite mun ki muhi djiehi mun ki gãië bobo, i txihe demuë dji mun: pase zot husuve ghatxuit i so bai osi ghatxuit . ⁹ Zot pa ale ke lo, nï "prata " i "Cobre" sehe lãdã zot sëtxie. ¹⁰ Lãdã sa voiaj pa ale ke sakol, në ke uot pe lëj, në savat, në batõ pu sutuni u ko; pase thavaio-la gãië dhue dji husuve sa ki li buesë pu li viv. ¹¹ Lãdã nëpot pei i vilaj ki zot ãthe zot gade un mun ki lê husuve zot, i zot hete la so kaz juk mumã ki zot ale dji sa pei-la. ¹² Kã zot ãthe lãdã un kaz, zot dji "ki kõtãtmã hete lãdã sa kaz-la!" ¹³ Si sa mun-iela dji kaz-la husuve zot bië, ki saudasiõ dji kõtãtmã hete ke ie. Më si ie pa husuve zot bië, zot tihe saudasiõ-la dji ie. ¹⁴ I si Lãdã un kek kaz o pei mun-iela pa le husuve, në kute zot pahol, kã zot sotxi dji sa kaz o pei-la sukuie lapusie dji zot savat. ¹⁵ Ã lavehite mo dji pu zot: lãdã ju dji kõdënasiõ, Bõdje ke gãië plis lapen dji Sodoma i Gomohha; pase dji sa pei-la. ¹⁶ Mo ka voie zot kumã mutõ-iela lamitã dji ban xë mixã; zot hete ãtãsiõ kumã siapã-iela i sëp kumã hãmië-iela. ¹⁷ Ãtãsiõ, pase zot ke ale phui, ie ke ale ke zot pu thibunal, ie ke fut zot lãdã ie sinagog-iela. ¹⁸ Pase zot sa mo siavito-iela, ie ke pote zot ou guvelmã-iela i vue-iela pu kõdãnë zot, i zot ke pale pu ie i pu nõ-judeu-iela dji no pahol. ¹⁹ Kã ie ke ale ke zot pu kõdãnë, pa hete thakase ke kisa pu zot kose o kumã pu zot kose, kã ke hive mumã, Bõdje ke bai pu zot sa ki zot ke kose. ²⁰ Pase pahol ki zot ke kose, a pa dji zot mem, më ke vini dji Lesphui dji zot Papa, ki ka kose pu zot. ²¹ Fue ke pote so phop fue pu lamo, kõsa papa osi ke so phop pitxit; i pitxit-iela ke leve kõt papa-iela, i ie ke txue ie. ²² Tut ke kõt zot pase zot ka suiv mo; më mun ki hete fiam juk lãdã finisiõ ke sove. ²³ Kã ie ke maxe pu txue zot, lãdã un pei, mahõ pu uot. Mo ka asihe zot ki sa a lavehite: zot pa ke fini kuhi tut pei-iela dji Ishael, ãvã vini Pitxit dji Om. ²⁴ Djisip pa pi hot pase so Met, në esklav-la pa hot pase so pathõ. ²⁵ Djisip-la djivet hete kõtã kumã li sãble so met, i esklav-la sãble so pathõ. Si ie aple un xef dji lafãmi dji gho xef demuë, kumã ie ke dji pu so lafãmi? ²⁶ Pa hete pe dji pies mun. Tut ki khuvui ke dekhuvui, i pa gãië ki ke bië sehe sã pa dekhuvui. ²⁷ Sa ki no ka dji pu zot lãdã suku, zot ãnusie lãdã klehite dji jonë. I sa ki zot tãde ãseghe ãnüsie pu tut. ²⁸ Pa hete pe, dji mun ki ka txue ko, më ie pa puve txue nam. Më hete pe dji Bõdje, ki puve dethi la lãfe u nam i u ko. ²⁹ Pa ka vãde dê txisoso pu un txi ãghënë? në un dji ie dê ke tõbe ate sã konetmã dji so Papa. ³⁰ Juk xive dji zot tet ie tut kõte. ³¹ Zot pa hete pe, zot gãië vale, pase un ban txisoso. ³² mun ki hukonet mo lamitã boku mun esi lasu late, mo ke hukonet li djivã mo Papa ki lahosiel. ³³ Më mun ki pa hukonet mo djivã mun-iela esi lasu late, mo osi pa ke hukonet li djivã mo Papa ki lahosiel. ³⁴ Pa majinë ki mo vini pote kõtãtmã esi lasu late! Mo pa vini pote kõtãtmã, më ui espad. ³⁵ Mo vini pu mete pitxit on kõt so papa, Pitxit fam kõt so mãmã, i belfi kõt so belmë. ³⁶ I elmï dji on-la ke la so phop kaz. ³⁷ Mun ki kõtã so papa i so mãmã plis ki mo, pa mehite suiv mo. Mun ki kõtã so pitxit-iela plis ki mo, pa mehite suiv mo. ³⁸ Mun ki pa phã so lakhue, i vini deie mo li pa kõtã mo. ³⁹ Mun ki thuve ie lavi ie ke piad li, i mun ki piad ie lavi pu mo ie ke thuve li. ⁴⁰ Mun ki husuve zot, ka husuve mo, i mun ki husuve mo osi ka husuve sa ki voie mo. ⁴¹ Mun ki husuve un phofet, pase li hukonet li kumã li ke husuve un hekõpãs dji phofet; i mun ki husuve un mun ki jis pase li hukonet li kumã un mun jis, li ke husuve un hekõpãs dji un mun jis. ⁴² Si un kek mun bai un goble djilo fue pu un dji no siavito-iela, ã lavehite mo ka dji: dji pies mãië li ke piad so hekõpãs.