¹ Jezi ãthe ãdjidã bato-la, li pase pu bo kuxã dji lag-la i li vini pu phop kote. ² Ëbe un dê om pote pu Jezi un mun pahalize kuxe ãle un lit. Kã Jezi ue ie espua, li dji pu pahalize-la: kohaj mo pitxit! u pexe-iela padõnë. ³ Ëbe un dê met dji lalua kumase dji ãt ie men: sa on ka fe mal pale kõt Bõdje. ⁴ Më Jezi te save ie lide: li dji pukisa zot ka majinë mal la zot txo? ⁵ Akisa ki pi fasil? pu dji: "u pexe-iela padõnë, o pu dji leve djibut i maxe"? ⁶ Më pu zot save ki Pitxit dji On gãië povua pu padõnë pexe, (li, ëbe, dji pu pahalize-la): djibut, phã u lit i a li pu u kaz. ⁷ I sa pahalize-la djibut i li ale pu so kaz. ⁸ Kã mun-iela ue sa, ie pe i ie glohifike pu Bõdje, ki bai sa tel povua pu on-iela. ⁹ I Jezi sotxi dji laba, lamitã ximë li ue un on ki ka phã zahite dji mun-iela, asi kote ie ka peie xahite , so nõ ate Matxie; i Jezi dji pu li suiv mo. Ëbe sa on-la leve i li suiv Jezi. ¹⁰ Sa fet ki, ëkãt Jezi te ka mãje la kaz dji Matxie boku publikan i uot mun ki mixã hive ie asi obo tab ke Jezi i so djisip-iela. ¹¹ Kã fahiseu-iela ue sa, ie dumãde dji djisip-iela: pukisa zot Met ka mãje ãsan ke publikan-iela i ke mun ki ka fe pexe? ¹² Kã Jezi tãde akisa ie dji: li hepon:" mun ki gãië lasãte pa buësë dji un metsë, selmã mun ki malad-iela. ¹³ I li dji: "ato zot ale ãphan sa signifikasiõ: Mo le ki zot mõthe kõtãtmã i nõ ki zot ofui sakhifis", pase mo pa vini aple mun ki jis, më ui mun ki gãië pexe! ¹⁴ Ëbe djisip-iela dji Jã Batxist ale kote Jezi ie dji: "pukisa u djisip-iela pa gãië labitxuid dji fe jënë, kumã no i fahiseu-iela? ¹⁵ Jezi hepon: puve mun-iela ki lãdã lafet dji un lamaiaz hete this ëkãt on ki maie-la ke ie? Më ke vini ju-iela ki on ki maie-la ke sotxi dji lamitã, ëbe mun-iela ke fe jënë. ¹⁶ Pies mun pa ka mete un pedas dji lëj nov lãdã un lëj vi e, pase lëj-la ke fã de, i li ke hete un gho fã de. ¹⁷ Pies mun pa ka mete djivë nov, lãdã butei dji lapo ki vie, si u fe sa, lapo-la ke fãde, djivë ke gate, i butei-la ke xakaia. Djivë nov ka sehe lãdã butei dji lapo ki nov kõsa u pa ka piad butei-la i djivë-la. ¹⁸ Ëkãt Jezi te ka dji sa bagaj-iela, um ofisial vini i ãjünü djivã Jezi, li dji:" Mo pitxit fam muhi ato mem, më vini i mete u lãmë lasu li, i li ke viv ãko". ¹⁹ Ëbe Jezi ale ke ofisial, i so djisip-iela osi ale. ²⁰ Lãdã sa mem lokasiõ-la , un fam ki te ka sufui, duz ãnë dji (hemohagia), vini deie dji Jezi li tuxe Jezi lãdã bo dji so lëj; ²¹ fam-la majinë. "si mo selmã tuxe so lëj, mo ke djiehi", ²² Jezi tonë, Kã li ue fam-la li dji:"Pitxit hete kõtã! u espua djiehi u".djisa mumã-la fam-la hete djiehi. ²³ Kã Jezi ãthe lãdã kaz dji ofisial-la li ue ki mun-iela te ka fe gho thë, ²⁴ Li dji zot sotxi dji la, pase txifam-la pa muhi, më li ka dhõmi, më mun-iela ahi dji Jezi. ²⁵ Kã mun-iela sotxi dji laba, li ãthe lãdã xam-la, li phã txifam-la la so lãmë i li leve. ²⁶ Nuvel dji sa mihak kate pu tut hegiõ-la. ²⁷ Aphue Jezi sotxi dji laba, dê mun ki pa ka ue ale deie li, ie te Ka hele:"Pitxit dji Davi, gãië lapen dji no! ²⁸ Kã Jezi ãthe lãdã kaz, mun ki pa ka ue-iela phoxe'l, i Jezi dji pu ie:"zot ka khe ki no puve fe zot ue?"ie hepon:"ui Sëie". ²⁹ Ëbe Jezi tuxe lãdã ie uei li dji: Mo ka fe kõfom zot espua. ³⁰ Ie uei-iela hete luvui ie hete ue, Jezi bai un zod pu ie siaie;" zot pa hakõte pu pies mun". ³¹ Më ie dê ale ie hakõte, sa nuvel kate pu tut sa hegiõ-la. ³² Ëkãt sa dê on-iela te ka ale un on mud ki te ke demuë ie pote pu Jezi. ³³ Kã demuë ale, om mud-la kumase kose. Mun-iela hete susphan, " pase jãmë ie pa te ãko ue un bagaj kõsa la Ishael", ³⁴ më fahiseu-iela dji: a pu xef dji demuë-iela ki li ka txihe demuë-iela. ³⁵ Jezi te ka maxe pu tut pei-iela i tut pov dji hegiõ li te ka mõthe lãdã Katz dji Adohasiõ i ãnusie bõ nuvel dji Bõdje i li te ka djiehi tut kalite maladji. ³⁶ Kã li ue mu-iela li hete ke lapen dji ie, pase ie ãbãdonë, kumã bam mutõ ki pa gãië Pasteh. ³⁷ Li dji pu so djisip-iela: thavai-la boku, më thavaio-iela pa boku . ³⁸ Dumãde pu Met dji thavai-la, pu li voie pi boku thavaio pu thavai-la.