¹ Bene berhu, rhuli rhwabamenyesa obubabale bwa Nyamuzinda bwachiyerekene omu mashengero g'e Makedoniya. ² Omu malibuko manene babwene, obusime bunene n'obukene bunene by'ababurhire obugale bunene, okuhana bwenene. ³ Bulala bahanire obuhamirizi oku kulikirana n'obuhashe bwabo na kulusha obuhashe bwabo barhula nk'oku bagalire. ⁴ Barhuhema banashigirira mpu babone kushangira olukogo l'okukolera abachesibwa. ⁵ Arhali n'oku babahanire nk'okurhwalisimire, aliko bachihanire emwa Nahano, kandi emwerhu, oku bulonza bwa Nyamuzinda. ⁶ Rhwarholere Tito yamala ogu mulimo gwinja emwenyu, nk'oku agurhonderaga. ⁷ Nantyo, mukole bwinja mu buli chintu, omu bwemere, enganiro, omu bwenge, n'obushiru n'obusime bwenyu emwerhu; nantyo mubone obubabale bunene. ⁸ Nta derhere ntyo nka rhegeko, aliko okubushiru bw'abandi bantu, okuli k'obusime bwenyu. ⁹ Bulala muyinji obubabale bwa Nahano werhu Yesu Kristu, enyanya zenyu achijirire mukene, nabo aliri muchire, y'obukene bwage mugale kuchira. ¹⁰ Nganiza yani n'amahana, bulala bibakwanene, kumwabo mwarhondere kukola, s'aliko mw'abo mwagwarhire obulonza kurheng'omwaka gugerere. ¹¹ Bunola mumale kukola, y'okukolwa kwakarhi kugerere obushobozi bwenyu bushuzwa okubushiru mwakoleseze. ¹² Ey'omuntu akagwarha omurhima g'okuhana, Nyamuzinda ayemerer'echintu akahana kukulikira echintu aherhe, s'aliko birhakulikir'echarhaherhe. ¹³ Bulala ntaderhere ogu mwazi oku yabandi barhulera, nenyu mubabale, ¹⁴ s’aliko kukulikira erhegeko ly’oku nganangana: Omu malumwa gabunola gagale kurhabala onyifinjo zenyu. Yina malumwa genyu gagale kurhabala okunyifinjo zabo yi mweshi muba banganangana. ¹⁵ Nk’oku byayandikirwe: Owalirholagwire binene arhagwerhe kulush’abandi, n’owarholagwire bigeke arhalibulire. ¹⁶ Aliko Nyamuzinda akuzwe, yiwahirire obushiru omu murhima gwa Tito enyanya zenyu; ¹⁷ Bulala ayankirire amahuno gerhu, kandi agwarha obushiru n'obulonza bwage yenyine aja emwenyu. ¹⁸ Rhwamarhuma ola mwenewerhu, owasimirwe bwenene omu kagarhi k'omwazi gwinja omu mashengero goshi. ¹⁹ Arhanali ntya konyine, s'aliko alondwerwe na mashengero agenda omu lugenzi haguma nerhu mweyi myazi y'obubabale rhulirhwakolera okubukuze bwa Nahano, n'oku yerekana oku rhuchirheganyize. ²⁰ Yirhwakola ntyo, y'omuntu arharhuderhaga buligo enyanya zaguno mushalulo gunene rhulirhwakola; ²¹ Bulala rhuli rhwalonza echiri chinja, arhali embere za Nahano yenyine, s'aliko n'embere z'abantu. ²² Rhwamarhuma haguma nabo mwene werhu, rhwamalire kumugeregeza enchundo zinene rhwabona eyagwerh'obushiru omu mango ganene, aliko anagwerh'obushiru bunene bwenen'enyanya, z'omunihiro gunene agwerh'emwenyu. ²³ Ey'omuntu akalonza emyazi ya Tito, rhuba chigusho chiguma naye, rhukola haguma naye enyanya zenyu, n'enyenya za beneberhu, ziri ntumwa za mashengero n'obukuze bwa Kristu. ²⁴ Intyo mubahe, embere za mashengero echimenyiso ch'obuzigire bwenyu na munabayereke n'okurhugwerh'omwishingo enyanya zenyu.