¹ Muchigwarha ebi binihirizo, bazigirwa bani, rhuchichese na buli choshi chizingis'omubiri n'omuka, rhuchimal'obuchesibwa bwerhu omu buba bwa Nyamuzinda. ² Murhuhe aha rhwahanda omu mirhima yenyu. Ntaye rhwagomere, ntaye rhwa heker'ehyage, ntaye rhwalir'enyungu. ³ Kurhali kubahana kurhumire naderha ntya; bulala na malire derh'oku muli omu mirhima yerhu omu lufu n'omu kalamo. ⁴ Ngwerhe echinihirizo chinene omu kagarhi kenyu, ngwerhe choshi nankachivuga enyanya zenyu, nyunjwire oburhulirizi, omu kagarhi k'amalumwa gerhu goshi nyunjulirene omurhima kurhaluk'oluganjo. ⁵ Bulala, kurheng'okuhika kwerhu e Makedoniya, omubiri gurhahumukaga; rhwalibuzwa omu njira zoshi: ebirha embuga, n'obuba omu murhima. ⁶ Aliko Nyamuzinda orhuliriza abaluhire arhurhuliriza omu kuhika kwa Tito, ⁷ arhanali n'omukuhika kwage konyine, s'aliko kandi n'oku burhulirizi Tito alemaga ayunva oku lunda lwenyu: Arhushambalire obulonza bunene mugwerhe, emiziga, obushiru muherh'enyanya zani kugerera obusime bwani bwabere bunene. ⁸ N'okubahisa kwani omu maruba gani, ntakahungama, n'akaba nahungamire bulala nabwene okw'aga maruba gabagayisize, nachiro akaba omu mango maguma maguma. ⁹ Namachisima arhali okuba mwagayisizwe, s'aliko omugayo gwenyu gwarhumire mwahungama; bulala mwagayisizwe kugerera Nyamuzinda, yimurhabona echihano enyanya lyerhu oku mwazi goshi goshi. ¹⁰ Bulala, omugayo gurhenga ku Nyamuzinda guburh'oku chihana k'obuchunguke, alik'omugayo gw'egulu guburh'olufu. ¹¹ Lolaga, gunola mugayo gurhenger'e mwa Nyamuzinda gwalerhere obushiru omu kagarhi kenyu: yamabajira b'obushiru bunene, b'okuchiderhera bonyine, b'oku yerekana oku nta bubi, abakenga bwenene basimire kumbona bwenene, bachihana enyanya zani, n'abalonza kuhana obubi. Mwayerekene omu njira zoshi oku murhaligwerh'obubi mwebi byoshi. ¹² Akaba nabayandikire, erhal'enyanya z'owadukangene, changwa owadukirwe; byabaga by'obushiru bwenyu emwerhu buchiyerekene omukagarhi kenyu embere za Nyamuzinda. ¹³ Checharhumire rhurhulirizwa. Aliko haguma n'okurhulirizwa kwerhu, rhwasimisizwe bwenene kandi oku busime bwa Tito, n'okuntu arhuzizwe kugerera mweshi. ¹⁴ N'akaba nachikuzize bugeke enyanya zenyu embere zage, ntabonag'eshonyi, s'aliko okuba rhwashamber'okunali n'ebirhwachikuziz'embere za Tito byabere by'okuli. ¹⁵ Aliko basima kabiri omu kuyibuka obukenge bwenyu embere za boshi n'omukumuyankirira haguma n'obuba n'oku dirhimana. ¹⁶ Nchisimisize oku nakachihira mu buli choshi omu kagarhi kenyu.