¹ Enyanya z'emyazi y'okurhabala abachesibwa ba Nyamuzinda bali e' Yudeya, ntalonzeze kubayandikira. ² Bulala nyinji omurhima gwenyu gwinja g'okurhabala nani ndi nachisimisa enyanya zenyu embere z'abantu b'e Makedonia, n'okuderha: oku aka Nyamuzinda k'e Akayo kachirhegwire kurhabala kurheng'omwaka guhwere n'obushiru bwenyu bw'asisimwire abantu banene. ³ Ntumire beneberhu, y'obukuze rhwabajirire burhafa busha kw'echo chigabi, muna chirheganye nk'oku naderhere. ⁴ Ntalonzeze okw'abe Makedoniya bakamperekeza n'okurhabashimana muchirheganyize, n'obu burhwali burhuhindamukir'eshoni, zimenye zakabakola. ⁵ Omurhima gwambwirire oku ntume beneberhu burhanzi emwenyu, barhegany'eshego mwalaganyaga, eyoshego y'okuli, chirhabaga chintu ch'akusezwa. ⁶ Mumenye: Obyala bigeke na bigeke ashalula; n'obyala binene, ashalula binene. ⁷ Buli muguma ahane nkok'omurhima gwage gumubwirire, arhahanaga n'oburhe, changwa nk'okazizwe, bulala Nyamuzinda asima ohana n'obusime. ⁸ Na Nyamuzinda anagala kubaha enshokano zoshi, yimubona ebimukwanene muli byoshi ngasi mango, mugere echihe chokusigaza chokujiramo ngasi mulimo gwinja. ⁹ Nk'oku biyandikirwe: anagab'amenja gage, anagabira abakene; okunali kwage kuli kw'esiku n'amango. ¹⁰ Y'enahana emburh'oku muhinzi, n'omugati oku biryo byage, abah'emburho zinene nj'analuz'amalehe g'obushinganyanya bwenyu. ¹¹ Nji mwaba bachire omu bintu byoshi, mugale kuba bantu b'okurhabala abantu boshi yi Nyamuzinda avugwa omonkwa oku bulagirire bwerhu. ¹² Bulala oburhabale b'ogu mulimo guchesibwa gurhali kurhabala abachesibwa omu mulimo gonyine, s'aliko gube bw'okuvuga Nyamuzinda omonkwa. ¹³ Oburhabale bwenyu burhabashwekaga amesho, bakenge, bakuze Nyamuzinda oku bukenge bwenyu m'ogu mulimo gw'emyazi y'Omurhula gwa Kristu, n'omukurhabala abantu boshi. ¹⁴ Nantyo, bali babahunira, babon'enyorha enyanya z'olukogo lwa Nyamuzinda lunagenderere omu kagarhi kenyu. ¹⁵ Nyamuzinda akuzwe enyanya z'enshokano yage rhurhankagala kukuza nk'oku bihemere.