¹ Bazigirwa murhayemeraga ngasi muka, s'aliko mugeze muka yimugala manya ogwarhenga emwa Nyamuzinda. Bulala balebi banene b'obubeshi bajire omu gulu. ² Mumeny'ebiyereker'omuka gwa Nyamuzinda; bulala ngasi muka guderha oku Yesu ayinjire omu muburi guli gwa Nyamuzinda. ³ N'ogurhandere Yesu gurharhenger'emwa Nyamuzinda. Og'omuka eri guli gwa barha sima kristu ola mwayunvaga okunj'ayinja na lero akala ali omu gulu. ⁴ Bana bani, mulibe mwa Nyamuzinda, mwahimire emyuka mibi, bulala oli omu ahagarhi kenyu ali mukulu kulusha oli omu gulu. ⁵ Eyo myuka eba y'omu gulu chechirhuma ngasi choshi ederha chiba ch'omu gulu, n'abo b'omu gulu bayiyunviriza. ⁶ Rhuli ba Nyamuzinda n'abayinji Nyamuzinda babarhuyunviriza kugereraho, rhumenyere omuka g'okuli n'omuka g'okubesha. ⁷ Bazigirwa, rhusimane omuntu n'owindi bulala Nyamuzinda buli busime, na ngasi osime ely'aburhirwe na Nyamuzinda oyo yenayinji Nyamuzinda w'okuli. ⁸ Orhasimana arhenji Nyamuzinda bulala Nyamuzinda buli busime. ⁹ Obusime bwa Nyamuzinda bwaboneken'emwerhu, arhuma omugala w'echinege omu gulu mpu rhumubonere kw'akalamo. ¹⁰ Lola ebiyerekene obo busime, arhali rhwerhwasimaga Nyamuzinda s'aliko yiwarhusimaga omu kuhan'omwana wage w'okukul'ebyaha. ¹¹ Bazigirwa, akaba Nyamuzinda arhusimaga rhushinganene rhusimane nerhu omuntu n'owindi. ¹² Ntaye osagi bona Nyamusinda, nka rhwakasimana omuntu n'owindi obusime bwa Nyamuzinda bwanaba omukagarhi kerhu n'obusime erhibuchesizwe emwerhu. ¹³ Kw'ebyo rhumenyere okurhuli omuye naye ali murhwabano, bulala arhuhere Muka gwage. ¹⁴ Rhwabwene, rhwanaderha loshi oku Nyamuzinda arhuhere Omwana wage okurhuchungula. ¹⁵ Ngasi yeshi wakahamya oku Yesu ali Mwene Nyamuzinda, Nyamuzinda aba omuye, naye omu Nyamuzinda. ¹⁶ Rhumenyere na kandi rhuyemerere oku Nyamuzinda arhugwerhe k'obusime. Nyamuzinda alibusime n'olamire omubusime amanyire Nyamuzinda na Nyamuzinda ali omuye. ¹⁷ Lolaga gurh'obusime bwa rhushinganene, rhugwerhe obulangalire oku lusiku l'olubanja, nk'okuli, nk'okurhuli omu gulu. ¹⁸ Omubusime murhaba buba alik'obusime bw'okuli burhalukir'obuba. ¹⁹ Rhunasima bula Nyamuzinda yi warhusimaga w'oburhanzi. ²⁰ Nkahali oderha mpu asima Nyamuzinda s'aliko agaya mwene wabo, alimubeshi bula orhasimire mwene wabo ali abona gurhe akasima Nyamuzinda arhali abona? ²¹ Rhunaherhe erhageko lyage, owakaba asimire Nyamuzinda akwanene asime mwene wabo.