¹ Mulol'obuzigire Darha arhuhere, mpu yirhuhamagalwa bana ba Nyamuzinda, rhunalibo! Enyanya ly'oko, egulu lirha rhuyinji, bulala lirhamanyaga Darha. ² Basimwa, rhukola rhuli bana ba Nyamuzinda, na kandi arhabonekana rhurhenji kurhe nji rhwaba. Rhuyinji okw'amango Kristo abonekana nji rhwaba nk'okwali, nji rhwanamubona nk'okwali. ³ Na ngasi yeshi oherhe obulangalire buchihebere kuye achichese nk'okunaye achicheseze. ⁴ Olala wajir'echaha, arhakenger'erhegeko, n'echaha kuli kurhakeng'erhegeko. ⁵ Mumanyir'oku Kristu abonekene oku ya shand'ebyaha byerhu, n'omuye nta chaha. ⁶ Owalama omuye arhanka jir'echaha n'owajir'echaha arhamubonaga arhanamuyinji. ⁷ Mwana muzigirwa, ntamuntu obarhebekage. Olala wakolesa okuli ali munyakuli, nkakulala Kristu yenine ali munya kuli. ⁸ Olala w'ajir'echaha ali wa Lyangombe, bulala Lyangombe yajirir'echaha kurhenga okumurhondero. Chechirhumire, omwana wa Nyamuzinda abonekane oku y'abihya emikolere ya Lyagombe. ⁹ Oyinji okw'oburhirwe na Nyamuzinda arhajir'echaha, bulal'emburho ya Nyamuzinda eli muye. Arhankagala kukola echaha bulal'aburhirwe na Nyamuzinda. ¹⁰ Intya gurhuyinj'abana ba Nyamuzinda n'aba lyangombe. Ngasi yeshi orhachichezeze arhali wa Nyamuzinda, y'olala orhasimire benebabo. ¹¹ Ezi, z'enyigirizo mwayunvaga kurhenga oku murhodero: oku rhusimane rhwenine oku rhwenyine. ¹² Rhurhabaga aka Kayini yiwaliri wa Lyangombe ayirha mwenewabo. Nabichi byarhumaga amuyirha? Bulala ebijiro byage byali bibi, n'ebya mwenewabo byali by'okuli. ¹³ Murhasomerwaga beneberhu, nk'egulu lyankabagaya. ¹⁴ Rhumenyere oku rhwabo rhwagerera omulufu rhwaja omu kalamo. Orhaherh'obuzigire muye, ayorhere omulufu. ¹⁵ Ngasi muntu oshomba mwene wabo, ali munizi. Munayinji oku ngasi munizi arhaherhe akalamo k'esiku n'amango. ¹⁶ Rhumenyere obuzigire bulala Kristu ahanire akalamo kage okurhwabo; nerhu, rhukwanene rhuhane akalamo kerhu kubene berhu. ¹⁷ Aliko olala oherhe ebintu by'egulu, n'okubona mwene wabo abilonzeze, anashwek'omurima gwage amuyime, gurhe obuzigire bwa Nyamuzinda bwankalama omuye? ¹⁸ Bana bani basimwa, murhasimanaga okumyazi, changwa okululimi, aliko okubijiro n'okuli. ¹⁹ Nantyo, rhwanamenya okurhuli omukuli n'okurhuliriza emirhima yerhu embere zage. ²⁰ Nk'emirhima yerhu yankarhushobeka, Nyamuzinda ali munene kulush'emirhima yerhu anayinji ebintu byoshi. ²¹ Basimwa, alyankab'emirhima yerhu erharhusobekere, eyirhushwekere obulangalir'emwa Nyamuzinda. ²² Ngasi choshi rhwangahema, rhwanachibon'emwage, bulala rhujirir'amarhegeko gage yirhwanajir'ebintu bimusimisize. ²³ Nalila rhegeko lyage, oku rhwayemerere omu zino ly'omugala Yesu Kristu na kandi rhusimane ngasi muntu n'owabo, nka kulala naye arhusimaga. ²⁴ Olala olang'amarhegeko ga Nyamuzinda alamire omuye na Nyamuzinda alamire omuye. Na kula rhumenyere okw'alamire murhwabo oku murhima arhuhere.