¹ Ary aifa antomotra ny Firavoravoana amin'ny Môfo tsisy masirasira, zay antsovigna hoe Paska. ² Niady hevitra re lôhan'ny mpisorona sy re mpanôra-dalàgna ny amin'ny fomba afahanjaré mamono an'i Jesosy, satria natahotra ny ôlogna zaré. ³ Avy te Satana niditra tamin'i Jodasy Iskariota, zay raiky tamin're roa ambin'ny fôlo. ⁴ Jodasy nandaiha tagny amin're lôhan'ny mpisorona sy re kapiteny ary niady hevitra taminjaré ny amin'ny fomba hamadihany an'i Jesosy eo aminjaré. ⁵ Faly zaré, ary nagneky ny hagnomià vola ananjy. ⁶ Nagneky izy, ary nitady kendry tohigna mbô hanolôrany Ananjy aminjaré kôfa lavitry ny vahoaka. ⁷ Tônga ny andron'ny môfo tsisy masirasira, zay tsy maintsy hagnanovagna sorogna ny zanak'ondrin'ny Paska. ⁸ Jesosy nagnasa an'i Petera sy Jaona, nagnano hoe: "Mandaihana ary homagno ho antsika ny sakafon'ny Paska, mbô afahantsika hômagna zagny." ⁹ Zaré nanontagny Ananjy hoe: "Aiza no tianô hanagnôvanay ny fanomagnana? " ¹⁰ Namaly anjare Izy hoe: "Tandrignaiso, kôfa miditra ny tanàgna anaré, de hisy lalahy raika mitondra sinin-drano mitrôtro aminaré. Magnaraha ananjy amin'izay tragno idirany. ¹¹ De volagno ny tômpon-tragno hoe: 'Ny mpampianatra mivolagna aminô hoe: "Aiza ny efi-tragno fandraisam-bahiny, zay hihinanako ny sakafon'ny Paska miaraka amin'ire mpianatro?'" ¹² Izy hagnatoro anaré efitragno ambôny etazy maventy be misy fanaka. Atôvy akô ny fagnomanagna." ¹³ Koa de nandaiha zaré, ary nahita ny raha jiaby araka zay nivolagniny taminjaré. Ary nagnomagna ny sakafon'ny Paska zare. ¹⁴ Kôfa tônga ny fotoagna, de nipaitraka niaraka tamin'ire apostoly Izy. ¹⁵ De nivolagna taminjaré Izy hoe: "Nagniry mafy ny hihignana itô Paska itô miaraka aminaré Zaho mialôhan'ny hijaliako. ¹⁶ Fô volagniko aminaré, tsy hihinagna itô eky Zaho, mandra-pahatantairak'izagny agny amin'ny fanjakan'Andriamanitra." ¹⁷ De nandray kapoaka Jesosy, ary kôfa nisôtra Izy, de nagnano hoe: "Raiso itô, ary rasay aminaré. ¹⁸ Fô volagniko aminaré, tsy hisotro ny vokatry ny voaloboka eky Zaho, mandra-pahatongan'ny fanjakan'Andriamanitra." ¹⁹ De nandray ny môfo Izy, ary kôfa nisotra, de notapahiny zagny, ary namiàny anjaré, de nivolagna hoe: "Itô ny vatako zay amiagna anaré. Atôvy zao ho fahatsiarôvagna Anahy." ²⁰ Noraisiny karanjagny koa ny kapoàka kôfa vita ny sakafo, de Aoziny hoe: "Itô kapoàka itô de ilay fanekena vaovao amin'ny ràko, zay narotsaka ho anaré. ²¹ Fô mitandraima. Ilay raika zay hamadika Anahy de miaraka Aminahy aketo an-databatra. ²² Fô ny Zanak'Ôlogna de mandaiha tikoàtra araka zay voatendry. Fô loza ho an'izay lalahy zay hamadika Ananjy zagny!" ²³ Nanomboka nifapagnontany zaré ny amin'iraika izay mety hagnano anjany. ²⁴ De nisy fifandiragna niseho koa taminjare momba zay heverigna ho lehibe indrindra aminjaré. ²⁵ Nivôlagna taminjare Izy hoe: ''Iré mpanjakan'ny Jentilisa de tompn'izy irè, ary irè zay managna fahifagna aminjaré de atô ho karaha zay magnano tsara ho an'ny vahoakany. ²⁶ Fô tsy karanjegny mihitsy ny aminire. Mifanôhitra amin'izegny, ôka zay te lehibe indrindra aminare ho lasa toy ny hely indrindra, ary ôka zay manan-danja indrindra ho tônga kara zay manômpo. ²⁷ Fô zôvy no lehibe kokoà, zay mipaitraka amin'ny latabatra, sa zay manômpo? Tsy zay mipaitraka eo amin'ny latabatra ve? Kanaifa Za akéto aminare mitovy ny raika zay manômpo. ²⁸ Fô anare no ôlo zay nanohy niaraka taminahy takô amin'ny fakam-pagnahy niàtra taminahy. ²⁹ Amiako fanjakagna anare, kara Babako koa zay nagnamia fanjakagna ho Anahy, ³⁰ mbô ho afaka hihinagna sy hisotro eo an-databatranahy agny amin'ny amin'ny fanjakako anare, ary hipaitraka eo amin'ny sezy fiandrianagna hitsara ny fokon'ny Israely roambinifôlo anare. ³¹ Simona, Simona, mitandraima, mitady ny hahazo anare Satana, mbô afahany manivagna anare kara vary. ³² Fô nivavaka ho anô Za, mbô tsy ho foàty ny finoagnanô.Tavafaran'ny hiraignanô ndraika, de ampaherezo iré ralahinô.'' ³³ Petera nivôlagna taminy hoe: "Tompo, vôgnona hiaraka Aminô za na agny angadrà na ho agny amin'ny fafataisagna.'' ³⁴ Jesosy namaly hoe: "Volagniky aminô, ry Petera, mbôla tsy hagneno ny akôho amin'izegny andro zegny, alôhan'ny handavanô Za intelo hoe tsy mahay Za anô.'' ³⁵ De nivôlagna taminjare Jesosy hoe: "Kôfa nandaiha anare tsy niaraka tamin'ny fitoeram-bôla, fitoeram-basy, na kiraro, nisy raha tsiampy anare ve?'' Namaly zare hoe: "Tsisy. '' ³⁶ De nivôlagna taminjare Izy hoe: "Fô zao, zay managna fitoeram-bôla, ôka izy hialaka zegny, na fitoeram-basy ihany koà. Zay tsy managna lefogna de tôkony hivarotra ny lambany ary hividy raika. ³⁷ Fô Za mivôlagna aminare, zay voasôratra momba Za de tsy maintsy tantairaka: 'Izy de niraisignia kara raika amin'ire tsy managnara-dalagna.' Fô zay nivôlagna miàlôha momba Za de aifa ho tantairaka'' ³⁸ de nivôlagna zare hoe: "Tompo, zahà! Ireto misy lefogna roa.'' Izy nivôlagna taminjare hoe: ''Ampy Zay.'' ³⁹ Tafaran'ny sakafo, de nandaiha Jesosy, kara fatôny matetika, tagny an-tendrombôhitr'Oliva, ary nagnaraka Azy irè mpianatra. ⁴⁰ Kôfa tônga zare, de ahozy taminjare: ''Mivavaha mbô tsy hidiranare amin'ny fakam-pagnahy.'' ⁴¹ Niala taminjare aviatrany amin'ny indray mitôra-bato Izy, de nandongalitra Izy ary nivavaka, ⁴² nagnano hoe: "Baba ô, ra sitrakanô, de alà aminahy itô kapoàka itô. Na zegny aza tsy zay tiàko, fô zay tiànô hatôko.'' ⁴³ De nisy anjely avy agny an-dagnitra niseho taminy nampahery Ananjy. ⁴⁴ Takô agnatin'ny harariagna, nivavaka tamin-kafanam-pô mafy kokoà Izy, ary ny dignitrany de nanjary kara rà nitete tamin'ny tany. ⁴⁵ Ary kôfa nitsangagna avy nivavaka Izy, de nanday agny amin'ny mpianatra, ary nahita azy ire nandry nohon'ny alahelonjare, ⁴⁶ kay nagnontany azy irè hoe: "Nagnino anare mandry? Mitsangàna ary mivavaha, mbô tsy hidiranare amin'ny fakam-pagnahy.'' ⁴⁷ Ra mbôla nivôlagna Izy, indro, nisy vahoaka niseho, niaraka tamin'i Jodasy, raika amin'iré rombifôlo lahy, nitarika azy irè. Nagnankaiky an'i Jesosy izy mbô hiôroka Ananjy, ⁴⁸ fô Jesosy nivôlagna taminy hoe: "Jodasy, mamadika ny Zanak'Ôlogna amin'ny ôroka ve anô?" ⁴⁹ Kôfa nahita ra-niseho irè zay nagnodidigna an'i Jesosy, de nivôlagna zare hoe: "Tompo, tôkony rantsangninay amin'ny lefogna ve zare? ⁵⁰ Avake ny raika tamin'iré mpianatra nampijagna ny tadignin'ny mpanompon'ny mpisôrogna be, ary tapaka ny hilany ankavanagna. ⁵¹ Jesosy nivôlagna hoe: "Ampy zay!'' Nitanany ny tadigny, de nitahany izy. ⁵² Jesosy nivôlagna tamin'ny lohan'ny mpisorona, tamin'ire kapitenin'ny tempoly, ary tamin'ire lôh'ôlogna zay tônga nanôhitra Ananjy hoe: "Tônga karaha hanambotra mpangalatra mô anaré, miaraka min'ny sabatra sy langilangy? ⁵³ Tamin'Zaho niaraka taminaré tan tempoly, tsy nisambôrinaré Za. Fô zô no lairanaré, sy ny fahifan'ny hizigna." ⁵⁴ Take am-pisambôragna Ananjy, de notarihin-jare Izy, Ary nindôsinjaré tagny an-tragnon'ny mpisoronabe. Fô Petera nagnaraka avy lavidavitra. ⁵⁵ Kôfa nampirehitra afo teo agnivon'ny tôkotany ary niara-nipaitraka zaré, de nipaitraka tagnivon-jaré Petera. ⁵⁶ Nisy mpanompo viavy raika nahita ananjy nipaitraka te amin'ny fahazavan'ny afo, ary nizaha mahitsy ananjy sy nivôlagna hoe: "Itô lalahy itô koa niaraka taminanjy." ⁵⁷ Fô Petera nandà zegny, nivôlagna hoe: "A viavy e, tsy fantako Izy." ⁵⁸ Afaka kelikely de nisy ôlogn-kafa nahita ananjy, ary nivôlagna hoe: "Anô koa raika amin-jaré." Fô Petera nivôlagna hoe: "A lalahy e, zaho tsy izy." ⁵⁹ Nony afaka adiny raika te ho eo de nisy lalahy hafa nagnizingizina sy nivôlagna hoe: "Marigna fô niaraka taminanjy koa itô lalahy itô, fô izy de Galiliana." ⁶⁰ Fô Petera nivôlagna hoe: "A lalahy ro, tsy haiky raha volagninô." Te no ho eo, kô mbôla nivôlagna izy, de nisy akôho nagneno. ⁶¹ Nitodika, ny Tompo nizaha an'i Petera, ary Petera nahatsiaro raha nikoragnin'ny Tompo, tamin'ny nivolagnany taminanjy hoe: "Alôhan'ny hagninoan'ny akôho igniany de handà Anahy intelo anô." ⁶² Niboaka tagny ivailany Petera ary nitomoàgny mafy. ⁶³ Ary lalahy re niambigna an'i Jesosy de nagnadala ary namely Ananjy. ⁶⁴ Natôvan-jaré sarin-dôha Izy ary nanontagny Ananjy zaré, nivôlagna hoe: "Maminanià! Zôvy lay ôlogna namely anô?" ⁶⁵ Nivôlagna raha hafa maro hanôhitra an'i Jesosy zaré, nagnasàha Ananjy. ⁶⁶ Kôfa nazava ny andro, de niara-nivory re lôh'ôlogna, ny lôhan'ny mpisorona sy ny mpanôra-dalàgna. Nidôsin-jaré tagny amin'ny Synedriona Izy ⁶⁷ ary nivôlagna hoe: "Koa Anô no Kristy, de volagno aminay."Fô izy nivôlagna tamin-jaré hoe: "Kô volagniko aminaré, de tsy hino anare," ⁶⁸ ary kô hagnontany anaré Zaho, de tsy hamaly anaré. ⁶⁹ Fô manomboka zo, ny Zanak'Ôlogna de hipaitraka eo an-tagnana akavagnan'ny herin'Andriamanitra." ⁷⁰ Zare jiaby nivôlagna hoe: "De Zanak'Andriamanitra zagny Anô?" Jesosy nivôlagna taminjaré hoe: "Voalazanare fô Zaho no Izy." ⁷¹ Zaré nivôlagna hoe: "Nagnino no mbôla mila vavolombelogna antsika?" Fô antsika mitsy no maharegny avy tamin'ny vavany."