¹ Niditra Jesosy ary nandalo an'i Jeriko. ² Indro, nisy lalahy zay nantsôvigna hoe Zakaiosy te. Izy de sefon'ny mpamory hetra sady nanan-kariagna. ³ Nihaizaka ny hahita izy hoe zôvy Jesosy zegny, naifa tsy afaka nahita takô agnaty vahoaka, satrià fohy izy. ⁴ Koa niazakazaka izy nandaiha alôhan'ire ôlo de nagnanika kakazon'aviavy raika mbô hahita Ananjy, satrià handalo amin'izegny lalagna zegny Jesosy. ⁵ Nony tônga tamin'ilay toeragna Jesosy, de niandrà Izy kay nivôlagna taminy hoe: "Ry Zakaiosy, mirirôgna malaky fô handaiha andragnognô Za niany.'' ⁶ De nirôrogna malaky izy ary nandray Ananjy tamim-pifaliagna. ⁷ Kôfa nahita zegny ôlo jiaby, de nitaraigna dahôlo, de nivôlagna hoe: "Niditra hamangy lalahy zay mpanota Izy.'' ⁸ Nitsangagna Zakaiosy kay nivôlagna tamin'ny Tompo hoe: "Ny antsasaky ny fanagnako amiako ny mahantra, ary ra nisy rah'ôlo nalaiky tsy amin'ny rariny de hifaiky hinaifatranigny.'' ⁹ Jesosy nivôlagna taminy hoe: ''Igniany de tônga akato ny famonjiagna, satrià izy koà mbô Zanak'i Abrahama. ¹⁰ Fô ny Zanak'Ôlogna de tônga mbô hitady sy hamonjy ny very.'' ¹¹ Ra naregny raha zegny zare, de nanohy nivôlagna Izy ary nagnano fagnoaragna raika, satrià aifa nariny Jerosalema Izy, ary zare nieritreritra fô hiseo tampoka ny fanjakan'Andriamanitra. ¹² Noho zegny Izy de nivôlagna hoe: ''Nisy tandapa raika nandaiha tagny an-tany lavitra mbô hahazo fanjakagna ho an'ny taignany ary hierigna avake. ¹³ Nagnantso fôlo lahy tamin'ire mpanompony izy, ary nagnamia farantsa fôlo azy ire, ary nivôlagna taminjare hoe: 'Magnanôva mivarôta mandra-piaviako.'' ¹⁴ Kanaifa ire vahoakany tsy tià ananjy ary nagnondaifa solontaigna nagnaraka ananjy, nivôlagna hoe: 'Tsy lainay ny hanjakan'io lalahy iaketo aminay.' ¹⁵ Ary kôfa niherigna ndraiky izy, avy nandray fanjakagna, de nandidy ire mpanompony zay namiany vôla mbô agnatogna ananjy izy, mbô hafantarany zay tômbony azonjare tamin'ny fivarôtagna. ¹⁶ Tônga tagnatraihany voalôhany, nivôlagna hoe: 'Tompo, ny farantsanô de nahazo tômbony farantsa fôlo mihoatra.' ¹⁷ Nivôlagna ananjy lay tandapa hoe: 'Tsara zegny, ry manômpo tsara. Noho anô natoky tamin'ny hely, de ho tendregnia ho mpanapaka amin'ny tanàgna fôlo anô. ¹⁸ Tônga lay faro, nivôlagna hoe: 'Ny farantsanô tompo, de nahazo dimy.' ¹⁹ Ary nivôlagna taminy ilay tandapa hoe: 'Hanapaka amina tanàgna dimy anô.' ²⁰ Tônga ny raika hafa nivôlagna hoe: 'Tompo, indro ny farantsanô, zay namianô za nakajiky tsara tagnatilamba, ²¹ fô natahotra anô, za satrià lalahy masiaka anô. Kay malaka zay tsy napaitrakanô, ary misangotra zay tsy nambolenô.' ²² Nivôlagna lay tandapa hoe: 'Amin'ny teninô manôkagna no hitsarako anô, ry mpanompo ratsy fagnahy. Fantanô fô za de lalahy masiaka, malaka zay tsy napaitrako, ary misangotra zay tsy namboleky. ²³ Kay nagnino tsy napaitrakanô tamin'ny banky ny vôlako, kay kôfa niherigna za de nalaka ananjy niaraka tamin'ny zanagny ?' ²⁴ Lay tandapa nivôlagna tamin'ire zay nitsangagna tankilany hoe: 'Alà aminanjy ny farantsa, ary amià lay managna farantsa fôlo.' ²⁵ Ary ahozy zare taminy hoe: "Tompo, managna farantsa fôlo izy.' ²⁶ Izôvy mivôlagna aminare, fô zay managna de hamiagna mihoatra, fô zay tsisy, de zay anagnany de halaigna. ²⁷ Fô ire favaloko, de ire zay tsy nagniry za hanjaka aminjare, indôso atô zare ary vony aketo agnatraihako.''' ²⁸ Kôfa avy nivôlagna an'ire raha ire izy, de nandaiha talôha, niakatra ho agny Jerosalema. ²⁹ Ary nony tônga nariny Betifaga sy Betania Izy, tamin'ny tanety antsôvigna hoe Oliva, de nagniraka ny ro tamin'ire mpianany Izy, ³⁰ nivôlagna hoe: ''Mandiana agny amin'ny tanàgna magnaraka. Kôfa miditra anare, de hahita zana-boriky raika mbôla tsy nitikinagn'ôlo. Vaha zegny de indôso atoe. ³¹ Ra misy magnontany anare hoe: Nagnino vahanare io?de volagno hoe: 'Misy raha ilàn'ny Tompo ananjy.' ³² Ire zay nirahignia de nandaiha ary nahita lay zana-boriky araka ny nivôlagn'i Jesosy taminjare. ³³ Kô také am-pamahagna ny zana-boriky zare, de ahozy tômpiny taminjare hoe: ''Nagnino vahanare ny zana-boriky?'' ³⁴ Nivôlagna zare hoe: "Misy ra ilàn'ny Tompo ananjy.'' ³⁵ Nindôsinjare tagny amin'i Jesosy zegny, ary napaitrakan-jare tambôn'ny zana-boriky ny lambany ary namaitraka an'i Jesosy tambôniny. ³⁶ Ra nandaiha igny Izy, de nivilarinjare tan-dalagna ny lambanjare. ³⁷ Ary kôfa narivo an'ilay toeragna firirôgnana amin'ny Tendrombohitr'Oliva Izy, de nanomboka nifaly ire mpianany maro be ary nidaira an'Andriamanitra tamin'ny feo mafy nohon'ny asa be zay hitanjare, ³⁸ nivôlagna hoe: ''Deraigna anie ny mpanjaka zay avy amin'ny agnaran'ny Tompo! Fiadanagna agny an-dagnitra ary voninahitra agny amin'ny avo indrindra!'' ³⁹ Ny Fariseo sanagny tamin'ny vahoaka de nilaza taminy hoe: ''Mpampianatra ô, volagno mafy ire mpianatranô.'' ⁴⁰ Namaly Jesosy ary nivôlagna hoe: ''Lazaiky aminare, marigna fô ra mangignia ire, de ny vato ndraiky hivôlagna.'' ⁴¹ Kôfa nagnatogna ny tanàgna Jesosy, de nitomoagny ananjy, ⁴² nivôlagna hoe: ''Ra mbô Fantako amin'izô andro izô, anô, ire raha zay mitôndra fiadanagna ho anô! Naifa avaizo iregny de miafigna amin'ny masonô. ⁴³ Fô avy aminô ire andro, zay hananganan'ny favalonô fefy magnodidigna anô, ary hagnodidigna anô, ary hanery anô, amin'ny lafiny jiaby. ⁴⁴ Zare de handavo anô amin'ny tany miaraka amin'ny zanakanô. Tsy hamaila na de vato raika mifampitikina aza zare, satrià anô tsy nafantatra izegny fony Andriamanitra nihaizaka ny hamonjy anô.'' ⁴⁵ Nitsôfotra tan-tempoly Jesosy ary nanomboka nandroàka ire zay nivarotra, ⁴⁶ nivôlagna taminjare hoe: 'Ny tragnoko de natô fivavahana,' fô anare kôza nagnano ananjy ho tragnon-dahalo.'' ⁴⁷ Koà de nampianatra isan'andro tan-tempoly Jesosy. Ire lohan'ny mpisorogna sy ire mpanôra-dalagna ary ire mpitarika ny vahoaka de nitady hamono Ananjy, ⁴⁸ fô tsy nahita fomba hagnanôvagna zegny zare, satrià nazoto nitandregny Ananjy dahôlo ny vahoaka jiaby.