¹ Ary kôfa nandalo Jesosy, de nahita lalahy jamba letry vao tairaka. ² Nagnontany Ananjy ré mpianatra hoe: "Raby, zôvy nanota, io lalahy io sa lay ray aman- dreniny, no de tairaka jamba karanjô izy?" ³ Jesosy namaly hoe: "Tsy io lalahy io nanota, na ny ray aman- dreniny, fô natô zô mbô hanihoagna aminajy ny asan'Andriamanitra. ⁴ Tsy maintsy magnano asan'zay nagnasa Anahy antsika kô mbôla mazava. Fô ho avy ny aligna zay tsy ahafahan'na izôvy na izôvy miasa eky. ⁵ Kô mbôla akéto amin'izao tontolo zao Zaho, de Zaho no fahazavan'izao tontolo zao.'' ⁶ Kôfa avy nivôlagna zagny Jesosy, de nandrôra tamin'ny tany, ary nagnano feta tamin'lay rôra, kai nagnôsotra ny fôtaka tamin'ny mason'lay lalahy. ⁷ Aoziny taminanjy hoe: ''Mandihana ary sasa agnaty ranon'ny Siloama (zay adika hoe: nirahina) ny masonô.'' Kai lasagna i lalahy io, nanasa zagny, ary niherigna nahita. ⁸ Ary nifampagnotany ré ôlogna mpiray vody rindrigna tamin'ny lalahy io sy ré nahita ananjy nangataka talôha nagnano hoe: "Tsy tô mô lalahy nipaitraka nangataka taketo?'' ⁹ Ny sanany nagnano hoe: "Ahay, tsy izy fô karaha ananjy foàgna izy.'' Fô izy ndraiky nagnano hoe: ''Zaho tô.'' ¹⁰ Aozinjaré taminanjy hoe: ''Karakôry ariky no ahitan'ny masonô?'' ¹¹ Namaly izy hoe: "Lay lalahy antsôvigna hoe Jesosy no nagnano feta ary nagnôsotra zaigny tamin'ny masoko kai nivôlagna taminahy hoe: 'Mandihana agny Siloama ary sasao ny masonao.' De nandaiha zaho ary nanasa zagny kai nahita.'' ¹² Aozinjaré taminanjy hoe: "Aiza Izy?'' De nivaliany hoe: "Tsy fantako." ¹³ Nindôsinjaré tamin'ny Fariseo lay lalahy zay jamba talôha. ¹⁴ Tamin'ny andro Sabata mô nagnanôvan'i Jesosy ny feta sy nampahitany ny masony. ¹⁵ Ary nagnontany ananjy ndraiky iré Fariseo ny amin'ny fomba nahitàny. Aoziny taminjaré hoe: ''Natôvany feta ny masoko, nisasako, kai mahita za zô.'' ¹⁶ Ny sanany taminjaré fariseo nivôlagna hoe: "Tsy avy amin'Andriamanitra tô lalahy tô satrià tsy mbô magnaja ny andro Sabata.'' Ny hafa nagnano hoe: "Akôry no ahafahan'ny ôlogna mpanota magnano famantaragna maventy be karahanjô?'' ¹⁷ Kai nisy fizarazaragna taminjaré. Kai niherigna nagnontany lay lalahy jamba ndraiky zaré hoe: "Ino no hambaranô mômba Ananjy, hatramin'ny nahitany ny masonô?'' Aozin'lay lalahy jamba hoe: "Mpaminagny Izy.'' ¹⁸ Ary mbôla tsy nino ny mômba Ananjy foàgna iré Jiosy hoe izy aifa jamba kai nahita kô tsy nagnantso ny ray aman- drenin'lay lalahy nahita zaré. ¹⁹ Nagnontany iré ray aman-dreny zaré hoe: "Tô mô lay zanakaré zay nivolagninaré fô tairaka jamba? Kai ino ariky nahitany zô?'' ²⁰ Ary de nivaliànjaré hoe: "Fantanay fô zanakanay io sady tairaka jamba izy. ²¹ Fô ny amin'ny nahitany, tsy fantanay, ary zay nampahita ny masony, tsy hainay. Agnontanià ananjy, fô aifa maventy izy. Afaka mivôlagna ho an'ny taignany izy." ²² Nivôlagna zagny iré ray aman-dreniny, satrià natahotra an'ré Jiosy zaré. Satrià aifa nifankariny iré Jiosy fô kô misy magneky Ananjy ho Kristy, de hiroàhigna hiala ao amin'ny Synagoga izy. ²³ Nohon'ny amin'izagny, no nivolagn'iré ray aman-dreniny hoe: "Aifa maventy izy, izy no agnontanià." ²⁴ Ary nagnantso lay lalahy jamba talôha am-pagnindroa ndraiky zaré kai nivôlagna taminanjy hoe: "Amià voninahitra Andriamanitra. Fantanay fô mpanota zagny lalahy zagny." ²⁵ Avy te namaly lai lalahy hoe: "Tsy aiky alôha na mpanota Izy. Fô raha aiky de zô: jamba za talôha, fo mahita zaho zô." ²⁶ Avy te aozin-jaré taminanjy hoe: "Fô ino no natôny taminô? Akôry ny fomba nampahitany anô?" ²⁷ De namaly izy hoe: "Aifa nivolagniko taminaré fô tsy tandignaisanaré! Kai magnino anaré no te hitandregny zagny koà? Te ho isan'ny mpianany kô mô naré, sa tsy zagny?" ²⁸ Nagneso ananjy zaré kai nivôlagna hoe: "Anô no mpianany, fô zaihay mpianatr'i Mosesy. ²⁹ Fantanay fô aifa nikoragna tamin'i Mosesy Andriamanitra, fô kô zagny lalahy zagny de tsy hainay zay nihaviàny.'' ³⁰ De namaly lay lalahy kai nagnano taminjaré hoe: "Magaga zagny, tsy hainaré tany fiàviany, kanaifa nampahita ny masoko Izy. ³¹ Fantatsika fô tsy mintandregny ré mpanota Andriamanitra, fô kô misy mazoto mivavaka sy magnano ny sitrapony, de mitandregny anajy Izy. ³² Hatraminjay niatombohan'izao totonlo zao de tsy mbôla regny mihitsy hoe nisy nampahiratra ny mason'izay tairaka jamba. ³³ Ko tsy avy amin'Andriamanitra zagny lalahy zagny, de tsy mahaifa na ino na ino.'' ³⁴ De namaly ananjy zaré hoe:" Taigna tairaka tamin'ny ota anô, de anô ndraiky no hampianatra anay?" Avy te de hiroàhigna nivoàka izy. ³⁵ Regnin'i Jesosy fô niroahin-jaré amin'ny Synagoga izy. Ary Izy nahita ananjy de nivôlagna hoe:"Mino ny zanak'Ôlogna mô ana? ³⁶ Namaly izy hoe:'' Zôvy mô Izy, Tompo, mbô hinoàko Ananjy?'' ³⁷ Jesosy nagnano taminanjy hoe: "Aifa nahita Ananjy anô, ary lay raika Zay mikoragna aminô zô zaigny." ³⁸ Aozin'lay lalahy hoe: "Tompo mino zaho." Ary de nidaira Ananjy izy. ³⁹ Jesosy nivôlagna hoe: "Fô fitsaragna no nahatongavako akéto amin'ny zao tontolo izao mbô hahiratra iré jamba ary mbô ho tonga njamba iré mahita.'' ⁴⁰ Naregny zagny ny sanany tamin'iré Fariseo zay niaraka taminanjy kai nagnontany Ananjy hoe: ''Ary zaihay koà zagny jamba?'' ⁴¹ Fô Jesosy nivôlagna taminjaré hoe''Kô jamba anaré, de tsy ho nanan-keloka, fô anaré ndraiky aminjô mivôlagna hoe: 'Mahita zaihay,' de mbôla mitoetra ny helokaré.''