¹ "Volagniky aminare, marigna, de marigna tokoàtra, fô zay tsy miditra ny vavahady ho amin'ny valan'ondry, fô magnanika lalagna hafa, de mpangalatra sy mpandrôba izy. ² Fô zay miditra ny vavahady kôza no mpiambigna ondry tsara. ³ Izy no vahan'ny mpiambigna vavahady. Maregny ny feony ny ondry, ary izy magnantso ny ondriny manôkagna amin'ny agnarany kay mitôndra ananjy mivoàka. ⁴ Kôfa namoàka ny ananjy jiaby izy, de nialôha lalagna ananjy irè, ary magnaraka ananjy ny ondriny, satrià mahay ny feony. ⁵ Ary tsy hagnaraka vahiny izy irè fô hilaifa ananjy kôza, satrià tsy hainy ny feon'ny vahiny.'' ⁶ Jesosy nivôlagna zegny fagnoaragna zegny taminjare, kanaifa tsy azonjare akory irè raha nivôlagnina taminjare. ⁷ De ahozy Jesosy taminjare hoe: "Volagniky aminare, marigna de marigna tokoàtra, fô Za no vavahadin'ondry. ⁸ Zay jiaby tônga talôhako de mpangalatra sy mpandrôba, satrià tsy nihaino ananjy irè ny ondry. ⁹ Za no vavahady. Ra misy miditra akô amin'ny alalako, de ho voavonjy izy; hiditra sy hivoàka izy ary hahita ny fihinanagna. ¹⁰ Fô ny mpangalatra tsy avy ra tsy hangalatra sy hamono ary handrava. Fô Za kôsa avy mbô hanagnanjare fiainagna ary hanagna zegny be. ¹¹ Za no mpiambigna tsara. Ny mpiambigna tsara de magnamià ny aignany hamonjiagna ny ondriny. ¹² Ny mpikarama de tsy mpiambigna ary tompon'ondry. Ra nahita ambôdia magnantogna izy de hiàla ny ondry kay hilaifa, ary ny ambôdia manambotra sy mampiparaitaka azy irè. ¹³ Milaifa izy satrià mpikarama kay tsy miasalôha ny ondry. ¹⁴ Za no mpiambigna ondry tsara, ary fantako ny Anahy, ary fantany Za. ¹⁵ Ny Babako mahay Za, ary Za magnamià ny aigniako ho an'ny ondry. ¹⁶ Managna ondry hafa zay tsy amin'itô vala itô Za. Tsy maintsy hindôsiky ihany koà iregny, ary zare haregny ny feoko mbô ho tônga andiàny raika ihany sy mpiambigna raika. ¹⁷ Izô no antony nitiavan'ny Baba Za: mafoè magnamià aigniako Za mbô handraisako zegny ndraikia. ¹⁸ Tsisy magnala zegny aminahy, fô ny taignako ihany no magnamià zegny. Managna fahifagna hagnamia zegny Za, ary managna fahifagna hialaka zegny ndraiky. Zegny didy zegny de azoko avy tamin'ny Babako.'' ¹⁹ Nisy fizarazaragna ndraiky tamin'ire Jiosy noho irè teny irè. ²⁰ Maro taminjare no nivôlagna hoe: "Managna devoly Izy ary very saigna. Nagnino anare mitandregny Ananjy?'' ²¹ Ny sanagny nivôlagna hoe: "Tsy fivolagn'ôlo misy devoly zegny. Moa ny afaka mampahiratra ny jamba?'' ²² Avake tônga ny fetin'ny fanokanagna takô Jerosalema. ²³ Rirignina tamin-jegny, ary Jesosy nitsangagna také amin'ny kianjan'ny tempoly tamin'ny fialôfan'i Solomona. ²⁴ Avake nitangorôgnan'ire Jiosy Izy ary nivôlagna taminy hoe: Mandrapaha- rahoviagna no hampisalasalanô zaihay ? Ra Anô no Kristy, de hambarô miarihary aminay.'' ²⁵ Ary Jesosy namaly azy irè hoe: "Aifa nivôlagna taminare Za, fô anare tsy mino. Irè asa zay atôko amin'ny agnaran'i Babako, irè no magnambara ny mikasika Anahy. ²⁶ Kanaifa anare tsy mino satrià tsy mbô ondriky. ²⁷ Maregny feoko ny ondriky; fantako zare, ary magnaraka Za. ²⁸ Amiàko azy irè ny fiainagna mandrakizay zare ; kay tsy hifoaty mandrakizay zare, ary tsy hisy handrômbaka ananjy eo am-pailatanako. ²⁹ Ny Babako, zay nagnamia irè Za, de maventy noho ny hafa jiaby, ary tsisy mavita mandrômbaka azy irè eo am-pailatagnan'ny Baba. ³⁰ Za sy Baba de raika ihany.'' ³¹ Avake nalaka vato ndraiky irè Jiosy mbô hambalavala vato Ananjy. ³² Ary Jesosy namaly azy irè hoe: "Maro ny asa tsara natoroko anare avy tamin'ny Baba. Koa ino tamin'ire asa iregny no hambalavalanare vato Anahy ?'' ³³ Namaly Ananjy irè Jiosy hoe: "Tsy ny asa tsara no hambalavalanay vato anô, fô ny fivolagnan-dratsy, satrià anô, ôlombelogna, de magnano ny taignanô ho Andriamanitra.'' ³⁴ Namaly azy irè Jesosy hoe: "Tsy aifa voasôratra akô amin'ny lalàgnanare ve hoe: 'Ahozy Za hoe: "andriamanitra anare'''? ³⁵ Ra nagnantso iregny ho andriamanitra izy , de ho anjôvy zegny no niaviàn'ny tenin'Andriamanitra (ary ny Sôratra Masigna de tsy azo foàgnana ), ³⁶ moa ve lay nohamasin'ny Baba sy nirahigna ho amin'izô tontolo izô no atônare hoe: 'Mivôlagna ratsy anô, noho Za nivôlagna hoe: Za no Zanak'Andriamanitra'? ³⁷ Ra tsy magnano irè asan'ny Babako Za, de aza mino Anahy. ³⁸ Fô ra magnano iregny Za, na de tsy mino Za aza anare, de minoà irè asa mbô hahaizanare sy hazahoànare fô ny Baba de akato Aminahy ary Za akô amin'ny Baba. '' ³⁹ Mbôla nikasa ny hanambotra Ananjy ndraiky zare, fô nilaifa Izy. ⁴⁰ De nandaiha an-dafin'i Jordana ndraiky Izy ho agny amin'ilay toeragna zay nagnanôvan'i Jaona Batisa voalôhany, ary nipaitraka take. ⁴¹ Maro ny ôlo nagnato Ananjy ary ahozy zare hoe: "Jaona tsy mbôla nagnano, famantaragna, fô ny raha jiaby nivôlagnin'i Jaona momba i lalahy i de marigna.'' ⁴² Maro ny ôlo nino Ananjy te.