¹ Tafaran'iré raha iré, de lasa niampita ny ranomasin'i Galilia Jesosy, antsôvigna koà hoe ranomasin'i Tiberiasy. ² Nisy vahoaka maro nagnaraka Ananjy satrià hitanjaré iré ny famantaragna zay natôny tamin'iré narary. ³ Niakatra an-tendrombohitra Jesosy ary nipetraka tagny niaraka tamin'iré mpianany Izy. ⁴ (Ary ny Paska, lay andro firavoravoan'ny Jiosy, de efa mariny.) ⁵ Kôfa nizaha ambôny Jesosy ké nahita vahoaka maro be nagnantogna Ananjy, de Ahozy tamin'i Filipo hoe: "Aiza no hividianatsika môfo mbô hafahanjaré rè hômagna?" ⁶ ( Fô Jesosy nivôlagna izégny mbô hitsapagna an'i Filipo, fô efa fantany zay ho ataony.) ⁷ Ary Filipo namaly Ananjy hoe: "Na de môfo roanjato dinaria aza tsy ho ampy ho an'ny tsiraikiraiky na de kely avy aza." ⁸ Raiky tamin'iré mpianatra, Andrea, ralahin'i Simona Petera, nivolagna tamin'i Jesosy hoe: ⁹ "Misy lalahy raiky aketo managna môfo dimy sy lôka roy, fô ino iré magnoloagna reto ôlogna maro?" ¹⁰ Ary Jesosy nivolagna hoe: "Asaivo mipetraka ny ôlogna" (Ary feno ahitra také amin'ilay toeragna.) Ké de nipetraka iré ôlogna, také amin'ny dimy arivo také ny isany. ¹¹ Avy také Jesosy nalaka iré môfo kôfa avy nisaotra, de nirasa izégny tamin'iré zay nipetraka také. Karaha izégny koà no natôny tamin'ny hazandrano, maro araka zay nilain-jaré ré. ¹² Kôfa voky ny ôlogna, de ahozy taminjaré mpianany hoe: "Angono iré poetipoetiny tavela, mbô tsy hisy ho very." ¹³ Ké de nahonkonjaré izégny ké nahafeno bazary roy ambin'ny fôlo ny poetipoetiny môfo dimy sisa navelan'iré nihinagna. ¹⁴ Avy také, kôfa nahita izégny famantaragna natôny izégny ny ôlogna, de ahozy zaré ré hoe: "Itô tokoà lay mpaminany zay ho tônga ho ety amin'izô tontôlo izô." ¹⁵ Kôfa hitan'i Jesosy fô ho avy zaré ré halaka Ananjy sy hanandratra Ananjy an-keriny ho mpanjaka, de nierigna tagny an-tendrombohitra raiky ndraika Izy. ¹⁶ Kôfa hariva ny andro, de nirôrogna tagny amin'ny ranomasigna iré mpianany. ¹⁷ Nankô agnaty sambokely zaré ré, ké niampita ny ranomasigna ho agny Kapernaomy. Efa maizigna tamin'izay, ary Jesosy mbôla tsy tônga také aminjaré foagna. ¹⁸ Nisy rivotra nitsoka mafy, ary niha-nahery ny ranomasigna. ¹⁹ Kôfa nivory také amin'ny dimy amby roapôlo na telopôlo stadio také zaré ré, de nahita an'i Jesosy nandeha také amin'ny ranomasigna ary nariny ny sambokely, ké de natahotra zaré. ²⁰ Fô ahozy taminjaré hoe: ''Zaho foagna itô! Aza matahotra." ²¹ Avy také de vôgnona ny handray Ananjy takô amin'ilay sambokely zaré ré, ary také no také de tônga tagny amin'ilay toeragna alehanjaré ré lay sambokely. ²² Amaraigna, hitan'iré vahoaka zay nitsangana tagny ampitan'ny ranomasigna fô tsisy sambokely hafa také afa-tsy lay raiky foagna, ary Jesosy tsy niditra takô niaraka tamin'iré mpianany fô nandeha raiky iré mpianany. ²³ Kôfa, nisy sambokely maromaro avy agny Tiberiasy také akaikin'ilay toeragna zay nihinanan-jaré ré môfo kôfa avy nisaotra ny Tompo. ²⁴ Kôfa hitan'ny vahoaka fô tsy také na Jesosy na iré mpianany, de niditra takô agnaty sambokely zaré ré ary nakagny Kapernaomy hizaha an'i Jesosy. ²⁵ Kôfa hitanjaré ré tagny ampitan'ny renirano Izy, de ahozy zaré ré taminanjy hoe: "Raby, oviagna Anô no tônga teto?" ²⁶ Jesosy namaly anjaré ré, nagnano hoe: "Volagniko aminaré marigna, de marigna tokoà, fô mizaha Anahy anaré, tsy nohon'ny nahitanaré famantaragna, fô nohon'ny nihinanaré ny môfo kè voky. ²⁷ Aza miasa ho an'ny hanigna mety ho levogna, fô miasà ho an'ny hanigna zay maharitra ho an'ny fiainagna mandrakizay zay hamian'ny Zanak'Ôlogna anaré, satrià Andriamanitra Ray no nagnisy tombo-kase taminanjy." ²⁸ Avy také de ahozy zaré ré taminanjy hoe: "Ino no tsy maintsy hataonay, mbô hanaovanay iré asan'Andriamanitra?" ²⁹ Jesosy namaly ké nagnano taminjaré ré hoe: "Izô no asan'Andriamanitra: de ny hinoanaré lay raiky zay nasainy." ³⁰ Ké ahozy zaré ré taminanjy hoe: "Ino ary no famantaragna ho ataonô, mbô hahitanay sy hinoanay anô? Ino no ho ataonô? ³¹ Ny dadilahinay nihinagna ny mana tagny agn'efitra, araky ny voasôratra hoe: Namiany môfo avy agny an-dagnitra zaré ré hoanigna." ³² Avy také Jesosy namaly anjaré iré hoe: "Volagniko aminaré marigna, de marigna tokoà, fô tsy Mosesy no nagnamia anaré ny môfo avy agny an-dagnitra, fô ny Raiko no magnamià anaré ny tegnany môfo avy agny an-dagnitra. ³³ Satrià ny môfon'Andriamanitra de lay mirôrogna avy agny an-dagnitra ké magnamià fiainagna ho an'izô tontôlo izô." ³⁴ Ké ahozy zaré taminanjy hoe: "Tompoko, amiavo anay mandrakariva izégny môfo izégny." ³⁵ De ahozy Jesosy taminjaré ré hoe: "Zaho no môfon'ny fiainagna; zay magnantogna Anahy tsy mbô tihinagna eky, ary zay mino Anahy tsy hangaitahaita eky. ³⁶ Kanefa efa nivolagniko taminaré fô nahita Anahy foagna anaré, nefa tsy mino. ³⁷ Ny jiaby zay omen'ny Raiko Anahy de hanatogna Anahy, ary zay magnatogna Anahy de tsy mbô ho ariako. ³⁸ Fo nirôrogna avy agny an-dagnitra zaho, tsy mbô hagnano ny sitrapoko manôkagna, fô ny sitrapon'Izy zay nagnasa Anahy. ³⁹ Ary zô no sitrapon'Izy zay nagnasa Anahy, de ny tsy hanariako zay namiany Anahy jiaby, fô hanangagna anjaré amin'ny andro farany. ⁴⁰ Satrià zô no sitrapon'ny Raiko, de ny mbô hahazahoan'ny jiaby zay mahita ny Zanaka sy mino Ananjy ny fiainagna mandrakizay ary ho hatsangako amin'ny andro farany izy. ⁴¹ Avy takè nimenimenigna mômba Ananjy ire Jiosy satrià Izy nivôlagna hoe: ''Zaho no môfo nirôrogna avy agny an-dagnitra.'' ⁴² Ary ahozy zaré ré hoe: "Tsy lay Jesosy zanak'i Josefa mô io, zay tsy haintsika mô ny ray aman-dreniny? Nagnino ariky volagniny hoe: 'Nirôrogna avy agny an-dagnitra Zaho'?'' ⁴³ Jesosy namaly ké nagnano taminjaré ré hoe: " Adokoà ny menimenigna agnivonaré. ⁴⁴ Tsisy ôlogna afaka magnantogna Anahy kôfa tsy ny Ray zay nagnasa Anahy no mitôgno ananjy, ary hantsangako izy amin'ny andro farany. ⁴⁵ Izégny de voasôratra akô amin'ny bokin'ny mpaminagny hoe: 'Hampianarin'Andriamanitra izy jiaby.' zay maregny jiaby sy nianatra tamin'ny Ray no magnatogna Anahy. ⁴⁶ Tsisy nahita ny Ray, afa-tsy zay avy amin'Andriamanitra, izy no nahita ny Ray. ⁴⁷ Volagniko aminaré marigna, de marigna tokoà, fô zay mino no managna fiainagna mandrakizay. ⁴⁸ Zaho no môfon'ny fiainagna. ⁴⁹ Ny Dadilahinaré nihinagna ny mana avy tagny agn'efitra, ké naty zaré ré. ⁵⁰ Itô ny môfo mirôrogna avy agny an-dagnitra, mbô tsy ho foaty zay homagna amin'izagny. ⁵¹ Zaho no môfo velogna mirôrogna avy agny an-dagnitra. Kô misy ôlogna hômagna amin'itô môfo itô, de velogna mandrakizay izy. Ny môfo zay hamiàko no nôfoko ho an'ny fiainan'izô tontolo izô.'' ⁵² Naha-vignitra iré Jiosy ké nanomboka niady hevitra, nagnano hoe: "Akôry no afahan'io lalahy io magnomià antsika ny nôfony hoanigna?'' Ary Ahozy Jesosy taminjaré ré hoe: ⁵³ "Volagniko aminaré marigna de marigna tokoà, fô kôfa tsy hômagna ny nôfon'ny Zanak'Ôlogna anaré sy misotro ny ràny de tsy hanagna fiainagna akô aminaré. ⁵⁴ Na zôvy na zôvy hômagna ny nôfoko sy misotro ny ràko de managna fiainagna mandrakizay, ary hantsangako izy amin'ny andro farany. ⁵⁵ Fô ny nôfoko no tegna fihoànigna, ary n'y ràko no tegna fisotro. ⁵⁶ Zay hômagna ny nôfoko sy misotro ny ràko no mitoetra Aminahy, ary Zaho akô aminanjy. ⁵⁷ Karaha ny nagnasan'ny Ray velogna Anahy, sy karaha ny hivilômako nohon'ny Ray, zay hômagna Anahy, de ho velogna koà noho ny Aminahy. ⁵⁸ Itô lay môfo nirôrogna avy agny an-dagnitra, tsy karaha ny Dadilahy nihinagna ké naty. Zay hômagna itô môfo itô de ho velogna mandrakizay.'' ⁵⁹ Fô Jesosy nivôlagna iré raha iré takô amin'ny Synagoga kôfa nampianatra takô Kapernaomy Izy. ⁶⁰ Ary maro tamin'ire mpianany zay naregny izégny no nivôlagna hoe: "Fampianaragna sarotra izégny; zôvy no afaka hagneky izégny?" ⁶¹ Jesosy, noho Izy nahafantatra taminanjy fô nimenimenigna tamin'izégny iré mpianany, nivôlagna anjaré ré hoe: "Manafitohigna anaré mô izégny? ⁶² Koà karakôry kôfa tôkony hahita ny zanak'Ôlogna miakatra agny amin'ny nitoerany talôha anaré? ⁶³ Ny Fagnahy no magnamià fiainagna; ny nôfo tsy ahazahoàgna na ino na ino. Iré teny zay nivolagniko taminaré de fagnahy, ary fiainagna iré. ⁶⁴ Mbôla misy ny sanany aminaré tsy mino.'' Fô Jesosy efa nahafantatra hatramin'ny vôlôhany zay tsy hino sy zay hamadika Ananjy. ⁶⁵ Ahozy Izy hoe: ''Noho izégny no nivolagniko taminaré fô tsisy ôlogna afaka magnatogna Anahy kôfa tsy namiàn'ny Ray Ananjy izégny.'' ⁶⁶ Noho izégny, maro tamin'iré mpianany no lasagna ary tsy niara-dià taminanjy eky. ⁶⁷ De ahozy Jesosy taminjaré roy ambin'ny fôlo hoe: "Tsy te-handeha koà mô anaré, sa tsia? ⁶⁸ Ary Simona Petera namaly Ananjy hoe: "Tompo, ho agny amin-jôvy mô zahay? Anô no managna ny teny fiainagna mandrakizay, ⁶⁹ ary nino zahay ké magnatogna mbô hahafatatra fô Anô no lay Masign'Andriamanitra.'' ⁷⁰ Aozy Jesosy taminjaré ré hoe: ''Tsy Zaho mô no nifidy anaré, roy ambin'ny fôlo, ary ny raiky aminaré de devoly?'' ⁷¹ Ary Jodasy zanak'i Simona Iskariota no volagniny, satrià izy, lay raiky amin'izy roy ambin'ny fôlo zay hamadika an'i Jesosy.