¹ Ary nisy Fariseo raiky antsôvigna hoe Nikodemosy, mpitarika Jiosy. ² Nagnantogna an'i Jesosy tamin'ny andro aligna io lalahy io ké nivôlagna taminanjy hoe: "Raby, fantanay fô mpampianatra zay avy amin'Andriamanitra Anô, satrià tsisy mahavita ire famantaragna atônà kôfa tsy miaraka amin'Andriamanitra.'' ³ De namaly ananjy Jesosy nagnano hoe: "Volagniko aminaré marigna, de marigna tokoà, fô kôfa tsy ateraka indraiky ny ôlogna de tsy ahita ny fanjakan'Andriamanitra izy.'' ⁴ Nikodemosy nivôlagna taminanjy hoe: '' Amin'ny fômba karakôry ny hahatanteraka ny ôlogna raiky kô efa antitra izy? Tsy afaka hiditra an-kibon-dreniny izy ké hateraka, sa vô afaka? ⁵ Namaly Jesosy hoe: "Volagniko marigna aminô tokoà, fô kôfa tsy nateraka tamin'ny rano sy ny fanahy ny zanak'ôlogna, de tsy afaka hiditra akô amin'ny fanjakan'Andriamanitra izy. ⁶ Zay ateraky ny nôfo de nôfo, ké zay aterakiny ny Fanahy de fanahy. ⁷ Aza magnana amin'izay nivolagniko anô hoe: 'Tsy maintsy hateraka indraiky anaré.' ⁸ Ny rivotra mitsoka na eza na eza iriany; regninô ny feony, fô tsy fantanô zay niaviàny na zay handianany. Karanjegny aby ny ateraky ny Fanahy.'' ⁹ Namaly Nikodemosy ké nivôlagna taminanjy hoe: "Akory ny fomba hahatanterahin'izégny kôfa izégny?" ¹⁰ Jesosy namaly ké nivôlagna taminanjy hoe: ''Mpampianatra an'Israely vô anô, de mbôla tsy azonô foagna izégny kôfa izégny? ¹¹ Volagniko aminô, marigna, de marigna tokoà, fô zay fantanay no volagninay, ké zahay magnambara ny momba zay hitanay. Kanaifa mbôla tsy magneky ny fagnambaragnanay anaré. ¹² Kôfa nagnambara taminaré ny raha tety an-tany Zaho nefa tsy hinoanaré, amin'ny fomba karakory no hinoanaré Anahy kôfa hitantara aminaré ny raha misy agny an-dagnitra Zaho? ¹³ Tsisy niakatra agny an-dagnitra afa-tsy lay nirôrogna avy tagny, de lay zanak'Ôlogna izégny. ¹⁴ Ary kara ny nanandratan'i Mosesy ny bibilava tagny an'efitra, no tsy maintsy hanandratagna ny Zanak'Ôlogna, ¹⁵ mbô hanagna fiaignana mandrakizay zay jiaby mino Ananjy. ¹⁶ Fô tegna tian'Andriamanitra izô tontôlo izô, ké namiany ny zanany lahy tôkagna, mbô tsy ho very zay jiaby mino Ananjy fô hanagna fiaignana mandrakizay. ¹⁷ Fô Andriamanitra tsy nagnasa lay Zanaka ho amin'izô tontôlo izô mbô hagnameloka izô tontôlo izô, fô mbô hamonjy izô tontôlo izô amin'ny alalany. ¹⁸ Zay mino Ananjy de tsy helohina, fô zay tsy mino ndraiky de efa voaheloka sahady satrià tsy nino ny agnaran'ilay Zanaka lahy raiky sy tôkan'Andriamanitra. ¹⁹ Izô no anton'ny fitsaràgna: tônga taketo amin'izô tontôlo izô ny fahazavagna, nefa de naleon'ôlombelogna ny haizigna karaha zay ny mazava satrià ratsy iré asa natôny. ²⁰ Fô zay jiaby magnano ratsy de mankahala ny mazava ké tsy magnantogna izégny mbô tsy ho hita mibaribary iré asany. ²¹ Kanefa, zay magnano ny marigna de magnantogna ny mazava mbô ho hita tsara fô iré asany de natô arakan'Andriamanitra." ²² Tafaran'iay, de nandeha tagny Jodia Jesosy sy iré mpianany. Nitoetra fotoagna vitsy takô niaraka taminjaré ré Izy ké nagnao batisa. ²³ Ary Jaona koà nagnano batisa tagny Ainona akaikin'i Saleima satria betsaka ny rano tagny. Nagnatogna ananjy ny vahoaka ké natô batisa, ²⁴ fô tsy mbôla nalefa agny an-tragno maizigna Jaona. ²⁵ Avy také nisy fifandiragna tamin'ny sanany aminjaré mpianatr'i Jaona sy Jiosy raiky momban'ny andro fisasagna. ²⁶ Nagnantogna an'i Jaona zaré ré ké nivôlagna hoe: "Raby, Lay raiky niaraka taminô tagny ampitan'ny reniranon'i Jordana, zay nambaranô, indro, magnano batisa Izy, ary magnantogna Ananjy aby zaré jiaby." ²⁷ Ary Jaona namaly hoe: "Tsisy afaka mandray na ino na ino ny ôlogna raiky kôfa tsy namiagna ananjy avy agny an-dagnitra izégny. ²⁸ Anaré foagna de efa afaka ny vavôlombelogna amin'ny volagniko hoe: 'Tsy lay Kristy zaho,' fô ndraiky: 'Nasainy talôhany.' ²⁹ Ny ampakarigna de an'ny mpampakatra. Ary ny sakaizan'ny mpampakatra, zay nitsangagna sy mitandregny ananjy, de mifaly indrindra nohon'ny amin'ny farignesany ny feon'ny mpampakatra. Izégny, ary, no mameno hafaliànahy. ³⁰ Tsy maintsy mintombo Izy, fô zaho ndraiky tsy maintsy mihegna. ³¹ Izy zay avy agny ambôny de ambônin'ny raha jiaby. Izy avy aketo an-tany de avy aketo an-tany ké mikoragna mômban'ny aketo an-tany. Zay avy agny an-dagnitra de ambônin'ny raha jiaby. ³² Izy de magnambara ny mômba zay hitany sy regniny, kanefa de tsisy mandray ny fagnabaragnany. ³³ Zay nandray ny fagnambarany ndraiky de magnamafy fô marigna Andriamanitra. ³⁴ Fô lay araiky nirahin'Andriamanitra de mivôlagna ny tenin'Andriamanitra. Satrià tsy nasiany fetra ny fagnomezagna ny Fanahy. ³⁵ Ny Baba tià lay zanaka lahy ké nametraka ny raha-jiaby taketo ampelan-tagnany. ³⁶ Zay mino lay Zanaka lahy de managna ny fiainagna mandrakizay, fô zay tsy magneky lay zanaka lahy ndraiky de tsy hahita fiainagna, fô hitoeran'ny havigniran'Andriamanitra.''