¹ Nagneky ny fafataisagna i Saoly. Kay nanomboka tamin'io andro io ny fagninjaihagna maventy be hanohairagna ny fiangonana zay tao Jerosalema; ary iré mpino jiaby de niparaitaka nagnairagna iré faritry Jodia sy Samaria, ankoatra iré apostoly. ² Ré lalahy matahotra an'Andriamanitra de nandevigna an'i Stefana ary nagnano hira fisaonagna ananjy. ³ Fô Saoly de nandratra tantairaka ny fiangonagna; nitety tragno izy ary nalaka iré lalahy sy iré viavy, ary nandaifa ananjy an-tragno maizigna. ⁴ Fô iré mpino zay nipaitraka de nandaiha nitory teny. ⁵ Filipo de nirôrogna tagny amin'ny tanam-ben'ny Samaria ary nitory an'i Kristy taminjaré. ⁶ Kôfa naregny sy nahita iré famantaragna zay natôn'i Filipo ny vahoàka maro, de nifantoka tsara tamin'zay nivôlagniny zaré. ⁷ Ré Fagnahy maloto de nivoàka tamin'iré maro zay nidirany, nihafatra mafy, ary maro tamin'iré malemy sy kilemaigna no nahivagna. ⁸ Noho zagny de nisy fifaliàm-be tao amin'ilay tanàm-be. ⁹ Fô nisy lalahy raika antsôvigna hoe Simona tao amin'ny tanàm-be, zay nalaky no nidôla aody; maheka nahamagnamagnana iré vahoakan'ny Samaria izy, kôfa nagnambara fô izy de ôlogna manan-danja. ¹⁰ Samaritana jiaby,manomboka amin'ny faran'ny hely, de nitandregny tsara ananjy; ary aozinjaré hoe: "Io lalahy io de lay fahifan'Andriamanitra zay antsôvigna hoe Maventy." ¹¹ Zaré de nitandregny ananjy, satrià izy de nahamagnamagnana ananjaré aifa nandritry ny fotoagna aila tamin'iré aodiny. ¹² Fô kôfa nino an'i Filipo zaré noho izy nitory ny filazatsara mômba ny fanjakan'Andriamanitra sy ny agnaran'i Jesosy Kristy, de natô batisa zaré, na iré lalahy na iré viavy. ¹³ Na i Simona aza de nino, ary tafaran'ny nagnanôvagna batisa ananjy de nidôko niaraka tamin'i Filipo foàgna izy. Kôfa nahita iré famantaragna sy asa maventy be zay naseho izy, de magnana. ¹⁴ Ary kôfa tandrignaisanaré apostoty ao Jerosalema fô nandray ny tenin'Andriamanitra Samaria, de nalaifan-jaré tagny aminjaré i Petera sy Jaona. ¹⁵ Kôfa nirôrogna zaré, mbô mety handraisanjaré ny Fagnahy Masigna. ¹⁶ Fô mandrapahatôngan'zagny fotoagna zagny, de mbôla tsisy nilatsahan'ny Fagnahy Masigna mihitsy zaré; fô vita vita batisa tamin'ny agnaran'ny Tompo Jesosy foàgna. ¹⁷ Avy té i Petera sy Jaona de namaitraka ny tagnany teo aminjaré, ary de nandray ny Fagnahy Masigna zaré. ¹⁸ Ary kôfa Hitan'i Simona fô ny Fagnahy Masigna de natôlotra te an-tagnanjaré apostoly tamin'ny alala'ny famintrahan-tagnana, de namiàny vôla zaré. ¹⁹ Aoziny hoe: "Amià anahy foàgna zagny, kay zay jiaby amitrahako tagnana de mety handray ny Fagnahy Masigna." ²⁰ Fô Aozin'i Petera taminanjy hoe: "Ho levogna miaraka aminô ny vôlafotsinô, satrià anô nieritreritra ny hahazo ny fagnomiazan'Andriamanitra amin'ny alalan'ny Vôla. ²¹ Anô de tsy managna anjara na ampahany amin'ny raha zagny, satrià ny fônao de tsy marigna amin'Andriamanitra. ²² Noho zagny mibaibaha amin'ny faratsiagnanô, ary mivavaha amin'ny Tompo, sao mbô mety hamaila ny fagnirian'ny fônô Izy. ²³ Fô zaho mahita fa anô de voapoezignan'ny fahotagna anô." ²⁴ Simona namaly ary nivôlagna hoe: "Mivavaha amin'ny Tompo ho anahy, mbô tsy hisy hitranga aminahy ré zay nivolagninô." ²⁵ Kôfa nijoro vavolombelogna sy nagnambara ny tenin'ny Tompo zaré, de niherigna tagny Jerosalema i Petera sy Jaona, nitory ny filazantsara tamin'iré tanàgna maro ao Samaritana. ²⁶ Ary nisy anjelin'ny Tompo nikoragna tamin'i Filipo sady nivôlagna hoe: "Mitsangàna ary mandihana miagnatsimon'ny lalagna mirôrogna avy agny Jerosalema mankagny Gaza." (Io lalagna io de agny an'efitra.) ²⁷ De nitsangagna izy ary nandaiha. Indro, nisy lalahy avy agny Etopia, tandapan'ny Kandasy, mpanjaka vavin'iré Etiopiana. Izy no niandaikitra ny hariagna jiaby. Tonga tagny Jerosalema izy mbô hidaira. ²⁸ Ary nôdy izy kay nipaitraka teo amin'ny kalesany, ary namaky ny tenin'Isaia mpaminagny. ²⁹ Ary lay fagnahy nivôlagna tamin'i Filipo hoe: "Mandihana Ary aza miala lavitra an'io kalesy io." ³⁰ Kay niazakazaka nagnatogna ananjy izy, ary naregny ananjy namaky teny tao amin'Isaia mpaminagny, ary nivôlagna hoe: "Azonô mô i raha vakinô io?" ³¹ Nivôlagna lay Etiopiana nagnano hoe: "Akôry ny ahaizako kô tsisy ôlo mitari-dalagna anahy?" Niangavy an'i Filipo izy mbô hagnatogna ny kalesa ary hipaitraka hiaraka aminanjy. ³² Ary ny andalan-tsoratra masigna zay nivakin'ilay Etiopiana de nagnano hoe: "Nindôsigna hivonigna karaha ny ondry izy, ary karaha ny zanak'ondry moà eo alôhan'ny mpagnety ananjy, noho zagny de tsy niloàm-bava izy. ³³ Fô tamin'ny fagnalam-baraka ananjy de nalàny taminanjy ny rariny. Zôvy no afaka hamaritra tantairaka iré taranany? Nohon'ny aignany nalàny teto an-tany." ³⁴ Noho zagny de nagnontany an'lay tandapa i Filipo, nagnano hoe: "Mitalaho aminô zaho, zôvy no volagnin'io mpaminagny io, ny taignany foàgna, sa ôlon-kafa ?" ³⁵ Nanomboka nivôlagna i Filipo, ary nanomboka tamin'zagny sôratra masigna zagny no nitoriany ny filazantsara mômba an'i Jesosy taminanjy. ³⁶ Kôfa nandaiha tagny an- dalagna zaré, de nagnatogna tagny amin'zay nisy rano zaré ary aozin'lay tandapa hoe: "Irô, misy rano akéto.Ino no manakagna anahy tsy atô batisa?" ³⁷ (Fagnamarihagna: Aozin'i Filipo hoe: "Kô mino amin'ny fônô anô, de afaka atô batisa." Ilay Etiopiana namaly hoe: "Mino zaho fô Jesosy Kristy no zanak'Andriamanitra.") ³⁸ Kay nasain'lay Etiopiana nadôka lay kalesa. Nirôrogna nankagny amin'ny rano zaré, i Filipo sy lay tantapa, ary natôn'i Filipo batisa izy. ³⁹ Kôfa nivoàka ny rano zaré, de nindôsin'ny Fagnahin'ny Tompo i Filipo, kay tsy hitan'lay tandapa eky izy, fô nandaiha tam-pifaliagna tagny amin'ny lalany. ⁴⁰ Fô i Filipo de niseho tagny Azota ary nitety io faritra io izy, nitory ny filazantsara airakin'ny tanam-be jiaby mandrapahatôngany tagny Kaisaria.