¹ Tônga tagny Derbe sy Lystra koa Paoly, ary indro, te lay mpianatra raika antsôvigna hoe Timoty, zanaka lahin'ny viavy Jiosy zay nino; Grika ny babany. ² Izy de tsara laza tamin're rahalahiny zay tagny Lystra ary Ikonioma. ³ Tian'i Paoly hiara-dia aminanjy izy; de nalainy izy ary noforany noho re Jiosy zay te amin're toairagna re, satria fantanjaré jiaby fô Grika ny babany. ⁴ Kô nandaiha namakivaky re tanàgna maro zaré, de nanôlotra toromarika ho an're mpino mbô hagneky ny fampianaragna, zay nisoratan'ny Apostoly sy ny lôhôlogna tao Jerosalema. ⁵ Kai nahai-natanjaka tamin'ny finoagna ny fiangonagna ary nitômbo isa isan'andro. ⁶ Nandaiha namakivaky ny faritry ny Frygia sy Galatia Paoly sy ny namany, satria niraran'ny Fagnahy Masigna zaré hagnambara ny teny agny amin'ny faritr'i Asia. ⁷ Kôfa niditra nariny an'i Mysia, de te-handaiha ho agny Bitynia zaré, naifa nisakanan'ny Fagnahin'i Jesosy zaré. ⁸ Kai nandalo tamin'i Mysia, de nandaiha nirôrogna tagny amin'ny tanàgna an'i Troasy zaré. ⁹ Nahita fahitagna i Paoly tan-droaligna: lalahy raika Makedoniana nitsangagna také, nagnatso ananjy ary nivôlagna hoe: "Avia atô Makedonia ary vonjeo zahay." ¹⁰ Kôfa avy nahita ny fahitagna i Paoly, de niainga hihazo an'i Makedonia avy hatrany zahay, nahatsapa fô Andriamanitra no nagnantso anay mbô hitory ny filazantsara aminjaré. ¹¹ Niantsambo noho zagny avy agny Troasy, de nizotra mahitsy ho agny Samatrakia zahay, ary nihazo an'i Neapolia zahay ny andro magnaraka. ¹² Avy te de nandaiha nankagny Filipy zahay, zay isan'ny tanàgna Makedonia, zay tanàgna taigna manan-danja ao amin'ny faritra sy ny zana-tany Romanina, ary nidôko taminjany tanàgna zagny nandritry ny andro maro zahay. ¹³ Tamin'ny andron'ny Sabata de nandaiha tagny ivailan'ny vavahady akilan'ny renirano zahay, zay nieritreretinay fô misy toairam-pivavahagna. Nipaitraka zahay ary nikoragna tamin're viavy zay niara-tônga te. ¹⁴ Nisy viavy raika atao hoe Lydia, mpivaro-damba violé avy agny amin'ny tanàgnan'i Tyatira, zay nanompo an'Andriamanitra, nitandregny anay. Nanôkatra ny fony ny Tompo hitandrina ny teny zay nivolagnin'i Paoly. ¹⁵ Kôfa vita batisa izy sy ny ankohonany, de namporisika anay izy, nivôlagna hoe: "Kô nitsara anahy ho mahatoky amin'ny Tompo anaré, de midira ary mipitraha an-dragno." Ary nandresy lahatra anay izy. ¹⁶ Ary taminjagny, kô nandaiha nankagny amin'ny toeram-pivavahagna zahay, de nisy tôvovavy raika zay managna fagnahin'ny sikidy nitrôtra taminay. Nitôndra tômbony maro ho an'ny tompony tamin'ny alalan'ny sikidy izy. ¹⁷ Nagnaraka anay sy Paoly avy tafara io viavy io ary nagnatso mafy, nagnano hoe: "Re lalahy re de mpanompon'Andriamanitra Avo Indrindra. Magnambara aminaré ny lalam-pamonjiagna zaré." ¹⁸ Nagnano zegny nandritry ny andro maro izy. Fô i Paoly de nanomboka sosotra taminanjy kai nitodika ary nivôlagna tamin'ny fagnahy hoe: "Mandidy anô amin'ny agnaran'i Jesosy Kristy zaho mbô hiboaka aminanjy." Ary niboaka avy hatrany zagny. ¹⁹ Kôfa hitan're tompony fô lasagna lay fagnantenagna ny amin'ny tômbony ho anjaré, de nisambôrinjaré i Paoly sy Silasy ary nitarihin-jaré ho agny abazary talohan're manam-pahefagna. ²⁰ Kôfa nitôndra anjaré talôhan're mpitsara zaré, de nivôlagna hoe: "Magnakorontagna ny tanàgnatsika reto lalahy reto. Jisoy zaré. ²¹ Magnambara fomba zay tsy ara-dalàgna ho an'ny Romanina ny magneky na mampihatra ananjy zaré." ²² De nitsangana ny vahoaka nanohitra an'i Paoly sy Silasy; nagnala ny lambanjaré ny mpitsara ary nandidy anjaré mbô hivilezigna amin'ny kakazo. ²³ Kôfa nivilezinjaré mafy zaré, de nalaifanjaré agny an-dragnomaizigna ary nandidy ny mpiandry tragnomaizigna mbô hiambigna mafy anjaré. ²⁴ Kôfa naharay zagny didy zagny ny mpiambigna, de nalaifagny tagny amin'ny farany laligna amin'ny fonja zaré ary nifatôrany te amin'ny kakazo ny tongon-jaré. ²⁵ Nagnodidigna ny misasak'aligna de nivavaka i Paoly sy Silasy ary nihira fidairagna an'Andriamanitra, ary re gadra hafa de nitandregny anjaré. ²⁶ Tampoka te de nisy hôrohôrotany maventy be, kai nampihozongozona ny fototry ny fonja; ary nisôkatra avy hatrany ny varavaragna jiaby, ary nivaha ny fatôran'ny ôlogna jiaby. ²⁷ Taitra tmin'ny tôromaso ny mpiandry ny tragnomaizina ary nahita re varavaran'ny fonja nisôkatra; namoaka ny sabany izy kai saika hamono ny taignany, satria nieritreretiny fô nilaifa re gadra. ²⁸ Fô nagnatso tamin'ny feo mafy Paoly, nagnano hoe: "Aza mandratra ny taignanô, satria akato aby zahay jiaby." ²⁹ Nagnatso jiro lay mpiandry tragnomaizigna ary niditra nalaky tagnatiny, tôragna hely noho ny tahotra, niankôhotra talôhan'i Paoly sy Silasy, ³⁰ ary nitôndra anjaré niboaka sy nivôlagna hoe: "Tompoko, ino no tsy maintsy hataoko mbô ho voavonjy?" ³¹ Aozinjaré hoe: "Minoa an'i Tompo Jesosy, de ho voavonjy anô, anô sy ny ankohonanô." ³² Nitory ny tenin'ny Tompo taminanjy zaré, niaraka tamin'ny ôlogna jiaby tan-dragnony. ³³ Avy te de nandray anjaré tamin'ny aligna tamin'igny laira igny foagna lay mpiandry fonja, ary nanasa ny ferinjaré, ary zaré jiaby tragno raika de natao batisa te no ho eo. ³⁴ Avy te de nidôsiny niakatra tan-dragnony i Paoly sy Silasy ary nandrôso hanigna talôhanjaré izy, de nifaly tikoatra izy niaraka tamin're zay tan-dragnony, fô aifa nino an'Andriamanitra izy. ³⁵ Ary kôfa mandraigna ny andro, de nandaifa teny tamin're mpiambina re mpitsara, nivôlagna hoe: "Ambilay handaiha re lalahy re." ³⁶ Nitatitra zagny teny zagny tamin'i Paoly lay mpiambigna, nivôlagna hoe: "Nampitôndra teny taminahy re mpitsara mbô hamaila anaré handaiha: noho zagny avaizo miboaha, ary mandihagna am-piadanagna." ³⁷ Fô nivôlagna taminjaré Paoly hoe: "Namely anay ampahibemaso tsy nisy fitsaragna zaré, na de mizàka ny zom-pirenegna Romanina aza zahay-ary nalaifanjaré tam-pigadrana. Avaizo de tianjaré ho alaifa an-tsôkosôko mô zahay? Ahe! Aoka ny taignanjaré no ho tônga aketo sy hitarika anay hiboaka." ³⁸ Nitatitra zagny teny zagny tamin'ny mpitsara ny mpiambigna, ary kô naregninjaré fô Romanina i Paoly sy Silasy, de natahotra zaré. ³⁹ Tônga sy nialatsigny taminjaré ny mpitsara ary nitôndra anjaré niboaka, nangataka anjaré mbô hiala ao an-tanàgna. ⁴⁰ Kay niala tan-dragnomaizina i Paoly sy Silasy ary nankagny an-dragnon'i Lydia. Kôfa nahita re rahalahy i Paoly sy Silasy de nampahery anjaré ary avy te de niala tan-tanàgna zaré.