¹ Ny ôlogna sanany de nirôrogna avy tagny Jodia hatrany Antiokia ary nampianatra re rahalahy, kai nivôlagna hoe: "Kô tsy vita famoragna araka ny fomba fatôn'i Mosesy anaré, de tsy ho voavonjy anaré." ² Zagny de nitondra an'i Paoly sy Barnabasy tagnaty fifandiragna sy ady hevitra taminjaré. Noho zagny i Paoly sy i Barnabasy de voatendry niaraka tamin'ny sanagny hafa taminjaré hiakatra agny Jerosalema mbô hitrôtra amin're apostoly sy re lôhôlogna mômba zagny fagnontaniagna zagny. ³ Noho zagny zaré, nalaifan'ny fiangonagna, de namakivaky an'i Foinika sy Samaria ary nagnambara ny fiovam-pon're Jentilisa. Zaré de nitôndra hafaliagna maventy be tamin're rahalahy jiaby. ⁴ Kôfa tônga tao Jerosalema zaré, de niraisin'ny fiangonagna sy re apostoly ary re lôhôlogna, kai nitatitra re raha jiaby zay natôn'Andriamanitra taminjaré. ⁵ Naifa ny ôlogna sanagny zay nino, zay tao amin'ny tarik'iré Fariseo, de nitsangagna sy nivôlagna hoe: "Ilaigna ny magnano ny famoragna anjaré sy ny mibeko anjaré hitandrigna ny lalàgnan'i Mosesy." ⁶ Noho zagny re apostoly sy re lôhôlogna de niara-nivory mbô handinika zagny zava-misy zagny. ⁷ Tafaran'ny ady hevitra be, nitsangagna i Petera kai nivôlagna taminjaré hoe: "A ralahy, fantanaré fô aifa talôha aila be Andriamanitra no nagnano safidy te aminaré, mbô ho amin'ny alalan'ny vavako de tôkony haregny ny teny filazantsara iré jentilisa, ary hino. ⁸ Andriamanitra, zay mahay ny fo, vavolombelogna aminjaré, kai nanomia ny Fagnahy Masigna anjaré, karaha ny natôny tamintsika; ⁹ ary tsy nagnano fagnavakavahagna tamintsika sy taminjaré Izy, nagnadio ny fonjaré tamin'ny finoagna. ¹⁰ Ary noho zagny nagnino anaré no mitsapa an'Andriamanitra, hoe tôkony hamaitrahanaré zioga agnam-bôzon're mpianatra naifa na ny razantsika na antsika aza tsy mahavita milanja? ¹¹ Naifa mino antsika fô ho voavonjy amin'ny alalan'ny fahasoavan'i Tompo Jesosy, karanjaré koa." ¹² Ny ôlogna jiaby de nitagna ny fahangignana nandritry ny nitandrignesanjaré an'i Barnabasy sy Paoly mitatitra re famantaragna sy re fahagagana niasan'Andriamanitra zay niasa tamin're Jentilisa tamin'ny alalanjaré. ¹³ Kôfa avy nidôko nikoragna zare, de namaly Jakoba, nivôlagna hoe: "A rahalahy, tandrigneso zaho. ¹⁴ I Simeona de aifa nagnambara ny fômba nagnampian'Andriamanitra tam-pahasoavagna vôlôhany re Jentilisa mbô halaka aminjaré ôlogna ho an'ny Agnarany. ¹⁵ Re tenin're mpaminagny de mômba zagny, araka ny voasôratra hoe: ¹⁶ 'Tafaran'iré raha iré de hierigna zaho, ary hanangagna ndraiky ny tragno lain'i Davida zaho, zay aifa lavo; hanamboatra sy hamerigna amin'ny laoniny ndraiky re faharavany zaho, ¹⁷ mbô hitady ny Tompo re ôlogna sisa tavela, ary agnatin'zagny re Jentilisa jiaby zay antsôvigna amin'ny Agnarako.' ¹⁸ Zô no nivolagnin'ny Tompo, re zay aifa nagnano re raha re zay aifa fantatra tamin're razambe talôha. (Fagnamarihagna: re dikan-teny sanagny talôha de mivaky karanjo: "Zô no nivolanin'i Tompo, amin're zay fantatra tamin'ny andro talôha ny asany jiaby.) ¹⁹ Noho zagny, ny heviky de, tsy tôkony hagnakorontagna re avy amin'ny Jentilisa zay nitodika tamin'Andriamanitra antsika. ²⁰ Fô antsika de hanôratra ho anjaré fô tsy maintsy miala amin'ny fahalotoan're sampy zaré, amin'ny fahavetavetagna, ary amin'ny hainan're biby voakenda, sy amin're rà zaré. ²¹ Satria Mosesy de aifa voambara tamin'ny isan-tanàgna tamin'ny andro talôha ary izy de vakigna amin're synagoga isaky ny Sabata." ²² De kara tsara tamin're apostoly sy re lôhôlogna, niaraka tamin'ny fiangonagna jiaby, ny hifidy an'i Joda zay antsôvigna hoe Barsabasy, sy i Silasy, zay mpitarika ny fiangonagna, sy ny handaifa anjaré agny Antokia miaraka amin'i Paoly sy Barnabasy. ²³ Zaré de nanôratra tô: "Hatrany amin're apostoly sy re lôhôlogna, re rahalahinaré, hatramin're rahalahy avy agny Jentily agny Antikia, Siria, ary Kilikia: Arahaba! ²⁴ Isika de aifa naharegny fô re ôlogna sanagny de niala tamintsika, tsisy beko avy amintsika, ary nagnelingeligna anaré tamin're fampianarana zay nampikorontagna ny fagnahinaré. ²⁵ Zô no izy, zahay jiaby de aifa nagneky ny hifidy re lalahy sy handaifa anjaré agny aminaré miaraka amin'i Barnabasy sy Paoly malalanay, ²⁶ lalahy zay nagnano ny aignany tsy ho zavatra ho an'ny Agnaran'i Jesosy Kristy Tompotsika. ²⁷ Noho zagny zahay de magnasa an'i Joda sy i Silasy, zay hivôlagna aminaré io raha io foagna amin'ny teninjaré manônkagna. ²⁸ Fô kara tsara amin'ny Fagnahy Masigna sy aminay, ny tsy hampitôndra anaré entagna maventy noho re raha taigna ilaigna re: ²⁹ mbô hialanaré amin're raha nataonaré ho fanatitra amin're sampy, rà, re raha voakendra, ary avy amin'ny fahavetavetagna. Kô mitandrigna ny taignanaré amin'zagny anaré, de ho tsara aminaré zagny. Veloma." ³⁰ Noho zagny zaré, kôfa voaroàka, de nirôrogna tagny Antiokia; avy te zaré de namory ny vahoaka niaraka, ary nanôlotra lay taratasy zaré. ³¹ Kôfa voavakinjaré zagny, de nifaly zaré noho ny fampaherezagna. ³² Joda sy Silasy, mpaminagny koa, de nankahery re rahalahy tmin'ny teny maro sy nampahery anjaré. ³³ Kôfa avy nidôko fotoagna vitsivitsy tao zaré, de nalaifa am-piadanagna avy amin're rahalahy ho agny amin're zay nandaifa anjaré zaré. ³⁴ [Fagnamarihagna: Ny dikan-teny talôha be de magnala ny andininy faha34 (zahà ny Asa 15; 40): "Naifa mbôla satrin'i Silasy ny hidôko také."] ³⁵ Fô i Paoly sy Barnabasy de nidôko tagny Antiokia niaraka tamin're maro hafa, zay nampianarinjaré sy nanambaranjaré ny tenin'ny Tompo. ³⁶ Tafaran'ny andro vitsy Paoly de nivôlagna tamin'i Barnabasy hoe: "Andao tsika hierigna avaizo ary hamangy re rahalahy agny amin'ny tanàgna jiaby zay nagnambarantsika ny tenin'ny Tompo, ary hahita hoe karakôry zaré." ³⁷ I Barnabasy de te hitôndra koa an'i Jaona zay natsôvigna hoe Marka hiaraka aminjaré. ³⁸ Naifa i Paoly nihevitra fô tsy tsara ny hitondragna an'i Marka, zay nandao anjaré tagny Panfilia sy tsy nanohy niara-niasa taminjaré niasa. ³⁹ Avy te de nisy fifandiragna mafy, kai nisaraka zaré, ary i Barnabasy nitôndra an'i Marka niaraka taminanjy ary nandaiha sambo nankagny Sipra. ⁴⁰ Fô i Paoly nifidy an'i Silasy ary nandaiha, tafaran'ny nagnomiazanjaré rahalahy ananjy andraikitra ho an'ny fahasoavan'ny Tompo. ⁴¹ Avy te izy de nandaiha namakivaky an'i Syria sy i Kilikia, kai nampatanjaka re fiangonagna.