¹ Nao igat sam ferisi mo ol tija blong lao, oli kam long Jisas oli aot long Jerusalem. Oli talem se, ² "From wanem ol disaepol oli brekem kastrom we ol bubu oli putum bifo? From oli no wasem han blong olgeta bifo oli kakae bred." ³ Hemi ansarem olgeta se, "Be yufala tu, from wanem yufala i stap brekem loa blong God blong holem kastom blong yufala? ⁴ From God italem se, 'Yufala imas ona long papa mo mama' mo 'man we i tok nogud long papa or mama blong hem bae oli mas kilim ded hem.' ⁵ Be yu talem se 'Sapos eni man italem long papa or mama, "Eni wan we ihelpem yu, bae hemi gat wan presin we God bae ikivim," ⁶ Fasin ya bae imekem se loa ya ino holem hem blong hemi ona long papa blong hem, long fasin ya yufala i mekem tok ya blong nating nomo. From yufala save holem kastom blong yufala. ⁷ Yufala ol man blong bjiaman! Aesea italam aot yufala finis se, ⁸ 'Ol man ya oli ona long mi long maot blong olgeta nomo. Be heart blong olgeta istap long we long mi. ⁹ Oli stap mekem wosip long mi blong nating nomo. Taem oli tijim ol man, oli talem se tok ya blong mi, be hemi tingting blong olgeta nomo.'" ¹⁰ Nao hemi singaot evri man ikam long hem, nao italem, se, "Yufala ilesin gud mo yufala imas save gud-- ¹¹ Inogat wan samting we iko insaed long maot blong man isave mekem doti, be ol toktok we ikamaot long maot nao isave mekem man i doti." ¹² Nao ol disaepol oli harem oli kam long Jisas, oli talem se "Yu save ol farisi oli harem nogud long ol toktok we yu talem?" ¹³ Jisas i ansa i talem se, " Olgeta samting we Papa blong mi long heven ino planem yet bae hemi pulumaot. ¹⁴ Yufala ino harem nogud, olgeta oli lida be oli blaen. Sapos wan blaen man ilidim blaen bae tufala tugeta iko long hole." ¹⁵ Nao Pita italem long Jisas se, "Yu explenem mining blong parabol ya long mifala." ¹⁶ Jisas italem se, "Be yufala tu ino save yet? ¹⁷ Be yufala inosave se, wanem iko long maot bae imas pas iko long bel mo ikamaot? ¹⁸ Be samting we ikamaot long maot, hemi kam aot long heart fastaem, mo samting ya imekem sin long fes blong God. ¹⁹ From heart blong man nao, ol rabis tingting ikamaot, kilim man ided, mekem inogud wetem woman, steal, mo kiaman mo tok nogud blong spolem nem blong nara man. ²⁰ Ol fasin ya nao imekem man isin long fes blong God. Taem yu kakai be, yu no wasem han ino mekem sin." ²¹ Nao Jisas i aot long ples ya, iko long wan nara taon ya Taea mo Sidon. ²² Nao igat wan woman Kenan ikam nao isingaot ise, "Plis yu sori long mi, Masta, yu laen blong Deved! Gel blong mi igat wan devel istap long hem mo ispolem hem tumas." ²³ Be Jisas ino ansarem hem long wan toktok, nao ol disaepol oli kam oli talem se, "Plis sendem woman ya iko long we from hemi stap singaot strong tumas." ²⁴ Be Jisas i ansa ise, "Oli sendem mi blong kam long ol laen blong Israel, olgeta ya oli olsem ol sipsip we oli las." ²⁵ Be woman ya ikam nil daon long fes blong hem ise, "Masta yu helpem me." ²⁶ Hemi ansa ise, "Be inogud blong sakem ol haf i bred blong ol pikinini iko long ol dogs." ²⁷ Be woman ya italem se, "Yes, Masta be ol dog ya oli kakai ol haf kakai we oli foldaon long tebol blong masta blong olgeta." ²⁸ Nao Jisas i ansa ise, "Woman, bilif blong yu i strong tumas, bae ihapen olsem we yu wantem." Gel blong hem ihil long semak taem. ²⁹ Jisas ileko ples ya mo iko klosap long lagun blong Kalili. Nao iko antap long wan bigfala hil nao i sidaon. ³⁰ Wan bigfala group ikam long hem. Oli karem olgeta we leg inogud, olgeta we oli blaen, olgeta we ol samting irong long bodi, mo olgeta we oli no save toktok, mo plante narafala sikman bakegen. ³¹ Ol man oli sek taem di luk man we inambut itoktok, man we bodi inogud, ikam gud bakegen, man we inosave wokbaot iwokbaot bakegen, mo man i blaen i save lukluk, oli presem God blong ol laen blong Israel. ³² Jisas isingaotem ol disaepol ikam long hem, nao italem se, "Mi sori long ol man ya, from oli stap wetem yumi tri dei nao, be oli no kakai wan samting. Mi no wantem sendem aot olgeta nating from oli no kakai, or bae ae blong olgeta idak bae oli ful daon long rod." ³³ Nao ol disaepol oli talem se, "Bae mifala ikarem bred wea long drae ples ya, blong fidim fulap man ya?" ³⁴ Jisas italem long olgeta, "Yufala igat hamas bred naoia wetem yufala?" Nao oli talem se, "Igat seven, mo wetem smol fis." ³⁵ Nao Jisas italem long evriwan blong sidaon long graon. ³⁶ Hemi tekem seven bred mo fis, afta we italem tangyu, hemi brekem bred mo ikivim long ol disaepol mo ol disaepol oli kivim long ol man. ³⁷ Evriman oli kakai oli fulap gud. Nao oli fulumap seven baskets ifulap long ol haf blong ol kakai ya. ³⁸ Olgeta we oli stap long taem blong kakai ya igat four taosen man, be oli no kaontem woman mo pikinini. ³⁹ Jisas i sendem evriwan oli ko wanwan, nao hemi klaem long wan bot, nao i aot, ikam stap long Magadan.