¹ E vu sara ga kwe o au, o Vaula, na koi vesu lei Karisito Jisu me baleti vatikem na koi matanitu teni- ² Qi vabautia ni o ba sa rogo rewa na lea viviliataki loloma na Kalou qu lei vagani baleti vatikem. ³ Na kwa vuni a lai vatakei va au i na tola, me wetai qu sa vola oti vasewasewa. ⁴ Ma ga mo ba wilikia baletia na kwa kwe, o ba na rewa ni kilatia na kwa qi tata vura no ka, na vikwa e i vuni tu me baleti Karisito. ⁵ I vuara a sewa na i taba tamata na kwa vuni kwe a lai vatakei vuara na luve ni tamata. Ia ko kwe sa vatakea na Yalo vuara na i avositolo qa na parovita cola vatabui. ⁶ Na du ko i vuni tu kwe, o kora na koi matanitu teni e re na vaivotavota, qa ra wili vata i e yago, qa ra na ciqomia muni na yalayala valeti Karisito Jisu ina kosiveli. ⁷ O au a lia na bobula ni kosiveli kwe i na i solisoli loloma ni Kalou qu lei vagani i na lea viva qwaqwataki. ⁸ Iva au – e i du qi tau sara i ra vuara na tamata vatabui ni Kalou- na loloma kwe a soli va au, me qu vunautaki vuara na koi matanitu teni na i yau tam lei tolavi rewa tu lei Karisito, ⁹ Qa me re vacecetaki i na i tuvatuva na tamata yalia- na kwa vuni a vunitaki balavu tu mai vua na Kalou, ko a bulia na vikwa coko. ¹⁰ Na i tuvatuva kwe a lai vatakei ina lotu me rewa vuara na daunilewa qa kora vunilewa ina vitiki lomalagi me re kilatia rewa na vitutu ni kwa cokome baletia na lea vuku na Kalou. ¹¹ A yaco kwe me takuicia ga na i tuvatuva tam mudu ko a va cavania vina o Karisito Jisu na leda Momo. ¹² Baleti Jisu ga i dei meda yalo me te laka ya ina doudou baletia na leda vabauti koya. ¹³ O koya sokwe qi kerevi iko mo kua ni yalo sewasewa me baletia, na leqi au lei vakacacani baleti iko, ko e na lei vacerecerei ka. ¹⁴ Ko kew na vu ni leqi au tikinia civo qu turu iva Tamaya. ¹⁵ Ma i vuara coko na vuniwere mai lomalagi qai i vuravura ko i lei vakayaca ka. ¹⁶ Leqian masu me rewa ni vagani vatikem, me wetai sara ga kea talei ni lea lagilagi, mo ba lai vaqwaqwataki ina lea kaikai i e yalo, ko i tau no i buto sara va iko. ¹⁷ Lequ mesu na Karisito me cola vatimem yalo ina vabantia ni o ba vakawaka tu qo ba vikataci no lea loloma; ¹⁸ Me rewa i va vatikem mo ba kilatia, vata qa ko ra na tamata vatabui ni Kalou, na kea raba, na kea balavu, na kea teteilagi qa na kea nubu, ¹⁹ Mo ba kilatia muni lea loloma na Karisito, ko I tam lei kilati rewa vakavuku, mo ba rewa ni wabute tu i na lea taucokocoko na Kalou. ²⁰ I bua ko i rewa me sivitia ne kwa coko iba kerevia se vasamataki nia, me wetai na lea kaikai ko i cakacaka no iva vatikemam. ²¹ O koya ga me lei dokai ina lotu qa ina Karisito Jisu vuara na vitabatamata coko me tam mudu. Emini.