¹ Sa qei va ga kho mutou na viyaveni, me mamtu vakhamasuti mutou,qa vakhauqeti mutou i na Turaga kho Jisu Kharisito. Me odakhi ga mutu sovia ra lemamtu i vakhavuvuli vekhemutou, me baletia na i valavala ni lemutu vakhalomavinatakhinia na Khalou, odakhi gi mo mutu tara sara, mo mutu vakhalomavinatakhinia vakhalevu khe. ² Ni mutu sa khilatia no na i vakhaavuvuli matu sa solia no vekhemutou i na Turaga kho Jisu Kharisito. ³ Ni sa te loma ni Khalou vekhemutou mo mutu lai vakhadonui khe mo mutu khua khe na dauyalewa. ⁴ ia mo mutu khilatia yatlia no na lemutu maroroya mutu yago me savasava qa me dokhai. ⁵ me khua i na yalo ni gagadre ca (me odakhi kha khora na vimatanitu teni, kheri tamu khilatia na Khalou) ⁶ Me khua ni tlia na tamata me lawakhitia se vakhacakhacani wekhaya, i na kwa kwe. Ni sa dau yalocatakhi na kwa khece kwe na Turaga, me odakhi matu sa daukwaya qa matu sa vakhasalatakhini mutou rewakhe. ⁷ Ni sa tamu covi da na Khalou me da dukhadukha no, me du yalo savasava ga. ⁸ Ia kho khoya sa becia kwe, sa tamu becia na tamata, na Khalou ga, o khoya sa solia vekhemutou na lea Yalo Tabu. ⁹ Ia i na vukhu ni vilomani vakhavitacini, khei tamu yaga me tlia khei vola vekhemutou, ni sa vakhavulic mutou yatlia na Khalou mo mutu vilomani vakhaimutou. ¹⁰ Sa du, mutu sa tara no vuara na viyaveni khece mei Masitonia, Ia matu sa uqeti mutou na viyaveni mo mutu vakhalevunia. ¹¹ Matu sa vakhauqeti mutou muni mo mutu gumatua mo mutu dau no vakhasewa, qaraukhatania na lemutu i tavi, qo mutu cakhacakhatakhinia mutu lima, me odakhi matu sa vakharoti mutou khe. ¹² mo mutu ma rewa ni tara na kwa vina vuara mai taudakhu, mutu khua ni dravudravua no. ¹³ I a matu sa vinatia mo mutu khilatia no na viyaveni, baleti khora na sa moce no, mo mutu khua rarawatakhini khora tu me odakhi kho khora na khea vo khei tikhai tu na ledra i nuinui. ¹⁴ Makhedi sa vakhabautia ni sa mate kho Jisu qa dure leqwa, sa na odakhi gima na Khallou, ni na moce vata qaya tu ¹⁵ . Ni matu sa kwaya kwe vekhemutou i na lea tata na Turaga, ni kho da khedi si cola donuya no na Turaga, ni da tamu teiteimata vuara kheri sa moce tu. ¹⁶ Ni na la civo mei lomalagi na Turaga vakhaikhoya. Khei na la qaya mai na domo ni tae, qa na domo ni agilosi turaga, qa na tavui ni Khalou, kheri sa na qei dure teteimata kho khora kheri mate ni ra no tu qei Kharisito. ¹⁷ Ia kho da na khea vo, na si cola no, di na laimei vata qei khpra i na o me da visorakhi qaya na Turaga i na macawa. Khei na odakhi gima, di na qei no vata tu ga qa na Turaga. ¹⁸ Kwagi mo mutu vivakhacegui vakhaimutou i na tata kwe.