¹ Kwagi, ni matu sa tamu vosotia rewa no, matu sa numia ni sa vina me qu s dei tatlia no yati mai Aceni. ² Maru sa vakhatalai Timoci, na wekhamaru, kha lemaru i tokhani ni cakhacakha vua na Khaloui na vukhu ni tukhutukhu vina li Kharisito, me vivaqwaqwatakhi qa vakhaceguti mutou no i na vukhu ni lemutu vakhabautia. ³ me khua ni tlia me leivakhayavalati i na vikwa rarawa kwe. Ni mutu sa khilatia no vakhaimutou ni mamtu sa lesi i na vukhu ni kwa kwe. ⁴ Khei du ni lemamtu si nokhoto vata qei mutou, matu sa vecei mutou rewa ni da sa vakhurau vakharawatakhi, kha qei yaco me odakhi sara ga mutu sa khilatia no. ⁵ I na vukhu ni kwa kwe ni qu sa tamu vosotia rewa, qu sa vivakhatala yati mequ khilatia rewa na lemutu vakhabautia. Lala qa sa vakhasaga na dauviveretakhi me temakhi mutou, qa qei tamu yaga tu boto na lemamtu cakhacakha. ⁶ Ia kho Timoci ni sa lesu mai vekhemutou qa sa khou mai vekhemaru na i tukhutukhu vina ni lemutu vakhabautia qa na loloma. A sa vecei maru ni mutu si numi mamtou vina no ga, qo mutu sa mata tolavi mamtou no me odakhi na lemamtu mata tolavi mutou. ⁷ I na vukhu ni kwa kwe, na viyaveni,mutu sa vakhaceguti mamtou khe, baletia ga na lemutu vakhabautia i na gauna ni lemamtu taqwaya qa na rarawa. ⁸ Ia kwe matu sa na cola,ma mutu tudei no ga i vua na Turaga. ⁹ Khei sa na vica na lemamtu vakhavinavina i vua na Khalou me baleti mutou, qa na marau khei yacovi mamtou i na mata ni leda Khalou. ¹⁰ Ni matu sa masu vaqwaqwa i na bogi qa na siga me matu tolavia mutu mata qa solia na vikwa khei si vo no i na lemutu vakhabautia. ¹¹ Me sa khe mei mamtou ro yati vekhemutou na Khalou na Tamada qa na leda Turaga kho Jisu. ¹² Ia me vakhalevutakhini mutou na Turaga mo mutu uasivi cakhe i na loloma vakhaimutou, qaya vuara na tamata khece, me odakhi kho mamutou vekhemutou. ¹³ Ia me vakhadeitakhinia mutu yalo kho khoya, me tamu cala, me savasava i e mata na leda Khalou, qa Tamada i na lea la mai na leda Turaga kho Jisu qei khora na lea tamata yalo savasava.