¹ Ni mutu sa khilatia ga vakhamutau na wekhayau ni lematu ia yati i vekheinutou khei tamu kwa wala. ² Ia me 0dakhi mutu khilatia no, na lemamtu lai vakhararawatakhi qa lai vakhamadutakhi rewa i mata mai Filipa, mamatu sa qei doudou khe i a na vukhu ni lemamtu Khalou me lai vunautakhi khe i vekhemutou na i tukhutukhu vina ni Khalou ni nakhi tu na visaqasaqa. ³ Ni tamu cala na lemamtu vunau, tamu tara e na i valavala dukha se mei na vidabui, ⁴ Ia ni matu sa laivakhadonui mei vua na Khalou, ni matu sa leivakhabauti i na vukhu ni i tukhutukhu vina, matu sa vunautakhinia, me khua ni vakhalomavinatakhi na tamata, na Khalou ga. ⁵ Ni matu tamu mei tata ni vivakhacalai, me odakhi mutu sa khilatia no, matu tamu tara no na kwa me vunitakhi khe na lemamtu khocokhoco-sa lemamtu i vakhadinadina na Khalou. ⁶ Matu sa tamu vinatia me ra dokhai mamutou na tamata, se kho mutou se mei vuara leqwa khei so. ⁷ Sa rewa me mamtu wili mamtou vakha i apositolo li Kharisito. Ia kha tikhai, mamtu vakhasewatakhini mamutou e na khemutu macaqwa me odakhi khei tlia na tina khei vakhamenemenetakhini khora no na levea. ⁸ Kwagi ni mamtu yalololoma no i vekhemutou. Mamtu marau ni matu tamu wase na boto i vekhemutou na i tukhutukhu vina ni khalou, na lemamtu cola du muni. Ni mutu sa yaco me kwa lomani vekhemamutou. ⁹ Ni mutu numia tu na viyaveni na lemamtu cakhacakha vaqwaqwa. Mamtu cakhacakha i na bogi qa na siga me rewa ni mamtu khua ni te kwa ni oca i vekhemutou. Ni mamtu vunautakhinia no na i tukhutukhu vina ni Khalou i vekhemutou. ¹⁰ Ni mutu sa te i vakhadinadina, qa na Khalou ni matu sa ia na kwa savasava, dodonu qa tamu cala i na khemutu macaqwa na sa vakhabautia. ¹¹ Sa odakhi gima na lemutu khilatia no na lemamtu i valavala vekhemutou yatlia ni sa odakhi khei tlia na tama i vuara na levea, ¹² khei vakhauqeti mutou qa vakhaceguni mutou qa vakhamasuti mutou mo mutu tara no na i valavala khei khilikhili qawa na Khalou, o khoya khei covi mutou khi na lea matanitu qa na lea vanua vakhaiukhuukhu. ¹³ I na vukhu ni kwa kwe, matu sa vakhavinavinatakhinia no muni ga na Khalou, ni gauna mutu sovia khe na i tukhutukhu ni Khalou mutu varogocia mai vekhemamutou, muti tamu sovia boto me odakhi khe te tata ni tamata, ia me odakhi ga na khea du, ni te tata ni Khalou, o khoya khei cakhacakha no i vekherau na sa vakhabautia. ¹⁴ Ni kho mutou na wekhayau, mutu sa dau vakhatakhucia na visoqasoqo lotu ni khalou mai Jutia kheri no qai Kharisito Jisu . Ni mutu la rusuvia muni na vikwa voravora mai vuara na khoivata qei mutou, me odakhi kha ra tara mei vuara kho khora na Jiu. ¹⁵ o khora kha ra vakhamatenia ruarua na Turaga kho Jisu qei khora na parofita, kha ra kharavi mamutou teni. kheri tamu vakhalomavinatakhinia na Khalou. Ia kheri sa dauvivala qei khora na tamata khece. ¹⁶ Kheri sa tarovi vakhatabuni mamutou me mamtu khua ni vunau vuara na khoi vivanua teni, me ra rewa ni laivakhscola. Sa yaco me ra vakhasinaitia me tatu sara na ledra i valavala ca. Ia mai takhu khei na qei derei khora na khea wakharakhara. ¹⁷ Ia kho datou na viyaveni di sa leitawasei vakhalekhelekhe boto vakhayago, , tikhai ga vakhayalo. O khoya matu sa vinatia vakhalevu du khe me matu tolavia mutu mata. ¹⁸ Ni matu sa vinatia me matu la yati vekhemutou-oi au kho Paula qi sa vinatia vakhatlia se vakharua, ia a sa tarovi mamutou no kho Setani. ¹⁹ Ia na cava na lemamtu i nuinui se marau se i sala ni rekhi i na mata ni leda Turaga kho Jisu i na lea lesu mai? khei tamu ni kho mutou ga. ²⁰ Ni sa ni mutou ga na vu ni lemamtu i ukhuukhu qa na rekhi.