¹ Ia me baletia na vigabakhi, na viyaveni, sa tamu yaga mequ vala yati vekhemutou, ² mutu sa khilatia vina sara tu ga vakhai mutou ni na la mai na siga ni Turaga me odakhi na dauvenakho i na bogi. ³ Ni ra na kwaya no, "Na vakhacegu qa na no vina "Sa qei yaco vivakhusari vuara na rusa. Khei na qai odakhi na mosi ni lea taratara khei tlia na yalewa bukhete. Kheri na tamu tuba cola rewa. ⁴ Ia kho mutou na viyaveni, mutu tamu nakhoto no i na gigilo me rewa ni vivakhusari khe vekhemutou, me odakhi na dauvenakho, na siga gima. ⁵ Mutu sa te luve khece ga ni cece qa na luve ni siga. Khedi tamu te luve ni bogi se ni gigilo. ⁶ Kwagi me da khua ni moce no me odakhi khei dau tara khei so. Ia me da yadra no qa da yalomatua. ⁷ Kho khora na daumoce kheri moce i na bogi, qei khora na daumateni kheri ia i na bogi. ⁸ Ia me odakhi ni da te luve ni siga, me da yalomatua, me da qulumia na vakhabautia qa na loloma me leda i sasabai, qa na vakhanuinuittakhinia na cola me te i vakharuru ni du ulu. ⁹ Do na Khalou khei tamu lesi da meda rusa, ia me du rewatia ga na cola i na vukhu ni leda Turaga kho Jisu Kharisito, ¹⁰ o khoya a mei mate me baleti da, kwa khedi yadra se moce, khedi na cola vata qaya ga ¹¹ O khoya gi mo mutu ia na vivakhacegui vakhaimutou , mo mutu vilaveti vakhai mutou me odakhi mutu sa tara no. ¹² Matu sa vakhamasuti mutou no na viyaveni, mo mutu dau wewei khora kheri dau cakhacakha i na khemutu macaqwa, qei khora kheri dau teteimatatakhini mutou i na Turaga qei khora kheri dau vakhavulici mutou. ¹³ mutu rokhovi khora vakhalevu i na loloma i na vukhu ni ledra cakhacakha. Mutu vivinati vakhaimutou. ¹⁴ Ia matu sa vakharoti mutou na viyaveni : Mutu vunauci khora kheri vucesa, vakhauqeti khora na yalosewasewa, vukhei khora na malumalumu, qo mutu dau vosotia na kwa khece. ¹⁵ Mutu tolavia me khua ni tlia khei visausaumitakhi na kwa cakha ca ivua khei tlia. Ia mutu saga no ga mo mutu tara na vikwa vina vakhaimutou. ¹⁶ Mutu rekhi no ga. ¹⁷ Mutu masu no ga me khua ni mudu. ¹⁸ Mutu dau vakhavinavina i na vukhu ni kwa khece ga. Sa nia kwe na loma ni Khalou vekhemutou i a vukhu i Kharisito Jisu. ¹⁹ Mutu khua ni bokhocia na Yalo Tabu. ²⁰ Mutu khua ni becia na tata ni parofisai. ²¹ Vakhatovele na kwa khece. Qulumia na kwa khei vina. ²² La reva mai na vikwa khece ga khei cakha ca. ²³ Ia me vakhasavasavatakhini mutou vakhatlia sara na khalou ni vivakhacegui. Me sa maroroi taucokho mutu yalo, mutu yaloga qaya mutu yago me khua ni cala me yacovia na lea lesu mai na leda Turaga kho Jisu Kharisito. ²⁴ Khei du kho khoya khei covi mutou, khei na tara muni ga kho khoya. ²⁵ Kho mutou na viyaveni, mutu masulakini mamutou muni. ²⁶ Mutu dau sovi khora na viyaveni i na i yabo ni yalosavasava. ²⁷ Qi sa vakharoti mutou i na Turaga, me wili na i vola kwe vuara khece na viyaveni. ²⁸ Me no qai mutou na loloma ni leda Turaga kho Jisu Kharisito.