¹ Io ni vo sucu o Jisu mai Peceliema i Jiutia na gauna a si tui ke o Eroji, e a valu na tamata vuku mai na tuicake aru lamai Jeruisalemi, ² ''Aru kwa i vei o keya a sucu me ledru tui na kwai Jiutia? madu tolaviya na leya kalokalo mai na tuicake, o keya madu lamai ke me madu cuva vua.'' ³ Io ni varogo o Eroji na tui, e karaciya qai niya o Jeruisalemi taucoko. ⁴ Io ni vasoqonidru vata taucoko na bete levu qainidru na vunivola na tamata, a qai tarogidru o keya, Eya sucu i vei na karisito?'' ⁵ Aru kwa vuwa mai, Peceliema i Jiutia me kodaki aru volaiya na parovita, ⁶ Io o iko, ''Peceliema, na vanua o Jiutia, o tasi lailai sara vuwadru ena yasana o Jiutia, ena tubu mai vuwako e kia na Turaga o kiya na lewaidru na lequ tamata na Isireli. ⁷ Io o Eroji ni vo covidru lo na tamata vuku a qai tarogiya va makuga vuwadru na gauna e lai dani mai ke na kalokalo. ⁸ A vo vatalaljidru i Peceliema, a kwa, ''mutu lai vadaniya va makuga mai nai luve lailai ni mutu vo dania kwa sara mai vakoyau mequ rewa ni lai cuva muni vuwa.'' ⁹ Io niru vo varogo na leya tat na tui, aru la meru tolaviya na kalokalo aru tolavia mai na tui-i-cake, avo simatataki nidru, avolai vatakiya ni vo doniya na vanuwa e daro ke nai luve lailai. ¹⁰ Niru vo tolavia na kalokalo, au vo marau valevu sara. ¹¹ Io niru vo unu i were aru vo tolaviya nai luve lailai qai niya o Meri la nene aru cuva aru varokoroko vuwa aru serekiya na ledru i solesole i yau, aru va cobaniya vuwa e yavalu na kwa na koula na drega me yagi vata na mura. ¹² Ia a vo vasala jidru na Kalou, meru kuwa ni la tale vo Eroji, aru vo la tale i ledru vanua i na kanikiya na calevu. ¹³ Niru vo ladei a qai rairai tale vo Joseva ena tadra kiya na agilosi ni turaga e kwa, ''mo cavu tu, mo meya nai luve lailai qai niya la nene, mo tuba i Ijivita. waciya ke na lequ tata vuwako ni na vadaniya o Eroji nai luve lailaime va mate niya.'' ¹⁴ E tucake qai meya nai luve lailai qai niya la nene na bogi igi i Ijivita. ¹⁵ Aru lai no ke me yacovia sara la mate o Eroji. me yaco ke na kwa e kwa na Turaga o keya e kwa na parovita, ''Aqu na coviya o luvequ mai Ijivita.'' ¹⁶ Io o Eroji, nivo qai kilajiya niru varivarivaciya na tamata vuku, avo oca valevu,avo qai kwa yaji meru vamate nai luve teigwane yalai eru no mai Peceliema, qei niya na ka viyasana taucoko ga,o rau eru yabaki ya rua qai nidru er kwa yalai sara, me raujia na gauna e tarogiya ke o keya vuwadru na tamata vuku. ¹⁷ A qai yaco na kwa e kwa o Jeremaia na parovita e kwa, ¹⁸ ''E kiya na domo e rogo mai Rama, na domo ni kulakula, domo ni tagi, domo ni soqo ni mate levu, avo tagicaki nidru o luve a o Rejieli, avo tasi okajia me vacegu o keya balejiya niru vo lavele.'' ¹⁹ Avo mate o Eroji, avo qai lamai vo Joseva mai Ijivita na tadra, e kiya na agilosi ni Turaga, ²⁰ ''E kwa tucake mo meiya nai luve laialai qai niya la nene, na ledru vanua na Isireli, aru vo mate o rau aru vadaniya meru va mateniya niya nai luve.'' ²¹ A vo qai tucake o keya qai meya nai luve lailai vata la nene, aru lamai ledru vanua na Isireli. ²² Io nivo varogo ni vo tui mai Jutia o Arikeleo na keya i sosomi o Eroji na lea momo, avo mataku ni lake, a qai vasalatakiniya na Kalou na leya yadra, nia lesu o keya ina yasayasa va kaleli. ²³ Avo lai no vakiya ina rara e yaca o Nasareci, a yaco ke na kwa e ru tatatakiniya o rau na parovita, e qai vadeitakiniya me kwai Nasareci.