¹ Ia na gauna igi eya lamai o Joni na daunivivavitaisotaki e dauvunau ina yaloga ni vanuwa i Jutia e kwa, ² ''Mutu vivutuni, ni vo voleke na matanitu va lomalagi.'' ³ O kiya ikwe e tata ke o Aisea na parovita, e kwa, ''E domo e kiya vo coco i yaloga ni vanuwa, Mutu samakiniya na leya calevu o Jiova, vavea me dodonu na leya calevu.'' ⁴ Ia o Joni ikwe na leya i sulu na vuji ni kameli, e vesu ve luvuka na taba ni manumanu na keya cawa na vodre qainiya na oni ni vikai. ⁵ Aru vo lamai o rau i Jeruisalemi, qainiya o Jutia taucoko, qainiya na vi vanuwa taucoko e voleka i na Joritani. ⁶ Avo vavitaisotaki nidru o keya ina Joritani, niru vo va tusaniya na ledru i valavala ca. ⁷ Ia nivo daniya o kiya eru vo lewe levu na Farisi qainiya na leya tokani o Setoki, eru vo lamai ina lea vi vavitaisotaki a kwaya vuwadru, o mutou na kawa ni gwata, o cei e kwaya vuwako mutou me mutu tuba mai, na oca vo la no mai? ⁸ O keya me mutu vuwa takiniya na vuwa e kilikili qaniya na vivutuni. ⁹ Ia mtu kuwa ni numiya me mutu i mutu yaloga, 'Na lemadu momo o Eparama.' Niqu vo kwaya vuwako mutou, e rarawa vuwa na Kalou me vatubuniya na vivatu ikwe meru joiya la i luve o Eparama. ¹⁰ Ia na kiya evo notu nikuwa ina vunikai. Avo musu dei kena kai taucoko e tasi vuatakiniya na kwa oka, evobiu ina bukawaqa. ¹¹ E jina niqu vo vavitaisotaki niko mutou ina wai ni mutu vo vivutuni. Ia o kiya e tekuciko yau mai e levu cake vuwako maru, ia na leya i vava e tasi rewa niqu kau, ena vavitaisotaki niko mutou i na Yalo Tabu qai niya na buka waqa. ¹² Avo notu ve lima na leya i sivi ni sila, ena va savasava takiniya sava na sila ni leya rara, qai soqoniya vata na leya sila ina lololo, ena vayagi niya ina guto tasi boko rewa. ¹³ Avo qai la i Kalili o Jisu ina Joritani vuwa o Joni me vavitaisotaki vuwa. ¹⁴ E mata tarogiya o Joni, e kwa, '' E yaga vuwako mo vavitaisotaki niko yau, ia ikwe o iko o lamai vuwako yau?'' ¹⁵ A qai tata vo Jisu e kwaya vuwa, Mo vosojiya re nikuwa, nivo kilikili qaniko datou medu vabaujiya kodaki ikwe na valavala dodonu taucoko ga.'' Vo qai vosojia o kiya. ¹⁶ Ia o Jisu, ni vo vavitaisotaki devu, a cabe sara mai ina wai, qai daniya, avo qai wase ruwa vuwa na lomalagi, a qai daniya o kiya na Yalo ni Kalou ni vo labale mai me kodaki na ruve, qai ro no vuwa. ¹⁷ E varogo e kiya na domo mai lomalgi, e kwaya o keya ''Iqoi na lequ i luve ni toko, ''Aqu dau okajiya valevu.''