¹ Na cava re e olau varuniya na viva rata na virala? Tasi niya ni notu yaralu lemutu gagadre bura balejidru lemu icaba? ² Mutu vo kocokoco mutu qai tasi rewajiko mutou: mutu vo ravuraru, ga gadreriya e leru na kwa, mutu qai tasi qulumiya rewa me lemutou: mutu vo virala tuga vata mutu viva, iya mutu vo tasi rewajiya ni mutu vo kerekere tuga re. ³ Mutu vo kerekere ga ni mutu tasi rewajiya mutu na vo kerekere ga me larele lemutu gagadre bura. ⁴ O kemutou na dau lasa, mutu bara tasi kilajiya no na kalou e dau burajiya na vi okaji va vuravura. ⁵ Mutu numiya tu ni na tasi yaga na kwa e volai tu ve na vola tabu mutu vo gadrevia va bura na yalo iqoi e nokoto vo kemutou? ⁶ Okiya vo soliya oji tu la loloma. Igi vo kwaya ke okiya, Eru vo viavialevu ni vorokidru na kalou, iya la loloma e soli ga vuadru na yalo malumalumu. ⁷ Igi me mutu va malumalumu takiniko mutou ke vuwa na kalou, vorojiya na nitu, era qai tuba dei mai vuwako mutou. ⁸ Mutu toso voleka yaji vuwa na kalou, okiya na qai toso voleka ma vo kemutou. Va sarasara takiniya mutu lima, o mutou na lomalomarua ⁹ mutu mai rarawa, mutu mai tagi! Mutu vukieiya lemutu mali me lemutu rarawa vata marau me lemutu dredre. ¹⁰ mutu va malumalumu takiniko mutou ve na mata ni turaga. Okiya na qai lavejiko mutou cake. ¹¹ Mutu kuwa ni dau kakase, mutu kuwa ni vi kwaseji va viwekani, mutu kuwa talega ni kakase takiniya na i vunau. Iya kodaki o vo lewaiya na i vunau, o qai tasi tekuciya, o qai lewaiya ga. ¹² E vo kiya takiya ga e lewaia vata na daunilewa, okia ga e rewajiya na vi va colai va na vi varusai: ocei oiko mo vakawaia na vunau? ¹³ Iyo mutu varogo sara mai ikei o mutou na kwaya no “Nikuwa se viqwata madu na la ga i tauni, madu na lai no ke me kiya na yabaki, me madu vivala me leru na lemadu iyau. ¹⁴ Iya mutu tasi kilajia na vi kwa ena yaco viqwata: Ena vacara tu na lemutu cola? Mutu na vo tu vayawa tuga mai o kemutou, e rairai berebere valailai qai seayaru tu yaji. ¹⁵ Iya ikwe me mutu qai kwaya, kodaki vo donu mai ruwa na turaga, du na cola rata du na qai tara na vi kwa oka. ¹⁶ Iya mutu vo marau mutu qai raqwaraqwa: e bura ni mutu marau kodaki igi. ¹⁷ Okiya ga e bura qai tasi tara na kwa ya oka, igi na varau bura.