¹ Mutu lamai o kemutou na tamata vutuniyau, mutu lamai tagi vata mutu lamai vacacabo me balejiya na kwa rarawa ena yaco mai. ² E na vuca mai na lemutu you vata ena kaniya lemutu sulu na sarasara. ³ Ena veveka mai na lemutu koula vota na saliva; ena qai tukuniko mutou ga mai na keya veveka, ena qai kaniya mai mutu lala me kodaki na bukawaqa Mutu sogojiya oka lemutu you me rewa ni yacoriya na gaura mai ibere. ⁴ Tolariya vo tagi okuru na dau cakacaka, eru ro tamusukijiya na lemutu teitei okiya mutu saratakiniya: iya na gauna e rogociya ke na Turaga na ledru tagi eru na kala tamusukijiya ga. ⁵ Mutu marau no ga i vuravura, mutu na kana no vata mutu na vivakani no ve mutu yaloga, na siga e na tara ke na vi vamatei. ⁶ Mutu va lewaidru na yalododonu, mutu na vamateniya; ena Tasi vorajiko mutou okiya. ⁷ Okiya ga ikwe na viwekani, me mutuqai vosojiya me yaco gare la lesu mai na Turaga. Daniya na vatau-ni-were e wacia tu na vuwa ni qwele e talei, e vo wawa va balaru va lailai, me rewajiya re na luru simata mai vata na luvu e sibere mai. ⁸ Mutu wawa talega o kemutou; vadei takinya mutu yalo, ni vo voleka mai la lesu mai na Turaga. ⁹ Mutu kuwa ni vi ocaji o mutou na viwekani, ke mutu qai lai ocaji, mutu rogociya e vo tucake tu i mataniwere na Turaga ni lewa. ¹⁰ O kemutoou na viwekani, mutu va tekutekucidru na parofita na ledru dau vosojiya na kwa rarawa, vata na ledru dau vosojiya, eru vo tata ena yaca ni turaga. ¹¹ Edu na vatokanidru na dau vosojiya meru kalougata mutu rogociya la dau vosojiya o Jope, mutu vo daniya talega la mudukiya vacava na kalou, ni yalo oka na kalou ka dau loloma. ¹² Iya na kwa levu sara ikwe, o mutou lequ viwekani, mutu kwa sara ni bubului, tasi tara i lomalagi e tasi tara talega i vuravura se me kiya tale na kwa: me iyo ga na iyo me jikai ga na jikai; ke jikai mutu na lai ocaji. ¹³ Kodaki e kiya vo kemutou e va rarawataki me masu ga. Kodaki e marau me sere. ¹⁴ Kodaki e kiya vo kemutou e tauvimate, meru lai covi mai okuru na talatala qase ni lotu, meru masulakiniya meru waliciya talega ve na waiwai tabu. ¹⁵ Iya na masu ni vabaujiya ena va colaniya mai na tauvimate, ena qai vacolaniya mai na Turaga, iya kodaki e va taraiya na varau bura ena tasi lai ocaji ke. ¹⁶ mutu kala va tusaniya ga lemutu kala varau bura, mutu vi masulaki me mutu vi vacolai ke. E yaga sara valevu lemutu masu na yalododonu. ¹⁷ E tamata dau liu takiniko datou o Ilaijia, a masu sara va kaikai me kuwa ni tau na luvu i varavura ni vo oji re e tolu na yabaki vata e ono na vula. ¹⁸ A qai masu tale me tau na luvu me qai vuwa mai na vuanikai. ¹⁹ Oi kemutou na viwekani, kodaki e kiya vo kemutou e la va vitaliya tumai ve na vavuvuli jina, ena valesuniya tale mai e kiya. ²⁰ me kilajiya okiya ikwe ni tamata e valesuniya mai na valavala bura igi e tautauvata ga e va colai mai na mate. E bulujiya talega na valavala bura ya levu.