¹ O keya ikwe, medu deniya yaji nai tekitekivu ni leya i vavuvuli o Karisito medu toro cake me matuwa sara. Me du kuwa ni tauyavu takiniya tale na vivutuni ina vuku ni ledu valavala du wa mate ke, ina vabaujiya muni na Kalou, ² nai vavuvuli ni vivavitaiso taki, qaneya na vitabaki ina lima, vata na ledru tucake tale mai na o rau na mate, qaneya na lewa e jikai ni mudu rewa. ³ Ia na kwa ikwe eru vo vaveya, kodaki e oka vuwa na Kalou. ⁴ Evo dreidrei sara meru na vivavoui meru vivutuni o rau na vakakaramataki devu mai mata, eru vo tovoliya devu nai solisoli valomalagi, meru rewajiya na Yalo Tabu, ⁵ eru tovoliya na kwakwa oka ni Kalou, qaneya na kaikai ni cola e sibere no mai, ⁶ eru qai vuki dai tale niru vo vakojiya no ga vainidru na luve ni Kalou ina kauvelatai, eru beciya muni ina matana votu. ⁷ Nivo vakalougata takiniya na Kalou na qwele e somiya na luvu e dau yato ke valevu, e vatubuniya muni na kai e yaga vo rau na eru na keliya. ⁸ Ia e jikai ni vabau e vo ga valailai me biu sara yaji me vatubuniya na kai vavoto vata na soni, ia na keya devudevu ga na vayagi ⁹ Ia vuwako mutou ga na lomani, e djina ga madu tata kodaki ikwe, is madu vo numiko mutou ni mutu a dau oka no, evo nokoto no ga vuwako mutou na vikwa e lavata no na cola. ¹⁰ Ni Kalou e dodonu. E jikai ni numidei niya rewa na lemutu cakacaka, qaneya na loloma, mutu vatakiya ke e yaca ni mutu a dau qwaravidru o rau na lotu, ia mutu a dauviqwaravi no ga. ¹¹ Ia madu vo okajiya saraga mo mutu dui gugumatuwa vainiko mutou, mutu vanuinui maluwa no ke, me yacoviya na vaojioji ni gauna. ¹² Mutu kuwa ni vucesa, mutu tekucidru ga o rau nai taukei vikwa e yalataki niru a vabaujiya no eru a dauvosojiya vabalavu. ¹³ Nivo yalayala na Kalou vo Eparaama, e jikai ni cavujiya rewa e kiya me uwasivi cake, a qai tata ni yalayala. ¹⁴ A kwa, "E djina aqu na vakalougata takiniko valevu, aqu na valevu niya lemu kawa." ¹⁵ E kodaki muni ke, na leya dauvosojiya vabalavu o Eparaama, a qai yaco me taukenijiya na kwa a yalataki. ¹⁶ Ia niru vo bubului o rau na tamata eru dau cavujiya na kwa e yalevu. E devu vuwadru na viburaji ina bubului me vadjinadjina. ¹⁷ E kodaki muni ke na Kalou, e okajiya o keya me varaitakiniya djina sara vuwadru na taukeni jiya na kwa e yalataki nivo tudei na leya vatulewa, e vadjinadjina taki ina bubului. ¹⁸ Me ruwa ke na kwa e tudei sara, e jikai ni rewa ke, e jikai ni rewa ke vuwa me giri na Kalou, medu na vacegui ke o datou edu lai varurugi no nidu vo qulumiya nai nuinui evo nokoto no du mata. ¹⁹ O keya evo nokoto no vuwako datou me jiya i kelekele idu yaloga, e djina e qai kaikai muni ia evo unu sara ina yaloga ni lajilaji, e jiki igi e unu ke, ²⁰ me balejiko datou o Jisu, me ledu i liuliu, e vo lesi o keya me jiya bete levu me tawa mudu me kodaki o Melekiseteki.