¹ Ia o rau na bete levu yakiya eru djigitaki mai vuwa na tamata, eru lesi mai vuwa na Kalou, me balejidru o rau na tamata, me ru vacaboi me jiya i madrali qaneya nai soro ina vuku ni valavala ca. ² Evo rewarewa ke vuwa me lomanidru o rau na sesewa, ru cala ni vo nokoto no muni vuwa nai valavala ca. ³ Ia ina vuku ni vikwa ikwe, me kodaki muni ke o rau na tamata e kodaki muni ke vuwa, e dodonu muni ke o keya me vacaboniya nai soro ni valavala ca ⁴ E jikai ni kiya me qulumiya vainiya na cakacaka varokoroko ikwe me vaveya, o keya ga avo lesiya na Kalou me vaveya, me kodaki ga na kwa vaveya o Eroni. ⁵ E kodaki muni ke na Karisito e jikai ni dokaiya vainiya me bete levu o keya, e vuku ga a kwa ke vuwa, "O iko na lequ i luve; nikuwa aqu vo vatubu niko." ⁶ Me kodaki muni ga ke na leya tata ina kiya tale na vanuwa, "Na bete me tawa mudu o iko, me kodaki o Melekiseteki." ⁷ O kiya ikwe na leya nokoto no vatamata, evo vacaboniya no na kerekere, na masumasu, qaneya na tagi ni rarawa, nivo vawai e mata vuwa o keya e rewa ni vacolaniya mai na mate, e ya rogoci ga na kwa e kwa balejiya na leya vamataku. ⁸ Ia evo djina ga lai luve o keya, avo vavulici ga ina varau me mamakutu no ga me vosojiya no ga na kwa rarawa. ⁹ Ia nivo varautaki devu, eya yaco me jiya vuni cola tawa mudu vuwadru taucoko ga na varorogo vuwa. ¹⁰ A vo coviya na Kalou me jiya bete levu me kodaki leya i valavala o Melikiseteki. ¹¹ E levu na kwa esi vo no me madu na tukuniya ke, ia e dredre ga na keya balebale, e jikai vuwako mutou na bebe me varorogo. ¹² Nivo dodonu no mutu rewajiya makawa me mutu jiya vavuvuli, io e yaga muni mo mutu na lai vavulici tale se na cava re na vu ni vavuvuli ni Kalou. E yaga muni ga vuwako mutou na wai ni sucu, tasi jiya cawa djina! ¹³ Ni vo jikai ni lai kilai vadodonu nai vavuvuli ni vi vadodonu taki, o keya e somiya boto na wai ni sucu, ni jiya i luve ga. ¹⁴ E vo yaga jidru ga na makuga na cawa djina. o rau na varautakiniya ru yaloga ina varau, meru valewaiya rewa na vikwa e oka se bura.