¹ O kiya ikwe medu dau mataku nivo soliya devu tu na leya tata ni yalayala me du na unu yaji ina leya i vavacegu, ke lala mutu na jikai ni unu djina ke mutu yavalu. ² Nivo lai kwai mai i vuwako datou e kiya nakwa oka, me kodaki muni ke i vuwadru, ia e jikai ni yaga tu vuwadru na tata eru rogociya tu, evo jikai ni yaga tu vuwadru na tata eru rogociya, niru jikai ni kiya ga vata ina vabaujiya, me kodaki ni tata ke o keya. ³ Nidu vo sita ina leya i vavacegu o datou na vabaujiya, me kodaki eya tata ke o keya, "Me kodaki na lequ a bubului ke ina lequ a oca, Eru na jikai tu ga ni na sita ina lequ i vavacegu." ia e djina nivo devu na cakacaka nivo tauyavu taki devu o vuravura. ⁴ Niya kiya leya mala ni tata o keya a kwa ina kavitu ni siga, "Ena vacegu na Kalou ina leya cakacaka taucoko ga ina kavitu ni siga." Ia ikwe muni, ⁵ "Eru na jikai ni unu muni ina lequ vavacegu." ⁶ Ia nivo macala meru na unu ke eru yavalu, ia i vuwadru na lai kwai vuwadru na vikwa e oka eru na jikai ni sita ke, ina vuku ni ledru tasi varorogo. ⁷ A qai tekuciya tale e kiya na siga o keya, a kwa ke vo Tevita, Ina siga ikwe nivo devu e kiya na gauna balavu, me kodaki niya lai kwai devu, "Ina siga ikwe kodaki mutu mata varogo e domo mo kuwa ni vakaikai takiniya mutu yaloga." ⁸ Io kodaki a soliya vuwadru nai vavacegu o Josua ena jikai ni tata takiniya tale o keya e kiya tale na siga. ⁹ O kiya ikwe evo no e kiya nai vavacegu me ledru na tamata ni Kalou. ¹⁰ Ia o keya e sita ina leya i vavacegu, evo vacegu mai ina leya cakacaka, me kodaki evo vacegu mai na Kalou ina leya. ¹¹ O keya ikwe medu qai gumatua valevu cake sara medu sita yaji ina leya i vavacegu igina, ke reba ke e kiya na tamata nivo jikai ni tekuciya nai varo. ¹² Nivo colo na tata ni Kalou, e kaikai e gata valevu e drali ga nai selewau bajiruwa, e suwakiya me waseiya ruwa du yaloga qaneya du yalo, vata ledu sema vata du muto ni ruwa, e valewaiya sara na ledu numiya vata nai naki du yaloga. ¹³ E jikai muni ni kiya na kwa e cilotaki rewa e mata, ia e luvawale ga na kwa taucoko e mata e varaitaki ga e mata o keya eru vo vatusanaki niko datou vuwa. ¹⁴ Ia nivo kiya ga na ledu bete levu o keya e sita yaji i lomalagi, o Jisu na luve ni Kalou, du qulumiya vaoka na ledu lotu. ¹⁵ Nivo jikai ni ni kiya na ledu bete, ni jikai ni lomaniko datou rewa nidu vo malumalumu no, ia e beitaki ke medu vatautauvata ina kwa taucoko ga o keya, ia e jikai ni kiya na leya cala. ¹⁶ Ina vuku ni vikwa ikwe du vo toro doudou ke ina leya i nono vaturaga ina loloma, medu lai ocaji ke, medu lai lomani ke medu lai vukei ke ina gauna e yaga ke.