¹ O kiya ikwe o mutou na viwekani yalo savasava, mutu vo lai covi mutu jiya taukei ni kwa valomalagi, mutu vanumiya nai apositolo qaneya na bete levu eru vo vatusa naki niya no, o Jisu. ² O keya a loma djina vuwa o keya a lesiya mai, me kodaki muni ke o Mosese ina keya leya mataqali taucoko. ³ E dodonu me dokai valevu o keya me valailai o Mosese ni dokai valevucake o keya e vaveya na were, ia e valailai ga na were. ⁴ Nivo kiya na tamata e vaveya na were yakiya, ia o keya e vaveya na kwa taucoko e Kalou. ⁵ Ia e djina ga e dau yalo djina o Mosese ina keya mataqali taucoko, me kodaki ni jiya i talatala me vatakiya ke na vikwa ena lai kwai mai bere. ⁶ Ia na Karisito e djina me kodaki e kiya lai luve ni leya mataqali o datou, Kodaki du qulumiya na ledu doudou vata na reki ni nuinui me tudei, me yacoviya nai vadevudevu ni gauna. ⁷ O kiya ikwe me kodaki a kwa na Yalo Tabu, "Ina siga ikwe kodaki mutu mata varogo e domo ⁸ kuwa ni vakaikai takiniya mutu yaloga, me kodaki na viocaji me kodaki na siga ni viveretaki ina lekutu. ⁹ Eru dau veretaki niko au ke o rau na lemutu qase, eru dau vatovoliko au ke vabura. ¹⁰ O kiya ikwe aqu vo ocajidru ke o rau na itaba ecolo igina, Aqu kwa, Esi cala no ga eru yaloga, Ia eru jikai ni kilajiya na lequ i varau. ¹¹ Aqu a bubului ke ina lequ oca, "Niru na jikai ni unuviya na lequ vacecegu." ¹² Mutu tolaviko mutou vaoka na viwekani, ke nokoto no eru yaloga e yavalu vuwako mutou na yalo bura eru jikai ni vabaujiya, mutu biujiya dai ke na Kalou cola. ¹³ Ia mutu vivatavulici vaniko mutou ina visiga taucoko, nuvo vatokai ga na siga nikuwa, ke vayalo kaikai taki e kiya vuwako mutou ina vuku ni vivakwaisini ni varau bura. ¹⁴ Nidu vo leya i tokani ga na Karisito, kodaki du qulumiya vagumatuwa nai vatekivu ni ledu djina me tudei, me yacoviya nai vadevudevu. ¹⁵ Nivo lai kwai no kodaki ikwe, "Kodaki mutu mata varogo e domo, Mutu kuwa ni vakaikai takiniya mutu yaloga me kodaki viocaji." ¹⁶ Ia o cei o rau eru vaocaoca niya niru vo rogociya devu? O rau taucoko na la qaneya mai o Mosese mai Ijipita se jikai? ¹⁷ Ia o cei e ocajiya o keya na yabaki vasagavulu? i vuwadru nai varau bura a reba eru yago ina lekutu se jikai? ¹⁸ Ia o cei e bubului ke o keya meru kuwa ni unu ina leya i vavacegu, vuwadru ga na jikai ni vabaujiya? ¹⁹ Ia edu vo tolaviya, niru vo jikai ni sita rewa, niru vo jikai ni vabaujiya.