¹ O kiya ikwe e dodonu ke medu na vanananu valevu i na vikwa du rogociya, ke lala kiya na siga me lavele ke. ² Ia kodaki e vadjinadjina taki na tata eru kwa na agilosi, ni na saumi vadodonu nai valavala ca qaneya na talai dredre taucoko, ³ edu na cola kodaki i vei o datou, kodaki du vawelewele takiniya tu na cola levu ikwe? O keya ikwe a vatekivu takiniya na Turaga, me kwa mai a vadjinadjina takiniya muni mai vuwako datou o rau na rogociya. ⁴ E vo vadjinadjina no muni vuwadru na Kalou ina yavalu na vatakilakila qaneya na kwa vivakurabuitaki, qaneya levu na cakacaka mana e vaveya, nai votavota muni ni Yalo Tabu me kodaki na leya lewa. ⁵ E jikai ni soliya vuwadru na agilosi meru lewaiya na vuravura e sibere, o keya ikwe madu vo kwa no. ⁶ A vo varaitakiniya e kiya ina kiya e jiki e kwa, "E cava re na tamata mo dau numiya no? se na luve ni tamata dautaleviya no? ⁷ O buliya ga me uwasivi ga valailai mai vuwa na agilosi; o vaisala jidru ina ukuuku qaneya na varokoroko, o lesidru meru lewaiya e mawe mu lima. ⁸ O vamaulmalu takiniya na vikwa taucoko meru no e ruku ni la. Ia nivo vamalumalumu takiniya na kwa taucoko me lewaiya, e jikai nivo tale e kiya na kwa me vamalumalutaki vuwa. Ia edu jikai ni tolaviya nikuwa me vamalumalutaki vuwa na kwa taucoko ga me lewaiya. ⁹ Ia edu vo vatolaviya no ga o Jisu, a vai me uwasivi bale ga valailai vuwadru na agilosi a qai vaisalataki ina ukuuku vata na varokoroko, me balejiya leya vosojiya devu na mate, me mate o keya me balejidru na tamata taucoko ga, me kodaki ga na loloma ni Kalou. ¹⁰ Ni vo dodonu vuwa ni jiya taukei ni kwa taucoko ga, e vavuniya ga na kwa taucoko ga. Ni vameidru o rau na leya i luve eru lewe levu, ina vanuwa vaiukuuku me varautaki niya ina dauvosojiya me ledru i vuni cola. ¹¹ Ni vo kiya ga o Tamadru, o keya a vasavasava takiniya qanedru o rau na vasavasavataki. Ina vuku ni kwa ikwe eru na jikai ke ni madua o keya e vatokai meru jiya leya tacini. ¹² Ni kwa o keya, "Aqu na kwa mu yaca vuwadru na lequ tacini, Eru maliwa na soqosoqo lewe ni lotu aqu na varokoroko taki niko ina sere." ¹³ A kwa tale o keya, "Aqu na vararavi vuwa, A kwa tale, "Tolaviya, o au qanedru nai luve a solidru mai vuwako au na Kalou." ¹⁴ Ia niru vo lewe vata eru dra vata o rau nai luve, e kodaki muni ke o keya, me vamalumalumu takiniya ke o keya e lewaiya na mate, o kiya na nitu ina vuku ni mate. ¹⁵ Me serekidru muni ke o rau na vabobulataki tu ina ledru cola taucoko niru dau matakuciya na mate. ¹⁶ Ni vo jikai sara ni lamai vukeidru na agilosi o keya, e mai vukeidru ga na leya kawa o Eparaama. ¹⁷ O keya ikwe e vo dodonu ke vuwa, me yaco ke me kodaki o rau o wekaya ina kwa taucoko, me bete levu yalo oka me dau djina ina vikwa va Kalou, me sorovaki niya na ledru i valavala ca na tamata. ¹⁸ Ni dauvosojiya na i varau bura ni tamata, niya temaki o keya me rewajiya ke a dauvukeidru meru kuwa ni temaki.