¹ Io na vabaujiya e kodaki nivo cava na vikwa e nuitaki, e kodaki ni vo vatakei na vikwa e tasi ladai. ² Na kwa ikwe e rogo oka i mata o rau na tuqwaqwa. ³ Na vabaujiya e du kilajiya ke ni vo vai na vibuli na tata ni Kalou, e jikai ni vai na kwa e lai dani mai na ve kwa e lai dani no. ⁴ Na vabaujiya e vacabo niya o Epeli, nai soro oka vuwa na Kalou e bura na leya o Keni, e rewa jiya ke na vadjinadjina ni vo yalo dodonu, e vo vatakeya na Kalou e oka jiya na leya i madrali, na kwa ikwe e tata no ke o keya e vo mate tu. ⁵ Ni vo vabaujiya e mei yaji ke o Inoke, e jikai ni mate. "Aru jikai ni daniya, ni vo meiya yaji na Kalou." E sibere ni meiya yaji, a vo notu vuwa na vadjinadjina nivo okajiya na Kalou. ⁶ Kodaki e jikai na vabaujiya, e dredrei sara medu lai okaji: o keya e taroviya na Kalou e dodonu me vabaujiya ni cola o keya, e saumidru muni o rau eru vadaniya. ⁷ Na vabaujiya e mataku o Noa, evo vasalataki niya na Kalou balejiya na vikwa e sibere ni lamai avo takaviya e kiya na waqa o keya me vacolanidru ke leya matavuwere. A valewaidru ke na kwai vuravura, a cava me jiya taukei ni vivadododnu taki e cava ina vabaujiya. ⁸ Na vabaujiya e talai rewarewa ke o Eparaama, nivo lai covi me la ina vanuwa i sibere ni soli vuwa me lewaiya; avo layaji, e jikai ni kilajiya na vanuwa e lake. ⁹ Na vabaujiya e la inova vavunilagi no ke na vanuwa e yalataki, e kodaki e jikai ni jiya leya, e nokoto no ga ina viwere laca, o Aisake qeiniya o Jekope, eru taukei jiya vata i bere na kwa igi e yalataki. ¹⁰ E nuitakiya o keya na rara e tauyavu taki, e vaveya na Kalou. ¹¹ vabaujiya e vakaikai taki ke o Sera me kunekune takiniya na kawa, a vasucuniya nai luve nivo devu na keya gauna, e numiya ga e yalo djina o keya na yalatakiniya. ¹² O keya, ke tubu mai vuwa e kiya, o keya e kodaki evo mate, eru levu eru kodaki na vikalokalo mai lomalagi, e kodaki muni na volivoli mai matacawa e jikai ni wili rewa. ¹³ E mate ina vabaujiya o rau taucoko ga ikwe jikai ni ledru diina na vikwa e yalataki, eru daniya vayawa aru roqojiya, aru tukunidru niru vavunilagi aru viyato yaki vali i vuravura. ¹⁴ O rau eru tata kodaki ikwe eru vadeitaki niya sara niru vadaniya na vanuwa e ledru. ¹⁵ E djina ga, kodaki eru numiya na vanuwa igi aru dainiya tu, e rewarewa ga meru lesu tale ke. ¹⁶ Aru qai biujiya sara e kiya na vanuwa e oka cake sara, igi e valomalagi: o keya ga ikwe e jikai ni maduwa ke na Kalou me tokoniya me ledru Kalou: niru vaveya o keya ekiya na rara me ledru. ¹⁷ Nivo vabaujiya me vacabo niya o Aisake, o Eparama e vatovoliya, o keya a tata takiniya nai yalayala e vacaboniya me kiya ga o keya e vatubu o keya. ¹⁸ A lai kwai balejiya i mata, la kawa o Aisake, e vatokoniya me lemu kawa. ¹⁹ Avo vadjina jiya o keya e rewarewa vuwa na Kalou me vacolaniya tale mai na mate; a qulumiya tale me kodaki ke ina i vatakarakara. ²⁰ Nivo vabaujiya na tata ni vivakalougata taki o Jekope qeiniya o Iso, qaneya o Aisake ina vikwa e sibere. ²¹ Nivo vabaujiya a tata ni vivakalougata taki o rau ke o luveya o Joseva vata o Jekope, nivo voleka ni mate; avo cuva bale ina leya i toko. ²² Nivo vabaujiya a kwa ke o Joseva, e voleka ni mate, nivo lai dani o rau e luveya o Isireli; avo tatau takiniya e tuwa. ²³ Nivo vabaujiya e cilotaki niya o Mosese me vula tolu o rau na leya qase, nivo sucu o keya, niru vo daniya na mata oka ni luve. Aru jikai ni matakuciya lai varau na tui. ²⁴ Nivo vabaujiya a duwa ke o Mosese, ni qai tamata cola mai, me vatokai me luveya nai luve o Fero na vulau; ²⁵ Nivo djigitakiniya me vosojiya na vivaburaburataki nidru na tamata ni Kalou, e burajiya ni bau marau boto ga ina valavala bura e yavalu na siga. ²⁶ E vadjina jiya ni jiya yau levu e valailai balejiya o Karisito, na kwa lailai nai yau mai Ijipita: nivo vadaniya na keya i sau. ²⁷ Nivo vabaujiya avo deiniya ke i Ijipita o keya, a jikai ni matakuciya na leya oca na tui; avo gumaikali, me kodaki ni daniya omkeya e jikai ni lai dani. ²⁸ Ni vo vabaujiya a vaveya o keya na kana vata ni la siviya, qei niya na kuretaki ni dra, me kuwa ni lai dere ke o keya e vamate nidru na ulumatuwa. ²⁹ Nivo vabaujiya aru lake ina yaloga ni wasawasa dradra me kodaki ni vanuwa macamaca. Niru vo tovoliya o rau na kwai Ijipita meru bau kodaki ke, aru vo dromu. ³⁰ Na vabaujiya a reba ke na ba mai Jeriko, avo buku na druwadruwa me bogi vitu. ³¹ Nivo vabaujiya avo jikai ke ni rusa vata ke qenidru na jikai ni vabaujiya o Reapi, na lewa dauteigwane, avo meidru me vacegu nidru niya yamata. ³² Na cava tale mequ kwa? nivo balavu sara kodaki qu kwa balejiya o Kitioni, qeiniya o Peraki qeiniya o Samisoni, qeiniya o Jefica, qeiniya o Tevita, qeineiya o Samuela, qeinidru na parofita. ³³ O rau niru vo vabaujiya, aru vamalumalumu takiniya na vimatanitu e yavalu, eru vaveya na kwa dodonu, eru rewajiya me ledru na vikwa yalataki, eru vo sugujiya e gusu na laione, ³⁴ eru vo bokociya na quto vamataku, eru vakaikaitaki tale niru malumalumu, eru vo kaikai ina i valu, aru rovidru nai valu ni kwai kanikiya. ³⁵ Aru vo qulumidru tale e yavalu na lewa na kwai ledru aru tucake tale mai na mate. Eru yavalu eru vararawataki valevu, aru vo duwa ga ni cola, me oka cake ke na ledru tucake tale mai na mate. ³⁶ Aru tovoli eru yavalu ina varivariva qeinidru na vesu muni qeiniya na dai i were ni vivesu. ³⁷ Aru lai vadava ve na vatu, eru varo i ruwa eru veretaki, eru vamate ina selewau. Aru viyato yaki vali eru vaisulu e taba na sivi qeiniya na taba ni me. ³⁸ Eru dravudravuwa sara, eru vararawataki eru vaburaburataki. Io e jikai ni yaga o rau kwai vuravura meru no vata qanedru; eru vo se ina vivanuwa lala, ina viuluniyataga, ina yavalu na qwara qeiniya na viqwara vatu i vuravura. ³⁹ O rau taucoko ga ikwe eru rogo oka ina vuku ni vabaujiya io e jikai ni ledru djina na kwa e yalataki. ⁴⁰ Io avo varautaki niya na Kalou vuwako datou na kwa e oka cake meru kuwa ke vaokataki sara takiya ga medu vaokaoka sara vata ga.