¹ E no ga ina i vunau na varaitaki ni vika me bere mai, e jikai muni ni rewa i nai soro eru vacaboniya na viyabaki, eru vasavasavataki nidru na toro no ke. ² Kodaki evo rewa, e jikai ni mudu na ledru vivacabo, eru jikai ni bilitaki no ina valavala ca o rau na dausoro eru vo vasavasavataki va kiya? ³ nai soro iqoi e lai vanumi ke nai valavala ca ina viyabaki. ⁴ E dreidrei sara me kau dai mai valavala ca na dra ni bulumakau qeiniya na me. ⁵ O keya ikwe e kwa ke o keya ni vo lamai vuravura, ⁶ "Nai soro qaneya nai madrali o jikai ni okajiya, o varautakiniya ga vuwako au na yalo; nai soro yagi, hai soro muni e sorovaki ke nai valavala ca, o jikai ni marau ke. ⁷ A qu qai kwa, 'Daniya, aqu vo lamai, aqu volai ina i vola e vavivi mequ vaveya na kwa e okajiya na Kalou. ⁸ A kwa i mata o keya, "Nai soro qeiniya nai madrali qeiniya nai soro yagi, qeiniya nai soro e sorotaki hai valavala ca, o jikai ni okajiya, se me o marau takiniya. O keya a vacabo niya me kodaki nai vunau. ⁹ A qai kwa o keya, 'Daniya, aqu vo lamai mequ vaveya na kwa e okajiya na Kalou. A kau dai o keya nai matai, me vaveya na keya i karuwa. ¹⁰ Nidu vo vasavasavataki balejiya na lewa ikwe, e yaga o Jisu Karisito e vacabo vakiya. ¹¹ O rau taucoko ga na bete eru notu eru cakacaka na visiga, e vacabo valevu nai soro igi e jikai ni kau dai rewa nai valavala ca. ¹² O keya ikwe nivo vacaboniya va devu nai soro e kiya ga me balejiya nai valavala bura a qai no bale ve lima i matau na Kalou. ¹³ A qai waciya niya no me niya na keya i tutu e la. ¹⁴ Avo vacaboniya vo kiya nai soro a vaveya ke o keya na kwa taucoko ga e yaga vuwadru o rau eru vasavasavataki no. ¹⁵ A jiya i vadjinadjina muni vuwako datou na Yalo Tabu. Io nivo kwa devu o keya, ¹⁶ "Ikwe na viyalayalaji qu na vaveya vuwadru nivo devu na gauna igi, a qai kwa na Turaga, qu na vaqata niya na lequ i vunau veru yaloga, qai volaiya veru yalo. ¹⁷ Ni ledru i valavala bura qeiniya na ledru jikai ni varorogo qu na jikai ni numiya tale. ¹⁸ Kodaki e vo boko na kwa iqoi, evo jikai ni vacabo tale mai soro nai valavala ca. ¹⁹ O keya ikwe, o mutou na viwekani, edu vo qai doudou medu unu na lequ tabu sara balejiya e dra o Jisu. ²⁰ Na calevu vou a qai cola o keya a qai vadoniya vuwako datou, na kwa e unu ke nai laji, iqoi e yalo. ²¹ Evo kiya na ledru bete levu ina were ni Kalou, ²² medu toro voleka yaji ina yalo djina sara, nivo kuretaki tu du yalo me du kuwa ni beitaki niko datou ina bura, nivo sili tu du lala i na wai e madrawa. ²³ Medu qulumiya qata na ledu vatutusa ni ledu vabaujiya me kuwa ni vavuli, nivo yalo djina o keya e yalatakiniya. ²⁴ Medu vinumi vainiko datou, medu vakatakata taki medu dauloloma du qai varau oka. ²⁵ Medu kuwa ni daniya na vasoqo vata, me kodaki na ledrui varau e yavalu na tamata, medu vamasuji no, io me valevu, nidu vo daniya evo toro voleka mai na siga. ²⁶ Io kodaki du vo i valavala bura evo daniya ke du yalo, nidu vo kilajiya devu nai vavuvuli djina e jikai kiya tale e kiya nai soro ni valavala bura. ²⁷ E qai vo ga na ledu waciya ina mataku na siga ni lewa, qeiniya na oca mudremudre tale ga, iqoi e kanidru na meca. ²⁸ O keya e beciya na leya i vunau o Mosese ena mate ga, e jikai tale ni lai lomani, evo bilitaki vuwa eru ruwa se eru tolu nai vadjinadjina. ²⁹ Mutu vakasamataki niya na keya levu na viocaj e dodonu me cava vuwa, e va kwa waletaki nita na dra ni viyalayalaji, e vasavasavataki ke a balejiya na yalo ni loloma? ³⁰ Nidu vo kilajiya o keya e kwa, "Evo lequ i tavi mequ vataki niya, aqu na saumiya ga." A kwa tale, "Ena lewaidru na leya tamata o Jiova. ³¹ E kwa vamataku me lutu ve lima na Kalou cola! ³² Mutu vanumiya na siga i mata, a mutu vakakaramataki ke mutu qai vosojiya na vivala ina rarawa djina. ³³ E yavalu ni mutu vasirivoto taki ina varivariva qeiniya na vivararawataki, e yavalu, ni mutu no vata qeinidru e yavalu e kodaki ke. ³⁴ Ni mutu lomanidru ga eru vesu tu, mutu marau nivo lai suguji na lemutu i yau, ni mutu vo kilajiya ve mutu yalo eno ga mai lomalagi na lemutu i yau e oka sara ina viqaji. ³⁵ O keya ikwe mutu qai kuwa ni daniya na lemutu vaidjina hiya ena levu na keya i sau. ³⁶ Evo yaga vuwako mutou na vosojiya, mutu vaveya na kwa e okajiya na Kalou, me lemutou ke na kwa e okajiya na Kalou, me lemutou ke na kwa e yalataki. ³⁷ Ena balavu valailai, e qai lamai o keya e lamai, e jikai ni balavu sara. ³⁸ E cola na tamata yalo dodonu ina vabaujiya, Io kodaki evo suka kanikiya take, e jikai ni okajiya qu yalo. ³⁹ O datou edu jikai ni kodaki o rau na suka tale yaji ina rusa, du kodaki ga o rau eru vabaujiya no me cola na yalo.