¹ Okiya ga ikwe, ni madu vo tasi rewa ni vosojiya rewa, maru vo okajiya ga me maru vo no takiya tuga mai Aceni. ² Iya me maru vo vatalajiya ga o Timoci, e kiya ga maru viwekani, vata na talatala ni Kalou, e kiya na lemaru tokani oka ni vakau vai tukutuku ni Karisito, me vadei takiniko mutou, vata me varojiko mutou ina vuku ni lemutu vabaujiya. ³ Me kuwa ni kiya me vayalagi I na vuku ni rarawa ikwe: ni mutu vo kilajiya na vanua me mutu lesi ke. ⁴ E vo djina ni madu a no qeniko mutou, madu vo kwaya oji soko vuwako mutou na va rarawataki ena simata re: a vo yaco me kodaki iya mutu vo kilajia oka no ga. ⁵ Ena vuku ni kwa ikwe, aqu vo tasi vasojiya rewa, aqu vo vatalajiya ga yaji mequ kilajiya na kaikai ni lemutu vabaujiya, kelala me bo liumuri takiniko mutou na dauni liumuri, me qai tasi yaga tu na kwaleru madu lamai vaveya tu. ⁶ Iya mutu qai la tumai ivei o mutou o Timoci vo mutou, a kaumai nai rogorogo oka vata na loloma ni lemutu vabaujia vata na lemutu dau numiko madou, vata na lemutu dau gadreria tu me mutu dariko madou kodaki ga lemadu dau gadrevia tu me madu dariko mutou. ⁷ Okia ga ikwe madu vo vacegui ke balejiko mutou, na vuku ni lemutu vabaujiya, ena lemadu rarawa rata na lemadu vuturi. ⁸ Madu na cola no ga kodaki me mutu dei no ga vua na Turaga. ⁹ Iya na kodaki ivei na levu ni vaokaoka vua na kalou, na leru ni marau vata na reki vata na ledu vaokaoka takiniya na Kalou. ¹⁰ Ni madu vo masu tuga na vi bogi vata na vi siga, madu masulaki niya tu me madu daniya mutu mata, me madu rewa ni jiniya talega ke na kwa e vo no ve na lemutu vabaujiya. ¹¹ Iya me tuberiko madou re vuwako mutou na kalou levu na ledu momo vata na Turaga o Jisu Korisito. ¹² Iya me valevu takiniko mutou na Turago me mutu oka valevu sara na lemutu loloma vai niko mutou, vata vuadru taucoko na tamata me kodaki o madou vo kemutou. ¹³ Me vataudei takiniya okiya mutu yalo me sarasara i na mata ni kalou na ledu momo, ni na lesu tale mai na ledu Turaga o Jisu Karisito vata o rau na yalo sarasara.