¹ O keya ikwe mo mutu biujiya dai na yalo bura taucoko, na daulawaki taucoko, na dauvivakwasini, na dauvuvu, na dautata ni vaburaburataki taucoko. ² Mo mutu kodaki nai luve esi qai sucu, mo mutu okajiya valevu nai vavuvuli me kodaki na wainisucu djina, mo mutu tubu cake ke, ³ kodaki e djina ni mutu vo tovoliya devu nivo yalo loloma na Turaga. ⁴ Ni mutu vo lamai vuwa, me kodaki ina vatu colacola igi eru biujiya na tamata, ia na Kalou evo djigitakiniya e talei vuwa. ⁵ O kemutou muni, me kodaki ni mutu vo vatu colacola, mutu vo vai cake mo mutu were vayalo, me mata bete yalo savasava, mo mutu vacaboniya na madrali vayalo, e oka vuwa na Kalou e vu o Jisu Karisito. ⁶ O keya e nokoto no muni ina Vola Tabu, "Tolaviya aqu a viritakiniya mai Saioni na vatu ni yavu ina tutu ni were e djigitaki e kwa talei, Ia o keyae vabaujiya no ena jikai ni maduwa." ⁷ E na lemutou ke na talei, o kemutou na vabaujiya, ia i vuwadru na tasi varorogo, "Na vatu aru biujiya ina mata ni were e yaco me jiya i vadei ni tutu ni were," ⁸ qaneya na vatu eru a vataurabe ke, qaneya na vatu eru lutu ke, niru vo vataurabe ina tata niru a be, eru vo lesi meru kodaki muni ke. ⁹ Ia o kemutou na taba tamata djigitaki, na mata bete vaturaga, na matanitu yalo savasava na tamata eru taukeni jiya na Kalou, mo mutu varaitakiniya na leya oka sara o keyae coviko mutou mai na gilogilo ina kakarama e vivakurabuitaki. ¹⁰ O kemutou mutu a jikai ni tamata taukeni i mata, ia a qai tamata ni Kalou, mutu a jikai ni lai lomani mai mata, ia mutu qai lai lomani . ¹¹ O kemutou na lomani, aqu vamamasujiko mutou, ni mutu a kodaki o rau na vulagi, qanedru na dauviyato yaki mo mutu taroviko mutou mai na gagadre bura ni yago e vivala qaneya na yalo. ¹² Me dodonu na lemutu varau ina kedru maliwa eru jikai ni lotu, ina vikwa ikwe me rokovi ke na Kalou ina visiga ni viyatovi, ina vuku ni valavala oka eru na daniyao rau nadau tata vaburaburataki niko mutou me kodaki ni mutu jiya na tamata varau bura. ¹³ Mutu talai rewarewa ina lesilesi taucoko ni tamata ina vuku ni Turaga, se vuwa na tui, nivo teimata no, ¹⁴ se vuwadru na turaga ni lewa, me kodaki o rau na lai vatala mai vuwa me lai ocaji ke o rau nai varau bura, ia eru na dokai o rau nai varau oka. ¹⁵ Ikwe na loma ni Kalou mo mutu vagaluniya ina valavala e oka na ledru sesewa na tamata lialia. ¹⁶ Mo mutu kodaki o rau na gwalala, ia mutu kuwa ni vaveya na lemutu gwalala meru na cilo ke na yalo bura, ia mutu kodaki ga na tamata ni Kalou. ¹⁷ Dokaia na tamata taucoko. lomanidru na viwekani. Matakuciya na Kalou. Rokoviya na tui. ¹⁸ O kemutou na tamata, mutu varorogo i vuwadru na lemutu turaga ina mataku taucoko ga, me kuwa ga i vuwadru na dauyalo oka na yalo maluwa, i vuwadru muni na yalo vatani. ¹⁹ Na kwa ni vaokaoka ikwe, kodaki e kiya e vosojiya na rarawa vararawataki vatawa dodonu, ia e okajiya me oka vuwa na Kalou. ²⁰ Ia mutu na dokai va cava kodaki mutu na vosojiya ni mutu a varau bura mutu na vaculaki ke? ia kodaki mutu vaveya na kwa oka, mutu vararawataki ke, mutu vosojoya ga, ikwe na kwa e oka vuwa na Kalou. ²¹ Ni mutu lai covi me kodaki igi, ni ya vosojiya muni na Karisito na rarawa me balejiko mutou, a lamai deniya no e kiya nai varau mo mutu na vatekutekuciya e mawe ni la. ²² O keya a jikai ni vaveya e kiya nai varau bura, e jikai ni lai dani vuwa e gusu na vivakwaisini. ²³ Ni ya vasewasewani o keya, ia e jikai ga ni vivasewasewani o keya nivo vararawataki no e jikai ga ni tata ocaocajidru, e deniya ga i vuwa na vuni lewa vadodonu me lewaiya. ²⁴ O keya ga e dagiya na ledu i valavala bura e yago ina kauvelatai, medu mate tu ina valavala bura, medu vaveya na varau e oka ina ledu cola ia na we ni keya kuita edu vacolai ke. ²⁵ Ni mutu a kodaki o rau na sipi eru sese, ia mutu qai saumaki tale vuwa nai vatawa o keya e dau vatolaviya mutu yalo.