¹ I vuwako mutou muni na yalewa mutu vamalumalutaki niko mutou vuwadru le,utu teigwane. Me rewajidru na ledru teigwane o rau na yalewa ina ledru varau, me kuwa ga ina vunau, kodaki eru yavalu ru jikai ni talai rewarewa ina vunau. ² Niru na tolaviya no o rau na lemutu varau me savasava e varokoroko jidru muni. ³ Ia me kuwa ni lemutou na ukuuku i taudaku, na tali ni rauniulu, qaneya nai ukuuku koula, nai sulu vaiukuuku. ⁴ Ia na kwa vayalo e cilo, na kwa e jikai ni vuca rewa na yalo malumalumu, na yalo matuwa, ikwe nakwa e taleitakiniya na ledu Kalou. ⁵ Eru kodaki muni ke o rau na yalewa eru yalo savasavauna gauna i mata, eru vararavi vuwa na Kalou niru vaiukuukutaki nidru, niru dautalai rewarewa vuwadru na ledru teigwane. ⁶ Me kodaki na leya talai rewarewa o Sera vo Eparaama, a daucoviya na turaga, ia mutou lai luve, ni mutu vaveya no na kwa oka mutu jikai ni matakuciya na dauvamatamataku. ⁷ O kemutou na teigwane mutu no qanedru no na lemutu yalewa, me nokoto na vuku, mutu rokoviya na lemutu yalewa, kodaki ni malumalumu ni mutu i taukei vata na loloma ni cola. Me kuwa ni tarovi na lemuru masu. ⁸ Ia mequ jiniya mutu loma vata, mutu vilomani vainiko mutou, vilomani me kodaki na vitacini, mutu yalo loloma, mutu lokomi. ⁹ Kuwa ni visasaumi takiniya na bura, se mutu vivasewasewani, ia mo mutu kanikiya, mutu tata ni vakalougata takiniya, ni mutu a lai covi mo mutu na kodaki ke, mo mutu rewajiya na kwa ina vivakalougataki. ¹⁰ Ia o keya e okajiya na cola, me na tolaviya na vigauna oka, Me taroviya e yame mai na kwa bura, qaneya e tabari gusu me kuwa ni tatatakiniya na kwa e giri. ¹¹ Me lesu dai mai na vikwa e bura a vaveya na kwa e oka, Me vadaniya na vacegu, a vatekuciya sara. ¹² Ni dauvatolavidru na tamata yalo dodonu na mata ni Turaga, e tadola tu e bebe me na daurogociya na ledru masu, Ia e dau kaniya e mata na Turaga i vuwadru na valavala ca. ¹³ Ia o cei ena vaburaburataki niko mutou, kodaki mutu gumatuwa ina kwa oka? ¹⁴ Ia kodaki mutu na vararawataki ina vuku ni valavala dodonu, mutu na kalougata ke, ia mutu kuwa ni kuwa ni matakuciya na ledru vivamatamataku se kodroa ke. ¹⁵ Ia mutu varokorokotakiniya na Turaga na Kalou mutu yaloga, mutu varau no mo mutu na kwa i vuwadru na tamata yakiya eru na tarogiko mutou, na vuni nuinui e nokoto no mutu yaloga ina yalo malumalumu qaneya na varokoroko. ¹⁶ Me oka ga na lemutu lewa mai yaloga, me yaco ke na ledru tata vaburaburataki niko mutou, me mutu kodaki na tamata eru varau bura, meru na kana maduwa re o rau na beitakiniko vailoa na lemutu valavala e oka vuwa na Karisito. ¹⁷ E oka, kodaki e loma ni Kalou me yaco, mo mutu na vararawataki ina vuku ni varau oka. ¹⁸ Ni a vararawataki muni vakiya na Karisito ina vuku ni valavala ca, o keya na varau dodonu, me balejidru na varau bura, me meiko datou vuwa na Kalou me vamatei e yago, ia a colai e yalo. ¹⁹ A lamuni yaji o keya me vunau i vuwadru na yalo eru nokoto no mai na werenivivesu. ²⁰ O rau na na daube i mata, ni dauvosojiya tu mai vabalavu na Kalou, ia a dauwawa ina leya gauna o Noa ni varautakiniya no na leya waqa, eru lewe vica ga, ia e lewe walu ru vacolai mai na yaloga ni wai. ²¹ Iqoi ga na na vatakarakara nivo vacolaniko datou na papitaiso e jikai ga ni biu na dukaduka ni yago, e na lai kwai muni na keya oka vuwa na Kalou na ledu lewa mai yaloga, me balejiya na leya tucake tale mai na mate o Jisu Karisito. ²² O keya avo lacake yaji i lomalagi, a nokoto no mai e lima matau na Kalou, ia e vamalumalutaki tu vuwao rau na agilosi, qanedru o rau na lewaiya, orau muni na kaikai.