¹ O au o Pita na leya apositolo o Jisu Karisito, i vuwadru na nokoto no vavulagi niru vo visebayaki i Ponito, i Kalajiya, i Kapatosiya, i Esia, qaneya i Piciniya. ² Eru vo djigitaki tu me kodaki na leya lewa i mata na ledu Kalou o Tamadatou, meru vasavasavataki ina Yalo Tabu meru talai rewarewa ke ena kuretaki muni e dra o Jisu Karisito. Me valevu taki vuwako mutou na loloma qaneya na vacegu. ³ Medu vaokaoka vuwa na Kalou leya Momo na ledu Turaga o Jisu Karisito, o keya e vatubuniko datou tale me ledatou na nuinui ni colacola, me kodaki na leya loloma levu nivo tucake tale mai na mate o Jisu Karisito. ⁴ Medu na taukeni jiya nai votavota oka e jikai ni bura rewa, e jikai ni dukaduka, e jikai ni malai mai e maroroi no mai i lomalagi me lemutou. ⁵ O kemutou na maroroi ina kaikai ni Kalou ina vuku ni vabaujiya ina cola e varau tu me na varaitaki ina gauna mai bere. ⁶ Ia ina kwa ikwe mutu na reki valevu ke, ia ina gauna lekaleka ikwe, se yaga mutu na vararawataki ina vimataqali dredrei. ⁷ Me lai dani ke na lemutu vabaujiya ena vatovolei, me taleitaki valevu cake sara ia me valailai ga na koula e bura rewarewa ni na vatovolei ina bukawaqa, me kwa ni vaokaoka a dokai me na vacaucautaki ina gauna e lesu tale mai o Jisu Karisito. ⁸ O keya mutu a jikai ni tolaviya, ia mutu lomaniya ga, o keya mutu jikai ni tolaviya no nikuwa, ia mutu vabaujiya ga, mutu reki ina reki e jikai ni cavuji rewa e oka sara. ⁹ Ni mutu vo rewajiya nai jinijini ni lemutu vabaujiya, io ena cola mutu yalo. ¹⁰ Na cola ikwe eru vatarogiya na parofita, eru vadaniya no muni, o rau na parofisai takiniya na loloma ena lemutou. ¹¹ niru vadaniya se gauna cava, se kodaki i vei na gauna e na vatakiya vuwadru na Yalo Tabu e nokoto no ru yaloga, ni vo kwaya devu re na leya rarawa o Karisito qaneya na vikwa e oka ena bere mai. ¹² A vatakei vuwadru, e jikai ni balejidru ga, ia me balejiko datou eru yaco meru jiya i talatala ina vikwa e lai kwai mai vuwako mutou o rau na vunautakiniya vuwako mutou nai tukutuku oka, qaneya na Yalo Tabu e lai vatala mai lomalagi, na vikwa ikwe eru okajiya o rau na agilosi meru djikeviya. ¹³ O keya ikwe mo mutu biujiya mutu mata ni yaloga, mutu yalo matuwa mutu vanuinui no ni na yaco mai nai vataojioji, mo mutu rewajiya ke na loloma ena mei mai vuwako mutou ena lai tolavi mai o Jisu Karisito. ¹⁴ Me kodaki na i luve e dautalai rewarewa, mutu kwa ni vatautau vata qaneko mutou na vigagano bura i mata ni mutu a liyaliya. ¹⁵ Ia e yalo savasava o keya a coviko mutou, mutu yalo savasava muni o mutou ina valavala taucoko ga. ¹⁶ Ni volai "Mutu yalo savasava niqu vo yalo savasava o au." ¹⁷ Ia kodaki mutu masu vuwa, me kodaki ni jiya o Tamamutou o keya e lewadru yakiya, me kodaki na kwa eru vaveya e jikai ni djigitaki nidru vavitalia na tamata, me mutu matakuciya ina lemutu valavala ina gauna mutu a nokoto no ke vavulagi . ¹⁸ Ni mutu a kilajiya mutu a jikai ni voli ina vikwa caca wale, ina siliva se na koula mai na lemutu varau bura mutu a rewajiya mai vuwadru lemutu qase. ¹⁹ Ina leya dra talei o Karisito me kodaki na lami e jikai ni bura rewa e kiya e jiki. ²⁰ Keya a lesi i mata aqai tauyavutaki i bere na vuravura, a qai varaitaki ina gauna i bere me balejiko mutou. Ia o kiya ikwe e vuni ²¹ lemutu vabaujiya na Kalou, o keya a vatucakeniya tale mai na mate, a soliya vuwa e kiya nai ukuuku me niya na Kalou o keya a vatucake takiniya tale mai na mate, mutu vo vabaujiya vanuinui no ke. ²² Mutu vasavasavataki niya mutu yaloga ni mutu vo talai rewarewa ina vavuvuli djina ina vuku ni Yalo Tabu, mo mutu lomanidru ke o wekamutou ina loloma e djina, ia mutu vilomani vainiko mutou ina yalo savasava qaneya na loma katakata. ²³ Ni mutu vo sucu tale, e jikai na sila e vuca rewa, ikwe ga ena jikai ni vuca rewaina tata ni Kalou e cola, tudei a tawa mudu. ²⁴ Edu kodaki na qarasi na tamata taucoko ga. E kodaki na se ni qarasi nai ukuuku ni tamata. E daumalai na qarasi, a mira ese. ²⁵ Ia na tata ni Kalou e tudei me tawa mudu. Ia ikwe na tata ni tukutuku oka e vunautaki vuwako mutou.